ಹೈದರಾಬಾದ್: ಪರಿಸರದ ಮಹಾಶತ್ರು ಪ್ಲಾಸ್ಟಿಕ್ ವಿರುದ್ಧ 'ಪ್ಲಾಂಟ್ ಫಾರ್ ಪ್ಲಾಸ್ಟಿಕ್' ಎಂಬ ವಿಶಿಷ್ಟ ಕಾರ್ಯಕ್ರಮ ಮತ್ತು 'ಟಿಫಿನ್ ಬಾಕ್ಸ್ ಚಾಲೆಂಜ್' ಎಂಬ ಸವಾಲು ಆರಂಭಿಸಿದ್ದಾರೆ ಹೈದರಾಬಾದ್ನ ಸಾಫ್ಟ್ವೇರ್ ಇಂಜಿನಿಯರ್ ದೋಸಪಾಟಿ ರಾಮು. ಸದ್ಯಕ್ಕೆ ರಾಮು ಸೇವೆಗೆ ಎಲ್ಲೆಡೆ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
ಪರಿಸರಕ್ಕೆ ಮಾರಕವಾದ ಪ್ಲಾಸ್ಟಿಕ್ ಅನ್ನು ಬಳಸದಿರಲು ಮತ್ತು ನಿಷೇಧಿಸಲು ದೇಶಾದ್ಯಂತ ಜಾಗೃತಿ, ಅಭಿಯಾನಗಳು ಇಂದಿಗೂ ನಡೆಯುತ್ತಲೇ ಇವೆ. ಆದರೆ, ಕೆಲವರು ಎಲೆಮರಿಕಾಯಿಯಂತೆ ಸದ್ದಿಲ್ಲದೆ ಈ ಮಹಾಮಾರಿ ಪ್ಲಾಸ್ಟಿಕ್ ವಿರುದ್ಧ ಹೋರಾಡುತ್ತಾ, ಅದನ್ನು ಬಳಸದಂತೆ ಜಾಗೃತಿ ಮೂಡಿಸುತ್ತಿದ್ದಾರೆೆ. ಹೈದರಾಬಾದ್ನ ಸಾಫ್ಟ್ವೇರ್ ಇಂಜಿನಿಯರ್ ದೋಸಪಾಟಿ ರಾಮು ಈ ಕೆಲಸ ಮಾಡುತ್ತಿರುವ ವ್ಯಕ್ತಿ. ರಾಮು ಮಹಾಮಾರಿ ಪ್ಲಾಸ್ಟಿಕ್ ವಿರುದ್ಧ 'ಪ್ಲಾಂಟ್ ಫಾರ್ ಪ್ಲಾಸ್ಟಿಕ್' ಎಂಬ ವಿಶಿಷ್ಟ ಕಾರ್ಯಕ್ರಮವನ್ನು ಆರಂಭಿಸುವ ಮೂಲಕ ಗಮನ ಸೆಳೆದಿದ್ದಾರೆ. ಅಲ್ಲದೆ, 'ಟಿಫಿನ್ ಬಾಕ್ಸ್ ಚಾಲೆಂಜ್' ಎಂಬ ಸವಾಲನ್ನೂ ಕೈಗೆತ್ತಿಕೊಂಡಿದ್ದಾರೆ.
ಏಕ ಬಳಕೆ ಪ್ಲಾಸ್ಟಿಕ್‌ನಿಂದ ನಗರವನ್ನು ಮುಕ್ತವಾಗಿಸಬೇಕೆಂಬ ಪಣ ತೊಟ್ಟಿರುವ ರಾಮು ಅವರು, ಪರಿಸರ ರಕ್ಷಣೆಗೆ ಸಸಿ ವಿತರಿಸುತ್ತಿದ್ದಾರೆ. ಯಾವುದೇ ಸಣ್ಣ ಪ್ರಮಾಣದ ಪ್ಲಾಸ್ಟಿಕ್ ತರುವವರಿಗೆ ಮಾತ್ರ ಸಸಿ ನೀಡುತ್ತಿದ್ದಾರೆ. 'ಪ್ಲಾಂಟ್ ಫಾರ್ ಪ್ಲಾಸ್ಟಿಕ್' ಎಂಬ ಈ ಕಾರ್ಯಕ್ರಮಕ್ಕಾಗಿ ಪೂರ್ವ ಗೋದಾವರಿ ಕಡಿಯಾದಿಂದ ಸಾವಿರಾರು ಸಸ್ಯಗಳನ್ನು ಕೊಂಡುತಂದಿದ್ದಾರೆ. ಯಾವುದೇ ನಿರ್ದಿಷ್ಟ ಪ್ರಮಾಣದ ಪ್ಲಾಸ್ಟಿಕ್ ತರಬೇಕೆಂದು ನಿರ್ಧರಿಸಿಲ್ಲ. ಚಿಪ್ಸ್ ಪ್ಯಾಕೆಟ್ ತಂದರೂ ಸಹ ಅದಕ್ಕೆ ಪ್ರತಿಯಾಗಿ ಸಸಿಗಳನ್ನು ಒದಗಿಸುತ್ತಿದ್ದಾರೆ. ಸಂಗ್ರಹಿಸಿದ ಪ್ಲಾಸ್ಟಿಕ್ ಅನ್ನು ಮರುಬಳಕೆ ಮತ್ತು ಹೆಚ್ಚಿನ ಸಂಸ್ಕರಣೆಗಾಗಿ ಹೈದರಾಬಾದ್ ಮುನ್ಸಿಪಲ್ ಕಾರ್ಪೊರೇಷನ್(ಜಿಹೆಚ್‌ಎಂಸಿ)ಗೆ ಉಚಿತವಾಗಿ ತಲುಪಿಸುತ್ತಿದ್ದಾರೆ.
