ಅಹಮದಾಬಾದ್ (ಗುಜರಾತ್): ಸುಮಾರು 32 ಕೋಟಿ ರೂಪಾಯಿ ಮೌಲ್ಯದ 3.221 ಕೆ.ಜಿ ಕಪ್ಪು ಕೊಕೇನ್ ಸಾಗಿಸುತ್ತಿದ್ದ ಬ್ರೆಜಿಲ್ ಪ್ರಜೆಯೊಬ್ಬನನ್ನು ಗುಜರಾತ್ನ ಅಹಮದಾಬಾದ್ ವಿಮಾನ ನಿಲ್ದಾಣದಲ್ಲಿ ಕಂದಾಯ ಗುಪ್ತಚರ ನಿರ್ದೇಶನಾಲಯ (ಡಿಆರ್‌ಐ) ಅಧಿಕಾರಿಗಳು ಬುಧವಾರ ಬಂಧಿಸಿದ್ದಾರೆ. ಸಾವೊ ಪಾಲೊ ಬಂಧಿತ ಬ್ರೆಜಿಲ್ ಪ್ರಜೆ ಎಂದು ಗುರುತಿಸಲಾಗಿದೆ.
ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಟೆಸ್ಟಿಂಗ್ ಕಿಟ್ ಬಳಸಿ ಶ್ವಾನ ದಳ ತಪಾಸಣೆ ನಡೆಸಿತು. ಆರಂಭದಲ್ಲಿ ಯಾವುದೇ ಪ್ರಯಾಣಿಕರ ಟ್ರಾಲಿ ಅಥವಾ ಕ್ಯಾಬಿನ್ ಬ್ಯಾಗ್‌ನಲ್ಲಿ ಯಾವುದೇ ಅನುಮಾನಾಸ್ಪದ ವಸ್ತುಗಳು ಕಂಡುಬರಲಿಲ್ಲ. ಆದಾಗ್ಯೂ, ಬ್ಯಾಗ್ನ ತಳ ಭಾಗದಲ್ಲಿ ದಪ್ಪವಾದ ರಬ್ಬರ್ ಹೊಂದಿರುವುದನ್ನು ಕಂಡುಹಿಡಿಯಲಾಯಿತು. ಅದನ್ನು ಬಿಡಿಸಿ ನೋಡಿದಾಗ ಹರಳಿನಂತಹ ಕಪ್ಪು ವಸ್ತು ಪತ್ತೆಯಾಗಿದೆ.
ಅಹಮದಾಬಾದ್‌ನ ವಿಧಿ ವಿಜ್ಞಾನ ಪ್ರಯೋಗಾಲಯದ (ಎಫ್‌ಎಸ್‌ಎಲ್) ಅಧಿಕಾರಿಗಳ ತಂಡವನ್ನು ಸ್ಥಳಕ್ಕೆ ಕರೆಸಿ ಹರಳಿನ ಕಪ್ಪು ವಸ್ತುವನ್ನು ಪರೀಕ್ಷಿಸಲಾಯಿತು. ಆಗ ಕೊಕೇನ್ ಎಂದು ದೃಢಪಟ್ಟಿದೆ. ಇದರ ತೂಕವು 3.221 ಕೆ.ಜಿ ಇತ್ತು. ಈ ರೂಪದ ಕೊಕೇನ್ ಅನ್ನು ಇದ್ದಿಲು ಮತ್ತು ಇತರ ರಾಸಾಯನಿಕಗಳೊಂದಿಗೆ ಬೆರೆಸಲಾಗುತ್ತದೆ. ಇದು ಕಪ್ಪು ರಬ್ಬರಿನ ನೋಟ ನೀಡುತ್ತದೆ. ಕಳ್ಳತನದಿಂದ ಸಾಗಿಸಲು ಮತ್ತು ಶ್ವಾನ ದಳ ಮತ್ತು ಫೀಲ್ಡ್ ಟೆಸ್ಟಿಂಗ್ ಕಿಟ್‌ಗಳಿಂದ ಪತ್ತೆ ಹಚ್ಚುವಿಕೆ ತಪ್ಪಿಸುವುದು ಇದರ ಉದ್ದೇಶ ಎಂದು ಅಧಿಕಾರಿಗಳು ಹೇಳಿದ್ದಾರೆ.
