ಮಗು ಅಪಹರಿಸಲು ಯತ್ನಿಸಿದ ಚಿಕ್ಕಪ್ಪ: ಧೈರ್ಯ ತೋರಿಸಿದ ಸ್ಥಳೀಯರು! ವಿಡಿಯೋ

ಹಣದಾಸೆಗೆ ಸ್ವಂತ ಸಹೋದರನ ಮಗುವನ್ನೇ ಕಿಡ್ನಾಪ್​ ಮಾಡಲು ಯತ್ನಿಸಿದ ವ್ಯಕ್ತಿಯೊಬ್ಬ ಸಿಕ್ಕಿಬಿದ್ದಿರುವ ಘಟನೆ ರಾಷ್ಟ್ರ ರಾಜಧಾನಿ ನವದೆಹಲಿಯಲ್ಲಿ ನಡೆದಿದೆ.

ನವದೆಹಲಿ: ಸ್ವಂತ ಸಹೋದರನ ಮಗುವನ್ನೇ ಅಪಹರಿಸಲು ಯತ್ನಿಸಿದ ಚಿಕ್ಕಪ್ಪನೊಬ್ಬ ಪೊಲೀಸರ ಕೈಗೆ ಸಿಕ್ಕಿಬಿದ್ದಿರುವ ಘಟನೆ ಇಲ್ಲಿನ ಶಿಕಾರ್​ಪುರ್​ನಲ್ಲಿ ನಡೆದಿದೆ.

ಘಟನೆ ವಿವರ:

ಹಣದಾಸೆಗೆ ಉಪೇಂದ್ರ ತನ್ನ ಸ್ನೇಹಿತ ಧೀರಜ್​ ಜೊತೆಗೂಡಿ ಸಹೋದರನ ಮಗುವನ್ನು ಅಪಹರಿಸಲು ಯೋಜನೆ ರೂಪಿಸಿದ್ದ. ಅದರಂತೆ ಮಂಗಳವಾರ ಪಲ್ಸರ್​ ಬೈಕ್​ನಲ್ಲಿ ಸಹೋದರನ ಮನೆಗೆ ತೆರಳಿ ಮಗುವನ್ನು ಅಪಹರಿಸಲು ಯತ್ನಿಸಿದ್ದಾನೆ.

• ತಾಯಿಯ ಧೈರ್ಯ ಮೆಚ್ಚಲೇಬೇಕು...!

ತಾಯಿಯ ಕೈಯಿಂದ ನಾಲ್ಕು ವರ್ಷದ ಮಗುವನ್ನು ಅಪಹರಿಸಲು ಉಪೇಂದ್ರ ಯತ್ನಿಸಿದ್ದಾನೆ. ಈ ವೇಳೆ ಮಗುವಿನ ತಾಯಿ ಆರೋಪಿಗಳಿಬ್ಬರ ವಿರುದ್ಧ ಹೋರಾಡಿ ದಿಟ್ಟತನ ಮೆರೆದಿದ್ದಾರೆ. ಮಗುವನ್ನು ಆರೋಪಿಗಳಿಂದ ರಕ್ಷಿಸಿ ಬೈಕ್​ ಅನ್ನು ಬಿಗಿಯಾಗಿ ಹಿಡಿದಿದ್ದರು. ಆದ್ರೂ ಸಹ ಆರೋಪಿಗಳು ತಪ್ಪಿಸಿಕೊಂಡು ಮುಂದೆ ಸಾಗಿದರು.

• ಶೌರ್ಯ ಪ್ರದರ್ಶಿಸಿದ ಸ್ಥಳೀಯರು!

ಆರೋಪಿಗಳು ಬೈಕ್​ ಮೂಲಕ ತಪ್ಪಿಸಿಕೊಳ್ಳುತ್ತಿರುವಾಗ ಸ್ಥಳೀಯರು ಶೌರ್ಯ ಮೆರೆದಿದ್ದಾರೆ. ನಗರದ ನಿವಾಸಿಯೊಬ್ಬ ಆರೋಪಿಗಳ ಬೆನ್ನಟ್ಟಿ ಹಿಡಿಯಲು ಯತ್ನಿಸಿದ್ದರು. ಇನ್ನೊಬ್ಬ ನಿವಾಸಿ ಸ್ಕೂಟಿಯನ್ನು ಅಡ್ಡಗಟ್ಟಿ ದುಷ್ಕರ್ಮಿಗಳನ್ನು ಹಿಡಿಯಲು ಪ್ರಯತ್ನಿಸಿದ್ದನು. ಈ ವೇಳೆ ಪಲ್ಸರ್​ ಬೈಕ್​ ಸ್ಕಿಡ್​ ಆಗಿ ನೆಲಕ್ಕೆ ಬಿದ್ದಿದೆ. ದುಷ್ಕರ್ಮಿಗಳು ಬೈಕ್ ಅ​ನ್ನು ಅಲ್ಲೇ ಬಿಟ್ಟು ಪರಾರಿಯಾಗಿದ್ದಾರೆ.

• 24 ಗಂಟೆಯೊಳಗೆ ಆರೋಪಿಗಳು ಅಂದರ್​!

ಈ ಘಟನೆ ಕುರಿತು ಶಿಕಾರ್​ಪುರ್ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಕೂಡಲೇ ಕಾರ್ಯ ಪ್ರವೃತ್ತರಾದ ಪೊಲೀಸರು ಸ್ಥಳೀಯ ಸಿಸಿಟಿವಿ ದೃಶ್ಯವನ್ನು ಪರಿಶೀಲಿಸಿ ತನಿಖೆ ಕೈಗೊಂಡರು. 24 ಗಂಟೆಯೊಳಗೆ ಆರೋಪಿಗಳನ್ನು ಪತ್ತೆ ಹಚ್ಚಿ ಬಂಧಿಸುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ. ಬಂಧಿತ ಆರೋಪಿಗಳಿಂದ ಲೋಡೆಡ್​ ಗನ್​ ಮತ್ತು ಪಲ್ಸರ್​ ಬೈಕ್​ ವಶಕ್ಕೆ ಪಡೆದಿದ್ದಾರೆ. ಆರೋಪಿಗಳು ವಿಚಾರಣೆ ವೇಳೆ ಹಣದಾಸೆಗೆ ಈ ಕೃತ್ಯ ಎಸಗಿರುವುದಾಗಿ ತಪ್ಪೊಪ್ಪಿಕೊಂಡಿದ್ದಾರೆ ಎಂದು ಪೊಲೀಸ್​ ಅಧಿಕಾರಿ ತಿಳಿಸಿದ್ದಾರೆ.