ಕಛ್ (ಗುಜರಾತ್) : ಕಳೆದ 10 ದಿನಗಳಲ್ಲಿ ಕಛ್‌ನ ಸಮುದ್ರ ಗಡಿಯಲ್ಲಿ ಆರು ಬಾರಿ ಚರಸ್ ಪ್ಯಾಕೆಟ್‌ಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಜಖೌ ಕರಾವಳಿ ಪ್ರದೇಶದಲ್ಲಿ ಬಿಎಸ್‌ಎಫ್‌ನ ವಿಶೇಷ ಶೋಧ ದಳ ಮತ್ತು ಎನ್‌ಐಯು ತಂಡದಿಂದ ತೀವ್ರ ಶೋಧ ಕಾರ್ಯಾಚರಣೆ ನಡೆಸಲಾಯಿತು. ಅದರಲ್ಲಿ ಭಾನುವಾರ 10 ಪ್ಯಾಕೆಟ್ ಚರಸ್ ಪತ್ತೆಯಾಗಿದೆ. ಚರಸ್ ಪ್ಯಾಕೆಟ್ ಅನ್ನು ಪ್ಲಾಸ್ಟಿಕ್ ಪದರದಿಂದ ಸುತ್ತಲಾಗಿತ್ತು. ಚರಸ್ ಪ್ಯಾಕೆಟ್ ಮೇಲೆ 'ಆಫ್ಘಾನ್ ಪ್ರಾಡಕ್ಟ್' ಎಂದು ಮುದ್ರಿಸಲಾಗಿದೆ. ಬಿಎಸ್‌ಎಫ್‌ನಿಂದ ಚರಸ್‌ನನ್ನು ಮತ್ತಷ್ಟು ಪರೀಕ್ಷಿಸಲಾಗುತ್ತಿದೆ.
12 ಏಪ್ರಿಲ್ 2023 ರ ನಂತರ ಪ್ರಾರಂಭವಾದ ಶೋಧ ಕಾರ್ಯಾಚರಣೆಯಿಂದ ಇದು ಆರನೇ ಬಾರಿ ವಶಕ್ಕೆ ಪಡೆಯಲಾದ ಮಾದಕ ವಸ್ತು ಆಗಿದೆ. ಈವರೆಗೆ 27 ಪ್ಯಾಕೆಟ್‌ಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಕಳೆದ 10 ದಿನಗಳಲ್ಲಿ ಜಖೌ ಬೀಚ್‌ನಿಂದ ಒಟ್ಟು 27 ಪ್ಯಾಕೆಟ್‌ಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಚರಸ್ ಪ್ಯಾಕೆಟ್‌ಗಳನ್ನು ಪಡೆದ ನಂತರ ಬಿಎಸ್ಎಫ್ ಜಖೌ ಕರಾವಳಿಯ ವಿವಿಧ ಸ್ಥಳಗಳನ್ನು ಹುಡುಕಲು ಬೃಹತ್ ಕಾರ್ಯಾಚರಣೆಯನ್ನು ಪ್ರಾರಂಭಿಸಿದೆ. ಚರಸ್ ಪ್ಯಾಕೆಟ್‌ಗಳು ಆಳ ಸಮುದ್ರದ ಅಲೆಗಳಿಗೆ ಕೊಚ್ಚಿಹೋಗಿ ಭಾರತದ ಕಡಲ ಗಡಿಯಲ್ಲಿ ಬಂದಿವೆ.
ಈ ಹಿಂದೆ ಬಿಎಸ್ಎಫ್, ಗುಜರಾತ್ ಪೊಲೀಸ್, ಕೋಸ್ಟ್ ಗಾರ್ಡ್, ಕಸ್ಟಮ್ಸ್ ಕಚ್ ಬಂದರು ಮತ್ತು ಕ್ರೀಕ್ ಪ್ರದೇಶದಲ್ಲಿ ಇದೇ ರೀತಿಯ ಚರಸ್ ಪ್ಯಾಕೆಟ್‌ಗಳನ್ನು ವಶಪಡಿಸಿಕೊಂಡಿವೆ. BSF ಮತ್ತು ಎಲ್ಲಾ ಇತರ ಏಜೆನ್ಸಿಗಳು 20 ಮೇ 2020 ರಿಂದ 1565 ಚರಸ್ ಪ್ಯಾಕೆಟ್‌ಗಳನ್ನು ವಶಪಡಿಸಿಕೊಂಡಿವೆ.
