ನವದೆಹಲಿ: ಭಾರತ ಮತ್ತು ಅಮೆರಿಕವು ಉತ್ತಮ ರಕ್ಷಣಾ ಪಾಲುದಾರಿಕೆ ಮತ್ತು ವ್ಯಾಪಾರ ಸಂಬಂಧವನ್ನು ಹೊಂದಿದ್ದು, ಇಂದು 142 ಬಿಲಿಯನ್ ಡಾಲರ್ ವಹಿವಾಟು ಹೊಂದಿದೆ. ಆದರೆ, ವಲಸೆ ಮತ್ತು ಪ್ರಸ್ತಾವಿತ ವ್ಯಾಪಾರ ಒಪ್ಪಂದಗಳು ಸೇರಿದಂತೆ ದೀರ್ಘಕಾಲದಿಂದಲೂ ವಿವಾದಗಳೂ ಇವೆ. ಕೆಲವು ವಿವಾದಗಳು ಈಗಲೂ ಹಾಗೆಯೇ ಇವೆ. 2020ರ ಫೆಬ್ರವರಿಯಲ್ಲಿ ಟ್ರಂಪ್ ಭಾರತಕ್ಕೆ ಬಂದಾಗಲೂ ಇವುಗಳಿಗೆ ಸಂಬಂಧಿಸಿದಂತೆ ಒಪ್ಪಂದ ಮಾಡಿಕೊಳ್ಳಲು ಸಾಧ್ಯವಾಗಿಲ್ಲ. ಇತ್ತೀಚೆಗೆ, ಯುಎಸ್‌ಐಎಸ್‌ಪಿಎಫ್‌ (ಅಮೆರಿಕ ಆಭರತ ಸ್ಟ್ರಾಟೆಜಿಕ್ ಪಾರ್ಟ್ನರ್‌ಶಿಪ್‌ ಫೋರಂ) ಆಯೋಜಿಸಿದ ಸಮ್ಮೇಳನದಲ್ಲಿ, ಸೀಮಿತ ವ್ಯಾಪಾರ ಒಪ್ಪಂದನ್ನು ನವೆಂಬರ್ ಅಧ್ಯಕ್ಷೀಯ ಚುನಾವಣೆಗೂ ಮುನ್ನ ಮಾಡಿಕೊಳ್ಳುವ ಸಾಧ್ಯತೆಯಿದೆ ಎಂದು ವಾಣಿಜ್ಯ ಮತ್ತು ಉದ್ಯಮ ಸಚಿವ ಪಿಯೂಶ್‌ ಗೋಯೆಲ್ ಹೇಳಿದ್ದಾರೆ.
ಈ #BattlegroundUSA2020 ಎಪಿಸೋಡ್‌ನಲ್ಲಿ ಹಿರಿಯ ಪತ್ರಕರ್ತೆ ಸ್ಮಿತಾ ಶರ್ಮಾ, ಭಾರತ ಎದುರಿಸುತ್ತಿರುವ ವ್ಯಾಪಾರ ಮತ್ತು ಆರ್ಥಿಕ ಸವಾಲುಗಳ ಕುರಿತು ಹಾಗೂ ಭಾರತಕ್ಕೆ ಟ್ರಂಪ್ ಹಾಗೂ ಬೈಡೆನ್ ಪ್ರಕಾರ ಯಾರೂ ಹೆಚ್ಚು ಅನುಕೂಲಕರ ಎಂಬ ಬಗ್ಗೆ ಚರ್ಚಿಸಿದ್ದಾರೆ.
