ಬೆತುಲ್(ಮಧ್ಯಪ್ರದೇಶ): ದೇಶದಲ್ಲಿ ಪ್ರತಿದಿನ ಪೆಟ್ರೋಲ್-ಡೀಸೆಲ್ ಬೆಲೆ ಗಗನಮುಖಿಯಾಗ್ತಿದೆ. ವಾಹನ ಸವಾರರು ಇನ್ನಿಲ್ಲದ ತೊಂದರೆ ಅನುಭವಿಸುತ್ತಿದ್ದಾರೆ. ಇದರ ಮಧ್ಯೆ ಪೆಟ್ರೋಲ್ ಪಂಪ್ ಮಾಲೀಕನೋರ್ವ ಗ್ರಾಹಕರಿಗೆ ಹೆಚ್ಚುವರಿಯಾಗಿ ಉಚಿತ ಪೆಟ್ರೋಲ್ ನೀಡಿದ್ದಾರೆ.
ಮಧ್ಯಪ್ರದೇಶದ ಬೆತುಲ್ದಲ್ಲಿ ಪೆಟ್ರೋಲ್ ಪಂಪ್ ಇಟ್ಟುಕೊಂಡಿರುವ ಮಾಲೀಕನೋರ್ವ ಈ ರೀತಿಯಾಗಿ ನಡೆದುಕೊಂಡಿದ್ದಾರೆ. ಇದಕ್ಕೆ ಕಾರಣವಾಗಿದ್ದು ಮಾತ್ರ ಮನೆಯಲ್ಲಿ ಹೆಣ್ಣು ಮಗಳು ಹುಟ್ಟಿರುವ ಖುಷಿ.
ರಾಜೇಂದ್ರ ಸೈನಿ ಸೊಸೆ ಶಿಖಾ ಅಕ್ಟೋಬರ್ 9ರಂದು ಹೆಣ್ಣು ಮಗುವಿಗೆ ಜನ್ಮ ನೀಡಿದ್ದಾರೆ. ಮಗಳ ಜನನವಾಗುತ್ತಿದ್ದಂತೆ ಸೈನಿ ಕುಟುಂಬದಲ್ಲಿ ಸಂಭ್ರಮ ಮನೆ ಮಾಡಿದೆ. ನವರಾತ್ರಿ ಹಬ್ಬದಲ್ಲಿ ಹೆಣ್ಣು ಮಗು ಹುಟ್ಟಿರುವ ಕಾರಣ ಲಕ್ಷ್ಮಿಯ ಜನನವಾಗಿದೆ ಎಂದು ಹೇಳಿಕೊಂಡಿದ್ದಾರೆ.
ಇದನ್ನೂ ಓದಿರಿ: ಪಾಕ್ ಜೆರ್ಸಿಯಲ್ಲಿ ಭಾರತದ ಹೆಸರು ಉಲ್ಲೇಖ.. ಸುಖ್ಯಾಂತ ಕಂಡ ವಿವಾದ
ಗ್ರಾಹಕರಿಗೆ ಹೆಚ್ಚುವರಿ ಪೆಟ್ರೋಲ್!
ಮನೆಯಲ್ಲಿ ಹೆಣ್ಣು ಮಗು ಜನನವಾಗುತ್ತಿದ್ದಂತೆ ಪೆಟ್ರೋಲ್ ಪಂಪ್ಗೆ ಬರುತ್ತಿರುವ ಗ್ರಾಹಕರಿಗೆ ಹೆಚ್ಚುವರಿಯಾಗಿ ಪೆಟ್ರೋಲ್ ನೀಡುವ ನಿರ್ಧಾರ ಕೈಗೊಂಡಿದ್ದಾರೆ.. ಮಗಳು ಹುಟ್ಟಿದ್ದಕ್ಕಾಗಿ 100 ರೂಪಾಯಿಗೆ 105 ರೂ. ಪೆಟ್ರೋಲ್ ನೀಡಲಾಗ್ತಿದೆ.
ಈ ಆಫರ್ ಅಕ್ಟೋಬರ್ 13 ರಿಂದ 15ರವರೆಗೆ ಬೆಳಗ್ಗೆ 9 ರಿಂದ 11 ಹಾಗೂ ಸಂಜೆ 5 ರಿಂದ 7ರವರೆಗೆ ನೀಡಲಾಗಿತ್ತು. ಇದರ ಹೊರತಾಗಿ ಕೂಡ 100 ರೂ.ಗಿಂತಲೂ ಹೆಚ್ಚಿನ ಪೆಟ್ರೋಲ್ ಹಾಕಿಸಿಕೊಳ್ಳುವವರಿಗೆ ಶೇ.10ರಷ್ಟು ಹೆಚ್ಚಿನ ಪೆಟ್ರೋಲ್ ಹಾಕಲಾಗಿದೆ.
ಈ ವಿಚಾರವಾಗಿ ಮಾತನಾಡಿರುವ ರಾಜೇಂದ್ರ ಸೈನಿ, ಮನೆಯಲ್ಲಿ ಹೆಣ್ಣು ಮಗು ಹುಟ್ಟಿದೆ. ಕೋವಿಡ್ ಕಾರಣದಿಂದಾಗಿ ಬೇರೆ ರೀತಿಯಾಗಿ ಸಂಭ್ರಮಾಚರಣೆ ಮಾಡಲು ಸಾಧ್ಯವಿಲ್ಲ. ಹೀಗಾಗಿ, ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ತಿಳಿಸಿದ್ದಾರೆ.
