ನವದೆಹಲಿ: ಸಂಸತ್ತಿನ ನೂತನ ಕಟ್ಟಡವನ್ನು ನಿರ್ಮಿಸಲು ಕೇಂದ್ರ ಸರ್ಕಾರ ನಿರ್ಧರಿಸಿದ್ದು, ಈ ಮೂಲಕ ಹೊಸ ಭಾಷ್ಯ ಬರೆಯಲು ಮುಂದಾಗಿದೆ. 2022ಕ್ಕೆ ನೂತನ ಸಂಸತ್ನ ಕಾಮಗಾರಿ ಪೂರ್ಣಗೊಳ್ಳುವ ನಿರೀಕ್ಷೆಯಿದೆ.
ಈಗ ಇರುವ ಸಂಸತ್ ಭವನ ನಾಲ್ಕು ಅಂತಸ್ತುಗಳಲ್ಲಿ ನಿರ್ಮಾಣವಾಗಲಿದ್ದು, ಸುಮಾರು 64,500 ಚದರ ಮೀಟರ್ನಲ್ಲಿ ತಲೆ ಎತ್ತಲಿದೆ. ಈ ನೂತನ ಭವನದ ಕೆಳ ಅಂತಸ್ತಿನಲ್ಲಿ ಲೋಕಸಭಾ ಹಾಲ್ ಇರಲಿದ್ದು, ಮುಂದಿನ ವರ್ಷಗಳಲ್ಲಿ ಹೆಚ್ಚಾಗಬಹುದಾದ ಸಂಸದರನ್ನು ಗಣನೆಗೆ ತೆಗೆದುಕೊಂಡು ನಿರ್ಮಿಸಲಾಗುತ್ತದೆ.
ಈಗ ಸದ್ಯಕ್ಕೆ ಲೋಕಸಭೆಯಲ್ಲಿ 545 ಸದಸ್ಯರಿಗೆ ಅವಕಾಶವಿದ್ದು, ನೂತನ ಸಂಸತ್ನಲ್ಲಿ 888 ಮಂದಿಗೆ ಆಸನಗಳನ್ನು ಕಲ್ಪಿಸಲಾಗುತ್ತದೆ. ಅಂದರೆ ಈಗಿನ ಲೋಕಸಭೆಯಲ್ಲಿರುವ ಸದಸ್ಯರಿಗಿಂತ 336 ಮಂದಿ ಹೆಚ್ಚು ಸದದ್ಯರಿಗೆ ಆಸನ ವ್ಯವಸ್ಥೆ ಇರಲಿದೆ.
ಅದೇ ರೀತಿಯಲ್ಲಿ ರಾಜ್ಯಸಭೆಯಲ್ಲಿ ಈಗ 245 ಮಂದಿ ಸದಸ್ಯರಿದ್ದು, ನೂತನ ಸಂಸತ್ ಭವನದ ರಾಜ್ಯಸಭಾ ಸಭಾಂಗಣದಲ್ಲಿ 384 ಮಂದಿಗೆ ಅವಕಾಶವಿರಲಿದೆ. ಆಸನ ವ್ಯವಸ್ಥೆಯಲ್ಲಿ ಅಷ್ಟೇನೂ ಬದಲಾವಣೆಯಾಗುವುದಿಲ್ಲ ಎಂದು ಹೇಳಲಾಗುತ್ತಿದ್ದು, ಚರ್ಚೆಗೆ ಫ್ಯಾನ್ ಆಕಾರದಲ್ಲಿ ಮೇಜುಗಳನ್ನು ಜೋಡಿಸಲಾಗುತ್ತದೆ. ಸಂಸತ್ನ ಎರಡೂ ಸದನಗಳ ಸದಸ್ಯರು ತಮಗೆ ಪ್ರತ್ಯೇಕವಾಗಿ ಮುಂಭಾಗದ ಡೆಸ್ಕ್ಗಳನ್ನು ಹೊಂದಿರುತ್ತಾರೆ.
