ಮುಂಬೈ: ಇಲ್ಲಿನ ಬೈಕುಲ್ಲಾದಲ್ಲಿರುವ ಸರ್ಕಾರಿ ಜೆಜೆ ಆಸ್ಪತ್ರೆಯಲ್ಲಿ 132 ವರ್ಷ ಹಳೆಯ ಸುರಂಗ ಪತ್ತೆಯಾಗಿದೆ. ಬ್ರಿಟಿಷರ ಕಾಲದಲ್ಲಿ ನಿರ್ಮಿಸಲಾದ, 200 - ಮೀಟರ್ ಉದ್ದದ ಸುರಂಗವು ಹಿಂದಿನ ವೈದ್ಯಕೀಯ ವಾರ್ಡ್‌ನ ಕಟ್ಟಡದ ಅಡಿ ಕಂಡುಬಂದಿದೆ. ಅದನ್ನು ಈಗ ನರ್ಸಿಂಗ್ ಕಾಲೇಜಾಗಿ ಪರಿವರ್ತಿಸಲಾಗುತ್ತಿದೆ. ಜೆಜೆ ಆಸ್ಪತ್ರೆಯ ಸುರಂಗದ ಅಡಿಪಾಯವನ್ನು 1890 ರಲ್ಲಿ ನಿರ್ಮಿಸಲಾಗಿದೆ ಎಂಬುದು ತಿಳಿದುಬಂದಿದೆ.
"ನೀರು ಸೋರಿಕೆಯ [ಎ] ದೂರಿನ ನಂತರ ನಾವು ನರ್ಸಿಂಗ್ ಕಾಲೇಜು ಕಟ್ಟಡವನ್ನು ಪರಿಶೀಲಿಸಿದ್ದೇವೆ. PWD ಇಂಜಿನಿಯರ್‌ಗಳು ಮತ್ತು ಭದ್ರತಾ ಸಿಬ್ಬಂದಿ ಕಟ್ಟಡವನ್ನು ಸಮೀಕ್ಷೆ ಮಾಡಿದರು ಮತ್ತು ಅಡಿಪಾಯದ ಕಲ್ಲಿನ ಮೇಲೆ 1890 ಅನ್ನು ನಮೂದಿಸಿರುವುದು ಕಂಡುಬಂದಿದೆ" ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
"ಕೆಲವು ಸಿಬ್ಬಂದಿ ನೆಲಮಾಳಿಗೆಯಿರಬಹುದು ಎಂದು ನಮಗೆ ಹೇಳಿದರು. ನಂತರ ನಾವು ಹೆಚ್ಚಿನ ತಪಾಸಣೆ ನಡೆಸಿ ಸುರಂಗವನ್ನು ಪತ್ತೆಹಚ್ಚಿದ್ದೇವೆ" ಎಂದು ಅವರು ವಿವರಿಸಿದರು. ಮುಂಬೈನ ಜೆಜೆ ಆಸ್ಪತ್ರೆ ಮತ್ತು ಗ್ರಾಂಟ್ ಮೆಡಿಕಲ್ ಕಾಲೇಜಿನ ಆವರಣದಲ್ಲಿ ನರ್ಸಿಂಗ್ ಕಾಂಪ್ಲೆಕ್ಸ್ ಇದೆ.
ಜೆಜೆ ಆಸ್ಪತ್ರೆ ಕಟ್ಟಡಗಳನ್ನು 177 ವರ್ಷಗಳ ಹಿಂದೆ ನಿರ್ಮಿಸಲಾಗಿದೆ. ಈ ಕಟ್ಟಡಗಳನ್ನು ಸರ್ ಜಮ್ಶೆಡ್ಜಿ ಜಿಜಿಭೋಯ್ ಮತ್ತು ಸರ್ ರಾಬರ್ಟ್ ಗ್ರಾಂಟ್ ಅವರ ಸಹಯೋಗದೊಂದಿಗೆ ನಿರ್ಮಿಸಲಾಗಿದೆ. ಮಾರ್ಚ್ 16, 1838 ರಂದು, ಜಮ್ಶೆಡ್ಜಿ ಜಿಜಿಭೋಯ್ ಈ ವಾಸ್ತು ನಿರ್ಮಾಣಕ್ಕಾಗಿ ಒಂದು ಲಕ್ಷ ರೂಪಾಯಿಗಳನ್ನು ದೇಣಿಗೆ ನೀಡಿದರು ಎಂಬುದು ತಿಳಿದುಬಂದಿದೆ.
ಮುಂಬೈನಲ್ಲಿ ಇಂತಹ ಸುರಂಗಮಾರ್ಗ ಪತ್ತೆಯಾಗಿರುವುದು ಇದೇ ಮೊದಲಲ್ಲ. ಈ ಹಿಂದೆ ನಗರದ ಕೆಲವು ಭಾಗಗಳಲ್ಲಿ ಸುರಂಗಮಾರ್ಗಗಳು ಮತ್ತು ಸುರಂಗಗಳು ಕಂಡುಬಂದಿವೆ. ಈ ಭೂ ಒತ್ತುವರಿ ಕುರಿತು ಮುಂಬೈನ ಜಿಲ್ಲಾಧಿಕಾರಿಗೆ ಮಾಹಿತಿ ನೀಡಲಾಗಿದ್ದು, ಹೆಚ್ಚಿನ ಮಾಹಿತಿ ಪಡೆಯುವ ಕಾರ್ಯ ನಡೆಯುತ್ತಿದೆ.
