ಜೋಧಪುರ್(ರಾಜಸ್ಥಾನ): ಇಲ್ಲಿನ ಸರ್ಕ್ಯೂಟ್ ಹೌಸ್ ರಸ್ತೆಯಲ್ಲಿರುವ ಅಪಾರ್ಟ್ಮೆಂಟ್ನಲ್ಲಿ ಹೃದಯ ವಿದ್ರಾವಕ ಘಟನೆ ನಡೆದಿದೆ. ಹಣಕಾಸಿನ ತೊಂದರೆಯಿಂದಾಗಿ ಒಂದೇ ಕುಟುಂಬದ ನಾಲ್ವರು ಆತ್ಮಹತ್ಯೆಗೆ ಶರಣಾಗಿದ್ದಾರೆ. ಇದರಲ್ಲಿ ಇಬ್ಬರು ಹೆಣ್ಣು ಮಕ್ಕಳು ಸೇರಿಕೊಂಡಿವೆ.
ಶುಕ್ರವಾರ ಈ ಘಟನೆ ನಡೆದಿದೆ. ನಾಲ್ವರ ಮೃತದೇಹಗಳನ್ನ ಮರಣೋತ್ತರ ಪರೀಕ್ಷೆ ನಂತರ ಸಂಬಂಧಿಕರಿಗೆ ಹಸ್ತಾಂತರ ಮಾಡಲಾಗಿದೆ. ಮೃತರನ್ನ ದೀನದಯಾಳ್, ಪತ್ನಿ ಸರೋಜ್ ಹಾಗೂ ಪುತ್ರಿಯರಾದ ತನ್ವಿ, ಹೀರಾಲ್ ಎಂದು ಗುರುತಿಸಲಾಗಿದೆ. ಬಟ್ಟೆ ವ್ಯಾಪಾರ ನಡೆಸುತ್ತಿದ್ದ ದೀನದಯಾಳ್ ಹಣಕಾಸಿನ ತೊಂದರೆಗೊಳಗಾಗಿದ್ದರು ಎನ್ನಲಾಗಿದೆ. ಜೊತೆಗೆ 25 ಲಕ್ಷ ರೂ. ಸಾಲ ಮಾಡಿಕೊಂಡಿದ್ದರಂತೆ.
ಕೋವಿಡ್ನಿಂದಾಗಿ ಮತ್ತಷ್ಟು ಆರ್ಥಿಕ ಸಂಕಷ್ಟಕ್ಕೊಳಗಾಗಿದ್ದ ಕುಟುಂಬ ನಾಲ್ಕು ದಿನಗಳ ಹಿಂದೆ ಕಿರಿಯ ಮಗಳ ಹುಟ್ಟುಹಬ್ಬ ಸಹ ಆಚರಣೆ ಮಾಡಲು ಆಗಿರಲಿಲ್ವಂತೆ. ಮೇಲಿಂದ ಮೇಲೆ ಪತ್ನಿ ಅನಾರೋಗ್ಯಕ್ಕೀಡಾಗುತ್ತಿದ್ದ ಕಾರಣ ಮತ್ತಷ್ಟು ಸಮಸ್ಯೆಗೊಳಗಾಗಿದ್ದರು ಎನ್ನಲಾಗಿದೆ.
ಇದನ್ನೂ ಓದಿರಿ: ಅಧಿಕಾರವನ್ನ ಅಭಿವೃದ್ಧಿಗೆ ಹೇಗೆ ಬಳಸಿಕೊಳ್ಳಬೇಕೆಂಬುದನ್ನ ಗಡ್ಕರಿ ತೋರಿಸಿದ್ದಾರೆ.. ಶರದ್ ಪವಾರ್ ಗುಣಗಾನ
ಗುರುವಾರ ರಾತ್ರಿ ಆಹಾರ ಪದಾರ್ಥದಲ್ಲಿ ನಿದ್ರೆ ಮಾತ್ರೆ ಬೆರೆಸಿರುವ ದೀನ್ದಯಾಳ್ ಪತ್ನಿ ಸೇರಿ ಇಬ್ಬರು ಮಕ್ಕಳಿಗೆ ನೀಡಿದ್ದಾನೆ. ಅದರ ಸೇವನೆ ಮಾಡಿರುವ ಹೆಣ್ಣು ಮಕ್ಕಳು ಮೂರ್ಛೆ ಹೋಗುತ್ತಿದ್ದಂತೆ ಅವರ ಕತ್ತು ಹಿಸುಕಿ ಕೊಲೆ ಮಾಡಿದ್ದು, ತದ ನಂತರ ರೂಂನಲ್ಲಿ ನೇಣು ಬಿಗಿದಿದ್ದಾನೆ.
ಇದರ ಬೆನ್ನಲ್ಲೇ ಪತ್ನಿ ಸರೋಜ್ ಕತ್ತು ಹಿಸುಕಲು ಮುಂದಾದಾಗ ಪ್ರಜ್ಞೆ ಬಂದಿರುವ ಕಾರಣ ವಿರೋಧ ವ್ಯಕ್ತಪಡಿಸಿದ್ದಾಳೆ. ಆದರೆ, ಕತ್ತು ಹಿಸುಕಿ ಕೊಲೆ ಮಾಡುವಲ್ಲಿ ಯಶಸ್ವಿಯಾಗಿರುವ ಗಂಡ, ಆಕೆಯ ಮೃತದೇಹವನ್ನ ರೂಂನಲ್ಲಿ ನೇಣು ಹಾಕಿದ್ದಾನೆ.
ಕೊನೆಯದಾಗಿ ನೇಣು ಬಿಗಿದುಕೊಂಡಿರುವ ದೀನ್ದಯಾಳ್ ಕೂಡ ಆತ್ಮಹತ್ಯೆಗೆ ಶರಣಾಗಿದ್ದಾನೆ. ಈ ವೇಳೆ ಡೆತ್ನೋಟ್ ಬರೆದಿಟ್ಟಿರುವುದಾಗಿ ತಿಳಿದು ಬಂದಿದೆ. ಅದರಲ್ಲಿ ಸ್ವ-ಇಚ್ಛೆಯಿಂದ ಆತ್ಮಹತ್ಯೆಗೆ ಶರಣಾಗುತ್ತಿರುವುದಾಗಿ ತಿಳಿಸಿದ್ದಾನೆಂದು ಪೊಲೀಸರು ಹೇಳಿದ್ದಾರೆ.