ಸೀಮಿತ ವ್ಯಾಪಾರ ಒಪ್ಪಂದ ನಡೆಯುವ ಸಾಧ್ಯತೆ ತುಂಬಾ ಕಡಿಮೆ ಇದೆ ಎಂದು ವಾಷಿಂಗ್ಟನ್‌ ಡಿಸಿಯಲ್ಲಿನ ಹಡ್ಸನ್‌ ಇನ್‌ಸ್ಟಿಟ್ಯೂಟ್‌ನ ಇಂಡಿಯಾ ಇನಿಶಿಯೇಟಿವ್ ನಿರ್ದೇಶಕಿ ಡಾ. ಅಪರ್ಣಾ ಪಾಂಡೆ ಹೇಳಿದ್ದಾರೆ. ಮುಂದಿನ ತಿಂಗಳುಗಳಲ್ಲಿ ಸಣ್ಣ ಅಥವಾ ಸೂಕ್ಷ್ಮ ಮಟ್ಟದ ವ್ಯಾಪಾರ ಒಪ್ಪಂದಕ್ಕೆ ಸಹಿ ಹಾಕುವ ಬಗ್ಗೆ ನನಗೆ ಖಚಿತತೆ ಇಲ್ಲ. ಆದರೆ, ಭಾರತಕ್ಕೆ ಜಿಎಸ್‌ಪಿ ಅಂದರೆ ಜನರಲೈಸ್ಡ್ ಸಿಸ್ಟಂ ಆಫ್‌ ಪ್ರಿಫರೆನ್ಸಸ್‌ ಅನ್ನು ವಾಪಸ್ ನೀಡಬಹುದು. ಈ ಅನುಕೂಲವನ್ನು ಅಮೆರಿಕ ವಾಪಸ್ ಪಡೆದಿತ್ತು. ಇದು ಸುಮಾರು 6 ರಿಂದ 8 ಬಿಲಿಯನ್ ಡಾಲರ್ ಮೌಲ್ಯದ ವಹಿವಾಟು ಆಗುತ್ತದೆ. ಇದನ್ನು ಅಧ್ಯಕ್ಷರು ಸುಗ್ರೀವಾಜ್ಞೆಯ ಮೂಲಕ ಹಿಂಪಡೆದಿದ್ದರು. ಹೀಗಾಗಿ ಮುಂದಿನ ಒಂದೆರಡು ತಿಂಗಳುಗಳಲ್ಲಿ ಇದನ್ನು ಅವರು ಮರಳಿ ಕೊಡಬಹುದು. ಇದನ್ನು ಮಿನಿ ಡೀಲ್ ರೀತಿ ಪರಿಗಣಿಸಬಹುದು” ಎಂದು ಪಾಂಡೆ ಹೇಳಿದ್ದಾರೆ. ಫ್ರಮ್ ಚಾಣಕ್ಯ ಟು ಮೋದಿ ಮತ್ತು ಮೇಕಿಂಗ್ ಇಂಡಿಯಾ ಗ್ರೇಟ್ ಕೃತಿಗಳನ್ನು ಇವರು ರಚಿಸಿದ್ದಾರೆ.
“ಭಾರತ ಮತ್ತು ಅಮೆರಿಕವೆರಡೂ ರಾಷ್ಟ್ರೀಯ ಮತ್ತು ರಕ್ಷಣಾತ್ಮಕವಾಗಿವೆ. ಹೀಗಾಗಿ ವ್ಯಾಪಾರ ಒಪ್ಪಂದವನ್ನು ಮಾಡಿಕೊಳ್ಳುವಲ್ಲಿ ಸಮಸ್ಯೆಯಿದೆ. ಟ್ಯಾರಿಫ್ ಕಿಂಗ್ ಎಂದು ಕರೆದ ದೇಶಕ್ಕೆ ಅನುಕೂಲ ಮಾಡಿಕೊಡುವುದು ಹಾಗೂ ಕೃಷಿ ಸಬ್ಸಿಡಿಗಳು ಹಾಗೂ ಬೌದ್ಧಿಕ ಸ್ವತ್ತು ಹಕ್ಕುಗಳು ಸೇರಿದಂತೆ ಹಲವು ಆಕ್ಷೇಪಗಳನ್ನು ಹೊಂದಿರುವ ದೇಶಕ್ಕೆ ಅನುಕೂಲ ಒದಗಿಸುವುದು ಅಮೆರಿಕ ಫಸ್ಟ್ ನೀತಿಗೆ ವಿರುದ್ಧವಾಗಿದೆ ಹಾಗೂ ಕಷ್ಟವೂ ಆಗಿದೆ. ಹೀಗಾಗಿ, ಮುಂದಿನ ಒಂದೆರಡು ತಿಂಗಳಲ್ಲಿ ಇದನ್ನು ಮಾಡುವುದು ಅಮೆರಿಕದ ಅಧ್ಯಕ್ಷರಿಗೆ ಕಷ್ಟದ್ದಾಗಿದೆ. ಇನ್ನು, ಟ್ರಂಪ್ ಆಗಲೀ ಅಥವಾ ಬೈಡೆನ್ ಆಗಲೀ, ಮುಂದಿನ ಸರ್ಕಾರದಲ್ಲಿ ಇದು ಸಾಧ್ಯವಾಗುತ್ತದೆಯೇ ಎಂಬುದು ನನಗೆ ತಿಳಿದಿಲ್ಲ. ಭಾರತದ ಕಡೆಯೂ ಇದು ಕಷ್ಟಕರವೇ ಆಗಿದೆ. ಭಾರತ ಆರ್ಥಿಕವಾಗಿ ತುಂಬಾ ಬಳಲಿದೆ. ಭಾರತಕ್ಕೆ ತನ್ನ ರೈತರು ಮತ್ತು ಉತ್ಪಾದಕರ ಹಿತ ರಕ್ಷಣೆ ಮಾಡಲು ಕೆಲವು ಟ್ಯಾರಿಫ್‌ಗಳು ಮತ್ತು ತೆರಿಗೆಗಳು ಅತ್ಯಂತ ಅಗತ್ಯವಾಗಿದೆ” ಎಂದು ಅವರು ವಿವರಿಸಿದ್ದಾರೆ.