2 ಕೆಜಿ ಚರಸ್ ಸಾಗಿಸುತ್ತಿದ್ದ ರಷ್ಯಾ ಮಹಿಳೆಯ ಬಂಧನ: ಇನ್ನೊಂದೆಡೆ ಹಿಮಾಚಲ ಪ್ರದೇಶದ ಮಂಡಿ ಜಿಲ್ಲೆಯಲ್ಲಿ (ಅಕ್ಟೋಬರ್ 31-2022) ರಂದು 2 ಮಾದಕ ವಸ್ತು ಸಾಗಾಟ ಪ್ರಕರಣಗಳು ವರದಿಯಾಗಿದ್ದವು. ಮೊದಲ ಪ್ರಕರಣದಲ್ಲಿ ಆಟಿ ಪೊಲೀಸ್ ಠಾಣೆಯ ತಂಡ ಭಾರಿ ಪ್ರಮಾಣದ ಚರಸ್ ಸಾಗಿಸುತ್ತಿದ್ದ ರಷ್ಯಾ ಮೂಲದ ಮಹಿಳೆಯನ್ನು ಮಂಡಿಯಲ್ಲಿ ಬಂಧಿಸಿದ್ದರು. ಎರಡನೇ ಪ್ರಕರಣದಲ್ಲಿ ಧನೋಟು ಪೊಲೀಸ್ ಠಾಣೆಯ ತಂಡ ಚರಸ್ ಸಹಿತ ಯುವಕನೊಬ್ಬನನ್ನು ಬಂಧಿಸಿತ್ತು.
ಆಟಿ ಠಾಣೆ ಪೊಲೀಸರ ತಂಡ ಆಟಿ ಬಳಿ ವಾಹನಗಳನ್ನು ಪರಿಶೀಲನೆ ಮಾಡತೊಡಗಿತ್ತು. ಈ ವೇಳೆ ವೇಳೆ ರಷ್ಯಾದ ಮಹಿಳೆಯಿಂದ 2 ಕೆಜಿ 412 ಗ್ರಾಂ ಚರಸ್ ವಶಪಡಿಸಿಕೊಂಡಿತ್ತು. ಚರಸ್‌ನೊಂದಿಗೆ ಸಿಕ್ಕಿಬಿದ್ದ ಮಹಿಳೆಯನ್ನು ರಷ್ಯಾದ ಮಾಸ್ಕೋ ನಿವಾಸಿ ಓಲ್ಗಾ ಬ್ರಶ್ಕೋವಾ (49 ವರ್ಷ) ಎಂದು ಗುರುತಿಸಲಾಗಿತ್ತು. ಪೊಲೀಸರು ಮಹಿಳೆಯನ್ನು ಬಂಧಿಸಿ ತನಿಖೆ ಮುಂದುವರಿಸಿದ್ದರು.
ಮತ್ತೊಂದು ಪ್ರಕರಣದಲ್ಲಿ ಮಂಡಿ ಜಿಲ್ಲೆಯ ವ್ಯಾಪ್ತಿಗೆ ಬರುವ ಧನೋಟು ಪೊಲೀಸ್ ಠಾಣೆಯ ತಂಡ ಜಿಂದ್ ಹರಿಯಾಣದಲ್ಲಿ ವಾಸಿಸುತ್ತಿದ್ದ ಯುವಕನನ್ನು 412 ಗ್ರಾಂ ಚರಸ್‌ನೊಂದಿಗೆ ಬಂಧಿಸಿತ್ತು. ಪೊಲೀಸರು ಯುವಕನನ್ನು ಬಂಧಿಸಿ ಎನ್‌ಡಿಪಿಎಸ್ ಕಾಯ್ದೆಯಡಿ ಪ್ರಕರಣ ದಾಖಲಿಸಿಕೊಂಡು ಮುಂದಿನ ತನಿಖೆ ಕೈಗೊಂಡಿದ್ದರು. ಮಂಡಿ ಎಸ್ಪಿ ಶಾಲಿನಿ ಅಗ್ನಿಹೋತ್ರಿ ಎರಡೂ ಪ್ರಕರಣಗಳನ್ನು ಖಚಿತಪಡಿಸಿದ್ದರು.
ಇದನ್ನೂ ಓದಿ: 2 ಕೆಜಿ ಚರಸ್ ಸಾಗಿಸುತ್ತಿದ್ದ ರಷ್ಯಾ ಮಹಿಳೆಯ ಬಂಧನ