ಇದನ್ನೂ ಓದಿ: ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ 30 ಕೋಟಿ ರೂ. ಮೌಲ್ಯದ ಕೊಕೇನ್ ವಶ : ಲೈಬೀರಿಯನ್ ಮಹಿಳೆ ಬಂಧನ
ದೆಹಲಿ ಏರ್ಪೋರ್ಟ್ನಲ್ಲಿ 16 ಕೆಜಿ ಚಿನ್ನ ಪತ್ತೆ: ಇದೇ ಜೂನ್ 13ರಂದು ರಾಷ್ಟ್ರ ರಾಜಧಾನಿ ದೆಹಲಿಯ ಇಂದಿರಾಗಾಂಧಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಅಕ್ರಮವಾಗಿ 10.39 ಕೋಟಿ ರೂಪಾಯಿ ಮೌಲ್ಯದ 16.5 ಕೆ.ಜಿ ಚಿನ್ನ ಸಾಗಿಸುತ್ತಿದ್ದ ಮಹಿಳೆ ಸೇರಿ ಇಬ್ಬರು ಉಜ್ಬೇಕಿಸ್ತಾನ ಪ್ರಜೆಗಳನ್ನು ಕಸ್ಟಮ್ಸ್ ಅಧಿಕಾರಿಗಳು ಬಂಧಿಸಿದ್ದರು. ಗುಪ್ತಚರ ಮಾಹಿತಿ ಆಧಾರದ ಮೇಲೆ ಮೊದಲಿಗೆ ಮಹಿಳೆಯರನ್ನು ಗುರುತಿಸಲಾಗಿತ್ತು.
ವಿಮಾನದಿಂದ ಇಳಿದ ಕ್ಷಣದಿಂದ ಆಕೆ ಮೇಲೆ ಅಧಿಕಾರಿಗಳು ನಿಗಾವಹಿಸಿ, ಆಕೆಯನ್ನು ತಡೆದಿದ್ದರು. ಆದಾಗ್ಯೂ, ಆಕೆ ಮತ್ತು ಆಕೆಯ ಬಳಿಯಿದ್ದ ಬ್ಯಾಗ್ಗಳ ತಪಾಸಣೆಯಲ್ಲಿ ಯಾವುದೇ ನಿಷಿದ್ಧ ವಸ್ತುಗಳು ಪತ್ತೆ ಸಿಕ್ಕಿರಲಿಲ್ಲ. ನಂತರ ಇದೇ ಗುಪ್ತಚರ ಆಧಾರದ ಮೇಲೆ ಎರಡನೇ ಪ್ರಯಾಣಿಕನನ್ನು ಗುರುತಿಸಲಾಗಿತ್ತು. ಆತ ಅನುಮಾನಾಸ್ಪದವಾಗಿ ವರ್ತಿಸುವುದನ್ನು ಗಮನಿಸಿ ಹಿಡಿದುಕೊಳ್ಳಲಾಗಿತ್ತು.
ಇದರ ನಡುವೆ ಸಾಕಷ್ಟು ಕಣ್ಗಾವಲಿನ ಮಧ್ಯೆ ಸಿಕ್ಕಿಬೀಳುವ ಭಯದಿಂದ ಎಂಟ್ರಿ ಹಾಲ್‌ನಲ್ಲಿ ಚಾಲಾಕಿ ಮಹಿಳೆ ತನ್ನ ಲಗೇಜ್‌ಗಳನ್ನು ಬಿಟ್ಟಿದ್ದಳು. ಆಗ ಕಸ್ಟಮ್ಸ್ ಅಧಿಕಾರಿಗಳು ಈ ಬ್ಯಾಗ್ ಪತ್ತೆ ಹಚ್ಚಿದರು. ಈ ಬ್ಯಾಗ್ ತಪಾಸಣೆ ಮಾಡಿದಾಗ 265 ಚಿನ್ನ ಸರಗಳು ದೊರೆತಿದ್ದವು. ಕೂಡಲೇ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದಾಗ ಬ್ಯಾಗ್ ಬಿಟ್ಟು ಹೋಗಿದ್ದು, ಇದೇ ಮಹಿಳೆ ಎಂಬುದು ಖಚಿತವಾಗಿತ್ತು.
