ನವದೆಹಲಿ: ದೇಶದಲ್ಲಿ ಲಾಕ್ಡೌನ್ ಕಾರಣದಿಂದ ಆದಾಯ ಕುಂಠಿತವಾಗಿದ್ದು, ವಿಸ್ತಾರಾ ಏರ್ಲೈನ್ಸ್ ಕಂಪನಿ ತನ್ನ ಉದ್ಯೋಗಿಗಳ ವೇತನದ ಶೇಕಡಾ 5ರಿಂದ ಶೇಕಡಾ 20ರಷ್ಟು ವೇತನ ಕಡಿತಗೊಳಿಸುವುದಾಗಿ ಘೋಷಣೆ ಮಾಡಿದೆ.
ಈ ವೇತನ ಕಡಿತ ಡಿಸೆಂಬರ್ವರೆಗೆ ಮುಂದುವರೆಯಲಿದ್ದು, ಕಂಪನಿ ಪರಿಗಣಿಸಿರುವ ಸುಮಾರು 4 ಸಾವಿರ ಉದ್ಯೋಗಿಗಳ ವೇತನದ ಮೇಲೆ ಇದು ಪರಿಣಾಮ ಬೀರಲಿದೆ ಎನ್ನಲಾಗಿದೆ. ಇದಕ್ಕೆ ಪ್ರತಿಕ್ರಿಯ ನೀಡಿರುವ ವಿಸ್ತಾರಾ ಏರ್ಲೈನ್ಸ್ ವಕ್ತಾರ ವೇತನ ಕಡಿತ ಶೇಕಡಾ 60ರಷ್ಟು ಉದ್ಯೋಗಿಗಳಿಗೆ ಅನ್ವಯವಾಗುವುದಿಲ್ಲ ಎಂದು ಸ್ಪಷ್ಟನೆ ನೀಡಿದ್ದಾರೆ.
ವಿಸ್ತಾರಾ ಕಾರ್ಯನಿರ್ವಹಣಾಧಿಕಾರಿ ಲೆಸ್ಲಿ ಥಂಗ್ ನೌಕರರಿಗೆ ಇಮೇಲ್ ಸಂದೇಶ ಕಳಿಸಿದ್ದು, ಜುಲೈ ಒಂದನೇ ತಾರೀಖಿನಿಂದ ಡಿಸೆಂಬರ್ 31ರವರೆಗೆ ಉದ್ಯೋಗಿಗಳ (ಪೈಲೆಟ್ಗಳನ್ನು ಹೊತರುಪಡಿಸಿ) ಶೇಕಡಾ 20ರಷ್ಟು ವೇತನ ಕಡಿತ ಮಾಡುತ್ತಿದ್ದೇವೆ. ನಾಲ್ಕು ಮತ್ತು ಐದನೇ ಹಂತದ ಸಿಬ್ಬಂದಿಗೆ ಶೇಕಡಾ 15ರಷ್ಟು, ಮೂರನೇ ಹಾಗೂ ಎರಡನೇ ಹಂತದ ಮತ್ತು 1ಸಿ ಹಂತದ ಲೈಸೆನ್ಸ್ ಇರುವ ಇಂಜಿನಿಯರ್ಗಳ ವೇತನದ ಶೇಕಡಾ 10ರಷ್ಟು ಹಾಗೂ 1ನೇ ಹಂತದ ಉದ್ಯೋಗಿಗಳ, ಅದರಲ್ಲೂ 50 ಸಾವಿರ ಹಾಗೂ ಅದಕ್ಕೂ ಹೆಚ್ಚು ವೇತನವಿರುವ ಉದ್ಯೋಗಿಗಳ ಶೇಕಡಾ 5ರಷ್ಟು ವೇತನ ಕಡಿತ ಮಾಡಲಾಗುವುದು ಎಂದು ಘೋಷಿಸಿದ್ದಾರೆ.
ಪೈಲೆಟ್ಗಳ ವಿಮಾನ ಹಾರಾಟ ಭತ್ಯೆಯನ್ನು ಮಾಸಿಕವಾಗಿ ಕಡಿತಗೊಳಿಸಲಾಗುತ್ತದೆ. ಜೊತೆಗೆ ತರಬೇತಿಯಲ್ಲಿರುವ ಪೈಲೆಟ್ಗಳಿಗೆ ಕೂಡಾ ಇದು ಅನ್ವಯಿಸುತ್ತದೆ ಎಂದು ವಿಸ್ತಾರಾ ಕಾರ್ಯನಿರ್ವಹಣಾಧಿಕಾರಿ ಲೆಸ್ಲಿ ಥಂಗ್ ಹೇಳಿದ್ದಾರೆ.
ಸದ್ಯಕ್ಕೆ ವಿಸ್ತಾರಾ ಏರ್ಲೈನ್ಸ್ ತನ್ನ ಹಾರಾಟ ಜಾಲದ ಶೇಕಡಾ 30ರಷ್ಟು ಪ್ರದೇಶಗಳಲ್ಲಿ ಮಾತ್ರ ಕಾರ್ಯಾಚರಣೆ ನಡೆಸುತ್ತಿದೆ. ಕೊರೊನಾ ಹಾಗೂ ಲಾಕ್ಡೌನ್ ಕಾರಣಕ್ಕೆ ಪ್ರಯಾಣಿಕರ ಸಂಖ್ಯೆಯೂ ಇಳಿಮುಖವಾಗಿರುವ ಕಾರಣದಿಂದ ಈ ವಿಮಾನಯಾನ ಸಂಸ್ಥೆ ಸಂಕಷ್ಟಕ್ಕೆ ಸಿಲುಕಿದೆ. ಜೊತೆಗೆ ಎಲ್ಲಾ ಉದ್ಯೋಗಿಗಳನ್ನು ಉಳಿಸಿಕೊಳ್ಳುವ ಸವಾಲು ಹೊಂದಿದ್ದು, ವೆಚ್ಚ ಕಡಿತಕ್ಕೂ ಅನೇಕ ಕ್ರಮಗಳನ್ನು ಕೈಗೊಂಡಿದೆ.
