ಖಾಗರಿಯಾ (ಬಿಹಾರ): ವರ ತೊದಲುವುದು ಕಂಡು ವಧು ಮದುವೆಯನ್ನೇ ನಿಲ್ಲಿಸಿರುವ ಘಟನೆ ಜಿಲ್ಲೆಯ ರಹಿಮ್ಪುರ್ ಎಂಬ ಗ್ರಾಮದಲ್ಲಿ ಬುಧವಾರ ನಡೆದಿದೆ. ಮದುವೆಯ ಹಿಂದಿನ ದಿನ ವಧು ವರರ ಮಾಲೆ ಬದಲಾವಣೆ ಕಾರ್ಯಕ್ರಮ ಏರ್ಪಡಿಸಲಾಗಿತ್ತು. ಅದರಂತೆ ವರನ ಕಡೆಯ ಕುಟುಂಬದವರು ಅದ್ಧೂರಿಯಾಗಿ ಮೆರವಣಿಗೆ ಮೂಲಕ ವರನನ್ನು ಕಲ್ಯಾಣ ಮಂಟಪಕ್ಕೆ ಕರೆತಂದಿದ್ದರು. ಬಳಿಕ ಸಂಪ್ರದಾಯದಂತೆ ಹೂ ಮಾಲೆ ಬದಲಾವಣೆ ಕಾರ್ಯಕ್ರಮಕ್ಕೆ ವಧು ವರರನ್ನು ವೇದಿಕೆಗೆ ಎರಡು ಕುಟುಂಬದವರು ಕರೆ ತಂದಿದ್ದಾರೆ.
ವೇದಿಕೆಗೆ ಬಂದಂತಹ ಜೋಡಿಗಳು ಹೂ ಮಾಲೆ ಬದಲಾವಣೆಗೆ ಸಿದ್ದರಾಗಿದ್ದರು, ಈ ವೇಳೆ, ವರ ತನ್ನ ಸಹೋದರನೊಂದಿಗೆ ಮಾತನಾಡುತ್ತಿರುವುದನ್ನ ವಧು ಗಮನಿಸಿದ್ದು, ವರ ಮಾತನಾಡುವಾಗ ತೊದಲುವುದು ಕಂಡು ಬಂದಿದೆ. ಬಳಿಕ ಹೂ ಮಾಲೆ ಬದಲಾವಣೆ ಕಾರ್ಯಕ್ರಮ ಮುಗಿದಿದೆ. ನಂತರ ಎರಡು ಕುಟುಂಬಗಳು ಮುಂದಿನ ಕಾರ್ಯಕ್ರಮಕ್ಕೆ ಮುಂದಾದಾಗ ಮೌನ ಮುರಿದ ವಧು, ವರನಿಗೆ ಮಾತನಾಡಲು ಹೇಳಿದ್ದಾಳೆ. ಈ ವೇಳೆ ಮತ್ತೆ ವರ ತೊದಲುವುದು ಕಂಡು ಬಂದಿದೆ.
ಇದರಿಂದ ಕೋಪಗೊಂಡ ವಧು ಮದುವೆ ಬೇಡವೆಂದು ಹೇಳಿದ್ದಾಳೆ. ಅಲ್ಲದೇ ವರನ ಕಡೆಯವರು ಈ ವಿಷಯವನ್ನು ತಿಳಿಸದೇ ನಮಗೆ ಮೋಸ ಮಾಡಿದ್ದಾರೆ ಎಂದು ಕಣ್ಣೀರು ಹಾಕಿದ್ದಾಳೆ. ಇದರಿಂದ ಕೋಪಗೊಂಡ ಗ್ರಾಮಸ್ಥರು ವರನ ಕುಟುಂಬದವರನ್ನು ಇಡೀ ರಾತ್ರಿ ಮಂಟಪದಲ್ಲೇ ಕೂಡಿ ಹಾಕಿದ್ದಾರೆ.
ಬಳಿಕ ವರನ ಕುಟುಂಬದವರು ಪೊಲೀಸ್ರಿಗೆ ವಿಷಯವನ್ನು ತಿಳಿಸಿದ್ದಾರೆ. ಬೆಳಗ್ಗೆ ಘಟನಾ ಸ್ಥಳಕ್ಕೆ ಬಂದ ಪೊಲೀಸರು ವರನ ಕುಟುಂಬವನ್ನು ಕಲ್ಯಾಣ ಮಂಟಪದಿಂದ ಬಿಡಿಸಿದ್ದಾರೆ.
ಇದನ್ನೂ ಓದಿ: ಆಹ್ವಾನವಿಲ್ಲದೇ ಮದುವೆ ಊಟಕ್ಕೆ ಬಂದ ಹುಡುಗ.. ನೀನು ತಿಂದು, ಸ್ನೇಹಿತರಿಗೂ ಕೊಂಡು ಹೋಗು ಎಂದ ವರ