ಫ್ರಾನ್ಸ್‌ಗೆ ಭಾರತದ ರಾಯಭಾರಿಯಾಗಿದ್ದ ಮತ್ತು ವ್ಯಾಪಾರ ಒಪ್ಪಂದಗಳ ಮಧ್ಯಸ್ಥಿಕೆದಾರ ಮೋಹನ್ ಕುಮಾರ್ ಕೂಡ ಇದೇ ಅನುಮಾನಗಳನ್ನು ವ್ಯಕ್ತಪಡಿಸಿದ್ದಾರೆ. 2021 ರ ಮೊದಲ ತ್ರೈಮಾಸಿಕಕ್ಕೂ ಮೊದಲು ಒಪ್ಪಂದ ನಡೆಯುವ ಸಾಧ್ಯತೆ ಕಡಿಮೆ ಎಂದಿದ್ದಾರೆ. ಭಾರತಕ್ಕೆ ಹೆಚ್ಚು ಕಳವಳ ಇರುವ ಸಂಕೀರ್ಣ ಸಮಸ್ಯೆಗಳನ್ನು ಅವರು ಪ್ರಸ್ತಾಪಿಸಿದ್ದಾರೆ.
“ಅತ್ಯಂತ ಪ್ರಮುಖ ಸಂಗತಿಯೆಂದರೆ, ಅಮೆರಿಕವು ನಮ್ಮನ್ನು ಚೀನಾದ ಸಮಾನರಂತೆ ಪರಿಗಣಿಸುತ್ತಿದೆ ಮತ್ತು ಭಾರತವು ಅಭಿವೃದ್ಧಿಗೊಳ್ಳುತ್ತಿರುವ ದೇಶ ಎಂದು ಪರಿಗಣಿಸುತ್ತಿಲ್ಲ. ನನ್ನಂತಹ ಮಧ್ಯಸ್ಥಿಕೆದಾರರಿಗೆ ಇದು ಆಘಾತಕಾರಿ ವಾದವಾಗಿದೆ. ನೀವು ಸೇಬು ಮತ್ತು ಕಿತ್ತಳೆಯನ್ನು ಹೋಲಿಸುತ್ತಿದ್ದೀರಿ. ಚೀನಾ 13 ಟ್ರಿಲಿಯನ್‌ ಡಾಲರ್ ಆರ್ಥಿಕತೆ ಹಾಗೂ ನಾವು 2.7 ಟ್ರಿಲಿಯನ್‌ ಡಾಲರ್ ಆರ್ಥಿಕತೆ ಎಂಬುದು ಎಲ್ಲರಿಗೂ ತಿಳಿದಿದೆ. ಈ ಬಗ್ಗೆ ನಾವು ಮುಂದಿನ ಸರ್ಕಾರಕ್ಕೆ ಮನವೊಲಿಕೆ ಮಾಡಿಕೊಡಬೇಕಿದೆ. ಅದು ಯಾವ ಸರ್ಕಾರವೇ ಆಗಿದ್ದರೂ, ಅದಕ್ಕೆ ನಾವು ಮನವೊಲಿಕೆ ಮಾಡಿಕೊಡಬೇಕಿದೆ” ಎಂದು ಮೋಹನ್ ಕುಮಾರ್ ಹೇಳಿದ್ದಾರೆ. ಇವರು ಆರ್‌ಐಎಸ್ ಎಂಬ ಥಿಂಕ್ ಟ್ಯಾಂಕ್‌ನ ಮುಖ್ಯಸ್ಥರಾಗಿದ್ದಾರೆ ಮತ್ತು ಜಿಂದಾಲ್ ಗ್ಲೋಬಲ್ ಯೂನಿವರ್ಸಿಟಿಯಲ್ಲಿ ಅಂತಾರಾಷ್ಟ್ರೀಯ ಅಧ್ಯಯನಗಳ ಡೀನ್ ಆಗಿದ್ದಾರೆ.
