ಟೋಕಿಯೊ: ಜಪಾನ್‌ನ ಮಿಲಿಟರಿ ನೆಲೆಗಳ ಸುತ್ತಲಿನ 700 ಕ್ಕೂ ಹೆಚ್ಚು ಪ್ರದೇಶಗಳಲ್ಲಿ ಚೀನೀ ಅನುದಾನಿತ ಜಮೀನುಗಳ ವ್ಯವಹಾರಗಳು ಪತ್ತೆಯಾಗಿವೆ ಎಂಬ ಬಗ್ಗೆ ಜಪಾನಿನ ತನಿಖಾ ಗುಂಪು ಪತ್ತೆ ಮಾಡಿದೆ ಎಂದು ಅಲ್ಲಿನ ಸ್ಥಳೀಯ ಪತ್ರಿಕೆ ವರದಿ ಮಾಡಿದೆ.
ಈ ಹೂಡಿಕೆಗಳು ಮತ್ತು ಖರೀದಿ ಯೋಜನೆಗಳನ್ನು ಚೀನಾದ ನೇತೃತ್ವದ ವಿದೇಶಿ ನಿಗಮಗಳು ನಡೆಸುತ್ತಿದ್ದು, ಜಪಾನ್‌ನ ಸುರಕ್ಷತೆಗೆ ಅಪಾಯವನ್ನುಂಟುಮಾಡಬಹುದು ಎಂದು ವರದಿ ಮಾಡಿದೆ. ಮಿಲಿಟರಿ ಸ್ಥಾಪನೆಗಳ ಸುತ್ತಮುತ್ತಲಿನ ಭೂಮಿಯ ಆಸ್ತಿ ಹಕ್ಕುಗಳ ಬಗ್ಗೆ ಕಳೆದ ವರ್ಷ ಸಮಗ್ರ ತನಿಖೆ ನಡೆಸಿದ ನಂತರ ಜಪಾನಿನ ಅಧಿಕಾರಿಗಳು ಈ ಮಾಹಿತಿಯನ್ನು ಕಲೆ ಹಾಕಿದ್ದಾರೆ.
ಇತ್ತೀಚಿನ ವರ್ಷಗಳಲ್ಲಿ ಜಪಾನಿನ ದ್ವೀಪಗಳಲ್ಲಿ ಸೈಟ್ಗಳನ್ನು ಖರೀದಿಸಲು ಚೀನಾ ಮುಂದಾಗುತ್ತಿದೆ ಎಂಬ ವದಂತಿಗಳು ಹೆಚ್ಚಾದ ನಂತರ ಈ ವಿವಾದ ಉದ್ಭವಿಸಿದೆ ಎಂದು ವರದಿ ಮಾಡಿದೆ.
ಸ್ವಾಧೀನಗೊಂಡ ಪ್ರದೇಶಗಳನ್ನು ಅಧಿಕಾರಿಗಳು ಪರಿಶೀಲಿಸಿದ್ದಾರೆ. ಹಾಗೆ ಈ ತಾಣಗಳು ಜಪಾನ್ ಸ್ವರಕ್ಷಣಾ ಪಡೆಗಳು, ಯುನೈಟೆಡ್ ಸ್ಟೇಟ್ಸ್ ಆರ್ಮಿ ಜಪಾನ್‌ನ ಮಿಲಿಟರಿ ನೆಲೆ, ಜಪಾನ್‌ನ ಕರಾವಳಿ ಕಾವಲು ಪಡೆ, ಮತ್ತು ಬಾಹ್ಯಾಕಾಶ ಅಭಿವೃದ್ಧಿಯ ಸುತ್ತಮಿತ್ತಲಿನ ಪ್ರದೇಶಗಳಾಗಿದ್ದು, ಚೀನಾದ ಸದ್ದಿಲ್ಲದ ಭೂ ಸ್ವಾಧೀನವನ್ನ ಕಂಡುಹಿಡಿಯಲಾಗಿದೆ ಎಂದು ತಿಳಿದು ಬಂದಿದೆ.
ಈ ತಾಣಗಳಿಂದ ಜಪಾನೀಸ್ ಮತ್ತು ಅಮೇರಿಕನ್ ವಿಮಾನವಾಹಕ ನೌಕೆಗಳು, ವಿಮಾನಗಳು ಮತ್ತು ಸಿಬ್ಬಂದಿಗಳ ಚಟುವಟಿಕೆಗಳ ಬಗ್ಗೆ ತಿಳಿದುಕೊಳ್ಳಬಹುದಾಗಿದೆ. ಹಾಗೆ ಕನಗಾವಾ ಪ್ರಾಂತ್ಯದ ಅಮೆರಿಕ ಮಿಲಿಟರಿ ನೆಲೆಗೆ ಹತ್ತಿರವಿರುವ ಒಂದು ಜಾಗವನ್ನು ಖರೀದಿಸಿದ ಖರೀದಿದಾರರಲ್ಲಿ ಒಬ್ಬರು ಬೀಜಿಂಗ್ ಸರ್ಕಾರಕ್ಕೆ ಸೇರಿದವರು ಎಂದು ಶಂಕಿಸಲಾಗಿದೆ.
ಈ ಖರೀದಿದಾರನು ಹತ್ತಿರದ ಹಲವಾರು ಎತ್ತರದ ಕಟ್ಟಡಗಳನ್ನು ಸಹ ಹೊಂದಿದ್ದಾನೆ. ಓಕಿನಾವಾ ದ್ವೀಪದಲ್ಲಿನ ಅಮೆರಿಕನ್ ನೆಲೆಯ ಸುತ್ತಲಿನ ಇತರ ವಹಿವಾಟು ಯೋಜನೆಗಳು ಮತ್ತು ಟೊಟೊರಿ ಪ್ರಾಂತ್ಯದ ಜಪಾನಿನ ರಕ್ಷಣಾ ಆವರಣಗಳನ್ನೂ ವರದಿಯಲ್ಲಿ ಉಲ್ಲೇಖಿಸಲಾಗಿದ್ದು, ಚೀನಾದ ಹೂಡಿಕೆದಾರರು ಈ ಪ್ರದೇಶಗಳನ್ನು ಗುರಿಯಾಗಿಸಿಕೊಂಡಿದ್ದಾರೆ ಎಂದು ಹೇಳಿದೆ.
