ಹೈದರಾಬಾದ್: ಇಂದಿನ ಕೋಯಿಕ್ಕೋಡ್ ವಿಮಾನ ದುರಂತ 2010ರಲ್ಲಿ ಮಂಗಳೂರಿನಲ್ಲಿ ನಡೆದ ದುರಂತವನ್ನು ನೆನಪಿಸುತ್ತಿದೆ. ಯಾಕಂದ್ರೆ ಮಂಗಳೂರಿನಲ್ಲೂ ಪತನಗೊಂಡಿದ್ದು ಏರ್ಇಂಡಿಯಾ ಎಕ್ಸ್ಪ್ರೆಸ್ ಬೋಯಿಂಗ್ 737 ವಿಮಾನ. ಇವತ್ತು ಪತನ ಆಗಿದ್ದೂ ಏರ್ ಇಂಡಿಯಾ ಎಕ್ಸ್ಪ್ರೆಸ್ ಬೋಯಿಂಗ್ 737 ವಿಮಾನ. ಎರಡೂ ವಿಮಾನಗಳು ಬಂದಿದ್ದು ದುಬೈಯಿಂದಲೇ. ಮಂಗಳೂರಿನ ಬಜ್ಪೆಯದ್ದೂ ಟೇಬಲ್ ಟಾಪ್ ರನ್ವೇ. ಕೇರಳದ ಕೋಯಿಕ್ಕೋಡ್ನ ಇಂಟರ್ನ್ಯಾಶನಲ್ ಏರ್ಪೋರ್ಟ್ ಕೂಡ ಟೇಬಲ್ ಟಾಪ್ ರನ್ವೇಯನ್ನೇ ಹೊಂದಿದೆ.
ಎರಡೂ ಏರ್ಪೋರ್ಟ್ಗಳ ಇಕ್ಕೆಲಗಳಲ್ಲಿ ಇರುವುದು ಆಳವಾದ ಕಣಿವೆ. ಹೀಗಾಗಿ ಇಂತಹ ಏರ್ಪೋರ್ಟ್ಗಳಲ್ಲಿ ವಿಮಾನ ಲ್ಯಾಂಡ್ ಮಾಡುವಾಗ ಪೈಲೆಟ್ಗಳು ಬಹಳ ಚಾಕಚಕ್ಯತೆಯಿಂದ ವಿಮಾನವನ್ನು ಲ್ಯಾಂಡ್ ಮಾಡಬೇಕಾಗುತ್ತದೆ. ಇಂತಹ ಏರ್ಪೋರ್ಟ್ಗಳಲ್ಲಿ ಸ್ವಲ್ಪ ಎಡವಿದರೂ ಅಪಾಯ ಖಚಿತ. 2010ರ ಮೇ 22ರಂದು ಮಂಗಳೂರು ಏರ್ಪೋರ್ಟ್ನಲ್ಲಿ 158 ಜನರನ್ನು ಬಲಿ ಪಡೆದಿದ್ದ ಭೀಕರ ದುರಂತದ ಸಮಯದಲ್ಲೇ ಕೋಯಿಕ್ಕೋಡ್ ಏರ್ಪೋರ್ಟ್ ರನ್ವೇಯ ಸುರಕ್ಷತೆಯ ಬಗ್ಗೆ ಹಲವಾರು ಪ್ರಶ್ನೆಗಳು ಎದ್ದಿದ್ದವು.
ವಿಮಾನ ದುರಂತದಲ್ಲಿ ಪೈಲೆಟ್ ಸೇರಿ 16 ಮಂದಿ ದುರ್ಮರಣ; 123 ಮಂದಿಗೆ ಗಾಯ, 15 ಜನರ ಸ್ಥಿತಿ ಗಂಭೀರ
ಹೇಗಿದೆ ಕೋಯಿಕ್ಕೋಡ್ ಏರ್ಪೋರ್ಟ್?
ಕೋಯಿಕ್ಕೋಡ್ ಏರ್ಪೋರ್ಟ್ನದ್ದು ಟೇಬಲ್ಟಾಪ್ ರನ್ವೇ. ವಿಮಾನ ನಿಲ್ದಾಣದ ಸುತ್ತಲೂ ಸಣ್ಣಪುಟ್ಟ ಬೆಟ್ಟಗುಡ್ಡಗಳಿವೆ. ಮಂಗಳೂರು ಏರ್ಪೋರ್ಟ್ನಲ್ಲಿದ್ದಂತೆ ಇಲ್ಲೂ ರನ್ವೇಯ ಕೊನೆಯಲ್ಲಿ ಕಣಿವೆ ಇದೆ. 9,383 ಅಡಿಗಳಷ್ಟು ಉದ್ದದ ರನ್ವೇಯನ್ನು ಇನ್ನೂ 12 ಸಾವಿರ ಅಡಿಗಳಷ್ಟು ಉದ್ದಕ್ಕೆ ವಿಸ್ತರಿಸಬೇಕೆಂದು ತಜ್ಞರು 10 ವರ್ಷಗಳ ಹಿಂದೆಯೇ ಒತ್ತಾಯಿಸಿದ್ದರು. ಅಂದಹಾಗೆ ಮಂಗಳೂರಿನಲ್ಲೂ ದುರಂತ ನಡೆದ ನಂತರ ರನ್ವೇಯ ಉದ್ದವನ್ನು 8000 ಅಡಿಗಳಿಂದ 9,000 ಅಡಿಗಳವರೆಗೆ ವಿಸ್ತರಿಸಲಾಗಿತ್ತು.
2019ರಲ್ಲಿ ಸ್ವಲ್ಪದರಲ್ಲೇ ತಪ್ಪಿತ್ತು ದುರಂತ!
2019ರ ಜುಲೈ1ರಂದು ಕೋಯಿಕ್ಕೋಡ್ ವಿಮಾನ ನಿಲ್ದಾಣದಲ್ಲಿ ಇಂಥದ್ದೇ ದುರಂತ ಸಂಭವಿಸಿತ್ತು. ಅಂದು ಸೌದಿ ಅರೇಬಿಯಾದಿಂದ ಬಂದಿದ್ದ ಏರ್ ಇಂಡಿಯಾ ವಿಮಾನ ಲ್ಯಾಂಡಿಂಗ್ ವೇಳೆ ರನ್ವೇಗೆ ಉಜ್ಜಿಕೊಂಡು ಹೋಗಿತ್ತು. ಲ್ಯಾಂಡ್ ಆಗುತ್ತಿದ್ದಾಗ ವಿಮಾನದ ಹಿಂಬದಿ ಭಾಗ ರನ್ವೇಗೆ ಟಚ್ ಆಗಿತ್ತು. ಆದರೆ ಪೈಲೆಟ್ ಸಮಯ ಪ್ರಜ್ಞೆಯಿಂದಾಗಿ ಸ್ವಲ್ಪದರಲ್ಲೇ ಅವಘಡ ತಪ್ಪಿಹೋಗಿತ್ತು. ಸೌದಿ ಅರೇಬಿಯಾದ ದಮ್ಮಂನಿಂದ ಕೋಯಿಕ್ಕೋಡ್ಗೆ ಏರ್ ಇಂಡಿಯಾ ವಿಮಾನ ಆಗಮಿಸಿತ್ತು.