“ನನ್ನ ಪ್ರಕಾರ ಅಭಿವೃದ್ಧಿಗೊಳ್ಳುತ್ತಿರುವ ದೇಶ ಎಂಬ ಸ್ಟೇಟಸ್‌ ಅನ್ನು ನಾವು ವಾಪಸ್ ಪಡೆಯಬೇಕು. ನಿಮ್ಮನ್ನು ನಾವು ಚೀನಾ ಅಥವಾ ಇತರ ದೇಶದ ರೀತಿ ಪರಿಗಣಿಸುತ್ತಿದ್ದೇವೆ ಎಂದು ಅಮೆರಿಕ ಹೇಳುತ್ತಿದ್ದಾಗ ಡಬ್ಲ್ಯೂಟಿಒದಲ್ಲಿ ನಾವು ಚೌಕಾಸಿ ಮಾಡಲು ಸಾಧ್ಯವಾಗುವುದಿಲ್ಲ. ಬೇರೆಲ್ಲ ಸಂಗತಿಗಳನ್ನೂ ನಾವು ಪರಿಹರಿಸಿಕೊಳ್ಳಬಹುದು. ಆದರೆ, ಈ ವಿಷಯ ತುಂಬಾ ಪ್ರಮುಖವಾಗಿದೆ. ಬಹುಶಃ ಇದನ್ನು ಅಮೆರಿಕದ ವ್ಯಾಪಾರಿ ಪ್ರತಿನಿಧಿ ಲೈಟಿಝರ್‌ ಒಪ್ಪುತ್ತಾರೆ ಎಂದು ನನಗೆ ಅನಿಸುವುದಿಲ್ಲ” ಎಂದು ಮೋಹನ್ ಹೇಳಿದ್ದಾರೆ. ಅಲ್ಲದೆ, ಜಿಎಸ್‌ಪಿ ಜೊತೆಗೆ ಡಿಜಿಟಲ್ ಸೇವೆಗಳ ತೆರಿಗೆ ಕೂಡ ಇನ್ನೊಂದು ಸಂಕೀರ್ಣ ಸಂಗತಿ ಎಂದು ಹೇಳುತ್ತಾರೆ.
“ಅಮೆರಿಕವು ಫ್ರಾನ್ಸ್‌ಗೆ ಮಾಡಿದ ಹಾಗೆಯೇ ಮಾಡುತ್ತಿದೆ. ಡಿಜಿಟಲ್ ಸೇವೆಗಳ ತೆರಿಗೆಯನ್ನು ಫ್ರಾನ್ಸ್‌ ವಿಧಿಸಿದ್ದಕ್ಕೆ ಪ್ರತಿಯಾಗಿ ಅಮೆರಿಕವೂ ಕಠಿಣ ತೆರಿಗೆಯನ್ನು ವಿಧಿಸಿತು. ನಾವು ಈಗಾಗಲೇ ಇದೇ ರೀತಿ ಮಾಡಿದ್ದೇವೆ. ನಾವು ಇದನ್ನು ಸಮಾನ ತೆರಿಗೆ ಎಂದು ಇದನ್ನು ಕರೆದಿದ್ದೇವೆ. ಗೂಗಲ್ ಅಥವಾ ಅಮೆಜಾನ್‌ಗೆ ಗುರಿಯಿಟ್ಟು ಇದನ್ನು ಮಾಡಿಲ್ಲ ಎಂದು ನಾವು ಅಮೆರಿಕಕ್ಕೆ ವಿವರಿಸಲು ಪ್ರಯತ್ನಿಸಿದ್ದೆವು. ಬಹುಶಃ ಮುಂದಿನ ವರ್ಷದಲ್ಲಿ ವ್ಯಾಪಾರ ಒಪ್ಪಂದ ನಡೆಯಬಹುದು” ಎಂದು ಅವರು ಹೇಳಿದ್ದಾರೆ.