ಇದನ್ನೂ ಓದಿ: ಹೀಗಿರಲಿದೆ ನೂತನ ಸಂಸತ್ ಭವನ... ಡಿ.10ಕ್ಕೆ ಶಂಕುಸ್ಥಾಪನೆ
ಆಸನಗಳ ಮಧ್ಯೆ ಓಡಾಡುವ ಸಲುವಾಗಿ ಸ್ಥಳಾವಕಾಶ ಹೆಚ್ಚಿಗೆ ಇರುವಂತೆ ನೋಡಿಕೊಳ್ಳಲಾಗುತ್ತದೆ. ಎಲ್ಲಾ ಸದಸ್ಯರಿಗೂ ಕೂಡ ಡಿಜಿಟಲ್ ವ್ಯವಸ್ಥೆಯ ಜೊತೆಗೆ ಟಚ್ ಸ್ಕ್ರೀನ್ ವ್ಯವಸ್ಥೆ ಇರುತ್ತದೆ. ಸದನದ ಹಾಲ್ಗಳಲ್ಲಿ ಬಯೋ ಮೆಟ್ರಿಕ್ ಹಾಗೂ ರೇಡಿಯೋ ಫ್ರಿಕ್ವೆನ್ಸಿ ಐಡೆಂಟಿಫೀಕೇಷನ್ ವ್ಯವಸ್ಥೆ ಇರಲಿದೆ. ಇದರ ಜೊತೆಗೆ ಸದಸ್ಯರ ಹೆಸರುಗಳು ಡಿಜಿಟಲ್ ಇಂಕ್ ಆಧಾರಿತವಾಗಿರುತ್ತವೆ.
ನೆಲ ಮಹಡಿಯಲ್ಲಿ ಲೋಕಸಭೆ ಹಾಗೂ ರಾಜ್ಯಸಭೆ ಮಾತ್ರವಲ್ಲದೆ ಪ್ರಧಾನಿ, ಸ್ಪೀಕರ್ ಮತ್ತು ಮಂತ್ರಿಗಳಿಗೆ ಕಚೇರಿಗಳನ್ನು ನಿರ್ಮಿಸಲಾಗುತ್ತದೆ. ಮೇಲಿನ ಎರಡು ಮಹಡಿಗಳಲ್ಲಿ ಮಂತ್ರಿಗಳಿಗೆ ಹೆಚ್ಚಿನ ಕೊಠಡಿಗಳು, ಹಾಲ್ಗಳು ಮತ್ತು ಮಾಧ್ಯಮ ಗ್ಯಾಲರಿಗಳಿರುತ್ತವೆ. ಮೂಲ ಸೌಕರ್ಯಗಳನ್ನು ಒದಗಿಸುವ ಮತ್ತು ನಿರ್ವಹಣಾ ಕೊಠಡಿಗಳು ಕೆಳ ಮಹಡಿಯಲ್ಲಿ ಇರುತ್ತವೆ.
ಸಂಸದರು, ಸ್ಪೀಕರ್, ಪ್ರಧಾನಿ ಮತ್ತು ಸಾರ್ವಜನಿಕರಿಗೆ ಪ್ರತ್ಯೇಕವಾಗಿ ಸಂಸತ್ನೊಳಗೆ ಪ್ರವೇಶಕ್ಕೆ ಅವಕಾಶ ಕಲ್ಪಿಸಲಾಗುತ್ತದೆ. ಕಟ್ಟಡದೊಳಗೆ ಕಾರು ಪಾರ್ಕಿಂಗ್ ವ್ಯವಸ್ಥೆ ಇರಲಿದ್ದು, 110 ವಾಹನಗಳನ್ನು ಪಾರ್ಕ್ ಮಾಡಬಹುದಾಗಿದೆ. ಗ್ರಂಥಾಲಯ ಮತ್ತು ಇಡೀ ಸಂಸತ್ ಆವರಣದಲ್ಲಿ ಒಟ್ಟು 1,100 ಕಾರುಗಳ ಪಾರ್ಕಿಂಗ್ ಸಾಮರ್ಥ್ಯ ಇರಲಿದೆ.