'ಮಾಂಸಕ್ಕೆ ಟಿಫಿನ್ ಬಾಕ್ಸ್ ಒಯ್ಯಿರಿ'
ರಾಮು ಅವರ ಮತ್ತೊಂದು ಸವಾಲು 'ಟಿಫಿನ್ ಬಾಕ್ಸ್ ಚಾಲೆಂಜ್'. ಮಾಂಸ ಖರೀದಿಸಲು ಕಪ್ಪು-ಬಿಳಿ ಬಣ್ಣದ ಪ್ಲಾಸ್ಟಿಕ್ ಕವರ್ಗಳನ್ನು ಜನ ತೆಗೆದುಕೊಂಡು ಹೋಗುತ್ತಾರೆ. ಇದರಿಂದಾಗಿ ವಿಶೇಷವಾಗಿ ಭಾನುವಾರ ಒಂದೇ ದಿನಕ್ಕೆ 20,000 ಪ್ಲಾಸ್ಟಿಕ್ ಕವರ್ಗಳು ಚರಂಡಿಗಳನ್ನು ಸೇರುತ್ತಿವೆ. ಇದನ್ನು ತಡೆಯಲು ಪ್ಲಾಸ್ಟಿಕ್ ಕವರ್ಗಳ ಬದಲಿಗೆ ಟಿಫಿನ್ ಬಾಕ್ಸ್ ಒಯ್ಯಬೇಕು. ಈ ಮೂಲಕ ಪ್ಲಾಸ್ಟಿಕ್ ಕವರ್ಗಳಲ್ಲಿ ಮಾಂಸ ಒಯ್ಯುವುದನ್ನು ತಪ್ಪಿಸಬಹುದು. ಇದರಿಂದ ಆರೋಗ್ಯದ ಮೇಲೆ ಪರಿಣಾಮ ಬೀರುವುದಿಲ್ಲ ಎಂದು ಸಲಹೆ ನೀಡ್ತಾರೆ ರಾಮು.
ಮಾಂಸ ತಿನ್ನುವುದನ್ನು ನಿಲ್ಲಿಸಿ ಎಂದು ಹೇಳುತ್ತಿಲ್ಲ. ಪರಿಸರ ಸಂರಕ್ಷಿಸುವ ಉದ್ದೇಶದಿಂದ ಹೀಗೆ ಹೇಳುತ್ತಿದ್ದೇನೆ. ಆರಂಭದಲ್ಲಿ ತಮ್ಮ ಸ್ನೇಹಿತರಿಗೆ ಈ ಸವಾಲು ಹಾಕಿದ್ದೆ. ಈಗ ಅವರಿಂದ ಉತ್ತಮ ಫಲಿತಾಂಶ ಬರುತ್ತಿದೆ ಎಂದು ಸಂತಸ ವ್ಯಕ್ತಪಡಿಸಿದರು.
ಮಾಂಸದ ಅಂಗಡಿ ಮಾಲೀಕರಲ್ಲಿ ಜಾಗೃತಿ ಮೂಡಿಸಲು ನಗರದ ಸ್ಥಳೀಯ ಮಾಂಸದ ಮಳಿಗೆಗಳಿಗೆ ಭೇಟಿ ನೀಡಿ ಈ ಸವಾಲು ಹಾಕುತ್ತಿದ್ದೇನೆ ಎಂದಿದ್ದಾರೆ. ಸದ್ಯಕ್ಕೆ ರಾಮು ಸೇವೆಗೆ ಎಲ್ಲೆಡೆ ಮೆಚ್ಚುಗೆ ವ್ಯಕ್ತವಾಗಿದ್ದು, ಸಾರ್ವಜನಿಕರು ಮನೆಯಲ್ಲಿರುವ ಪ್ಲಾಸ್ಟಿಕ್ ಕೊಟ್ಟು ಸಸಿ ಪಡೆಯುತ್ತಿದ್ದಾರೆ.