ಟ್ರಂಪ್‌ಗೆ ಹೋಲಿಸಿದರೆ ಜೋಯ್‌ ಬೈಡೆನ್ ಸರ್ಕಾರವು ಭಾರತದ ಜೊತೆಗೆ ಇಂಧನ, ವ್ಯಾಪಾರ ಮತ್ತು ವಲಸೆ ವಿಚಾರದಲ್ಲಿ ಹೆಚ್ಚು ಸಹಕಾರ ನೀಡುತ್ತದೆಯೇ ಎಂಬ ಬಗ್ಗೆ ಚರ್ಚೆ ನಡೆಸಲಾಯಿತು. ಅಮೆರಿಕದ ಹೊಸ ಸರ್ಕಾರದಲ್ಲಿ ನವೆಂಬರ್ ನಂತರ ಅಮೆರಿಕ-ಚೀನಾದ ವ್ಯಾಪಾರ ಸಮಸ್ಯೆ ಹೆಚ್ಚಾದರೆ, ಭಾರತಕ್ಕೆ ಒದಗುವ ಅನುಕೂಲ ಅಥವಾ ಅಡ್ಡಿಗಳನ್ನೂ ಈ ವೇಳೆ ಚರ್ಚೆ ನಡೆಸಲಾಯಿತು.
“ಒಂದು ವೇಳೆ ಟ್ರಂಪ್ ಪುನಃ ಅಧಿಕಾರಕ್ಕೆ ಬಂದರೆ, ಅವರ ಕೊನೆಯ ಆಡಳಿತಾವಧಿ ಆಗಲಿದೆ. ಯಾಕೆಂದರೆ, ಅವರು ಪುನಃ ಅಧಿಕಾರಕ್ಕೆ ಏರಲು ಸಾಧ್ಯವಿರುವುದಿಲ್ಲ. ಹೀಗಾಗಿ ಅವರು ಯಾವುದಾದರೂ ಒಂದು ಪ್ರಮುಖ ನೀತಿಯನ್ನು ಜಾರಿಗೊಳಿಸುವ ಸಾಧ್ಯತೆ ಇದೆ. ವಲಸೆ ನೀತಿ ಅವರಿಗೆ ಅತ್ಯಂತ ಪ್ರಮುಖವಾದದ್ದು. ಈವರೆಗೆ ಅವರು ಮಾಡಿದ್ದೆಲ್ಲವೂ ಸುಗ್ರೀವಾಜ್ಞೆಗಳೇ. ಯಾಕೆಂದರೆ, ವಲಸೆ ನೀತಿಗಳನ್ನು ಅನುಷ್ಠಾನಗೊಳಿಸುವ ಕೆಲಸ ಸಂಸತ್ತಿನ ಬಳಿ ಇದೆ. ಅಮೆರಿಕದಲ್ಲಿ ಇದನ್ನು ಸುಗ್ರೀವಾಜ್ಞೆಯಿಂದ ಮಾಡಲಾಗದು. ಎಚ್‌1ಬಿ ಅಥವಾ ಎಲ್‌1 ವೀಸಾ, ಗ್ರೀನ್ ಕಾರ್ಡ್ ಅಥವಾ ವಿದ್ಯಾರ್ಥಿ ವೀಸಾ ಸೇರಿದಂತೆ ವಲಸೆ ನೀತಿಯನ್ನು ಇನ್ನಷ್ಟು ಕಠಿಣಗೊಳಿಸಲು ಅವರು ಪ್ರಯತ್ನ ಮುಂದುವರಿಸಲಿದ್ದಾರೆ. ಇದು ಭಾರತದ ಮೇಲೆ ಪರಿಣಾಮ ಬೀರಲಿದೆ. ಭಾರತೀಯರು ಅಮೆರಿಕಕ್ಕೆ ಬರುವ ಪ್ರಮಾಣದ ಮೇಲಷ್ಟೇ ಅಲ್ಲ, ಅವರು ವಾಪಸು ಕಳುಹಿಸುವ ಹಣದ ಮೇಲೆಯೂ ಪರಿಣಾಮ ಬೀರಲಿದೆ. ಅಷ್ಟೇ ಅಲ್ಲ, ಇಷ್ಟು ವರ್ಷಗಳಿಂದ ನಾವು ರೂಪಿಸಿದ ಸಂಬಂಧವೂ ಇದರಿಂದ ತೊಂದರೆಗೀಡಾಗಲಿದೆ” ಎಂದು ಡಾ. ಪಾಂಡೆ ಹೇಳುತ್ತಾರೆ.
ಭಾರತ ಮತ್ತು ಅಮೆರಿಕವು ರಾಜಕೀಯ ದೃಷ್ಟಿಕೋನದಲ್ಲಿ ಈ ಸಮಸ್ಯೆಯನ್ನು ಪರಿಗಣಿಸಬೇಕು ಮತ್ತು ಆರ್ಥಿಕ ಕೋನವು ಯಾಕೆ ವ್ಯೂಹಾತ್ಮಕ ದೃಷ್ಟಿಕೋನಕ್ಕಿಂತ ತುಂಬಾ ಹಿಂದೆ ಉಳಿದಿದೆ ಎಂದು ಈ ಬಗ್ಗೆ ಚರ್ಚಿಸಬೇಕಿದೆ ಎಂದು ಅವರು ಹೇಳುತ್ತಾರೆ. ಬೈಡೆನ್ ಸರ್ಕಾರದಲ್ಲಿ ಅತ್ಯಂತ ಕುಶಲ ವಲಸೆಗೆ ಹೆಚ್ಚಿನ ಆದ್ಯತೆ ಸಿಗುತ್ತದೆ. ಆದರೆ ಇದರಲ್ಲಿ ಕೆಲವು ಅನುಕೂಲ ಮತ್ತು ಅನಾನುಕೂಲಗಳೂ ಇವೆ ಎಂದು ಮೋಹನ್ ಕುಮಾರ್ ಹೇಳುತ್ತಾರೆ.
“ಬೈಡೆನ್ ಸರ್ಕಾರ ಅಧಿಕಾರಕ್ಕೆ ಬಂದರೆ, ನಾವು ಹಲವು ಸಮಸ್ಯೆಗಳನ್ನು ಹೊಂದಿರುತ್ತೇವೆ. ಡಬ್ಲ್ಯೂಟಿಒ ಪರಿಷ್ಕರಿಸುವ ಸಾಧ್ಯತೆ ಇರುತ್ತದೆ. ಹಲವು ದೇಶಗಳ ಸಮೂಹ ಅಥವಾ ದ್ವಿಪಕ್ಷೀಯ ಒಪ್ಪಂದವನ್ನು ನಾವು ಮಾಡಲು ಪ್ರಯತ್ನಿಸುತ್ತೇವೆ ಹಾಗೂ ನಾವು ನಿಮ್ಮ ಜೊತೆ ಕುಳಿತು ವಹಿವಾಟು ನಡೆಸುತ್ತೇವೆ. ಆದರೆ ಈ ಕೆಲವು ಸಂಗತಿಗಳನ್ನು ಮಾಡುವುದಿಲ್ಲ ಎಂದು ನಾವು ಅವರಿಗೆ ಹೇಳುತ್ತೇವೆ. ವಿಶೇಷ ಅನುಕೂಲವನ್ನು ಹಿಂಪಡೆಯಬೇಡಿ. ಜಿಎಸ್‌ಪಿ ಹಿಂಪಡೆಯಬೇಡಿ ಎಂದು ಹೇಳುತ್ತೇವೆ. ಆದರೆ, ಕೆಲವು ಇತರ ಸಮಸ್ಯೆಗಳೂ ಇವೆ. ಉದಾಹರಣೆಗೆ, ಕಾರ್ಮಿಕ ನೀತಿಗಳು, ಪರಿಸರ ಮಾನದಂಡಗಳ ವಿಚಾರದಲ್ಲಿ ಅಮೆರಿಕ ಹೆಚ್ಚು ಕಠಿಣ ನಿಲುವು ತಾಳುತ್ತದೆ. ಅವುಗಳನ್ನು ಡಬ್ಲ್ಯೂಟಿಒದಲ್ಲೂ ಅಳವಡಿಸುತ್ತಿದೆ. ಪರಿಸರ ಮತ್ತು ಕಾನೂನು ಮಾನದಂಡಗಳನ್ನು ಜಾರಿಗೊಳಿಸಲು ವ್ಯಾಪಾರವನ್ನು ಡೆಮಾಕ್ರಾಟ್‌ಗಳು ಬಳಸಿದ ಇತಿಹಾಸವೇ ಇದೆ” ಎಂದು ನಿವೃತ್ತ ಅಧಿಕಾರಿ ಹೇಳಿದ್ದಾರೆ.
