ವಯನಾಡು: ದೇಶ ಒಡೆದುಹಾಕಲು ಪ್ರಧಾನಿ ನರೇಂದ್ರ ಮೋದಿ ವಿಷಬೀಜ ಬಿತ್ತುತ್ತಿದ್ದಾರೆ ಎಂದು ಕಾಂಗ್ರೆಸ್ ಅಧ್ಯಕ್ಷ ರಾಹುಲ್ ಗಾಂಧಿ ಹರಿಹಾಯ್ದರು.
ತಮ್ಮ ಸಂಸತ್ ಕ್ಷೇತ್ರ ವಯನಾಡಿನಲ್ಲಿ ರೋಡ್ ಶೋ ನಡೆಸಿ, ಮಾತನಾಡಿದ ಅವರು, ರಾಷ್ಟ್ರಮಟ್ಟದಲ್ಲಿ ನಾವು ವಿಷವರ್ತುಲದ ವಿರುದ್ಧ ಹೋರಾಡುತ್ತಿದ್ದೇವೆ. ಪ್ರಧಾನಿ ಮೋದಿ ವಿಷ ಬೀಜ ಬಿತ್ತುತ್ತಿದ್ದಾರೆ. ನಾನು ಕಠಿಣ ಶಬ್ದವನ್ನೇ ಬಳಸುತ್ತಿದ್ದರೂ, ಇದು ಸತ್ಯ. ದೇಶವನ್ನು ಒಡೆದು ಹಾಕಲು ಮೋದಿ ಯತ್ನಿಸುತ್ತಿದ್ದಾರೆ ಎಂದು ಆರೋಪಿಸಿದರು.
ಮೋದಿ ಹಾಗೂ ಅವರ ದ್ವೇಷದ ವಿರುದ್ಧ ನಾವು ಪ್ರೀತಿಂದಲೇ ಹೋರಾಡುತ್ತೇವೆ. ಮೋದಿ ದ್ವೇಷ, ಅಭದ್ರತೆ ಹಾಗೂ ಸುಳ್ಳಿನ ಪ್ರತಿನಿಧಿ ಎಂದರು.
ರಾಹುಲ್, ತಮ್ಮನ್ನು ಆಯ್ಕೆ ಮಾಡಿದ್ದಕ್ಕೆ ವಯನಾಡು ಜನರಿಗೆ ಧನ್ಯವಾದ ಹೇಳಿದರು. ವಯನಾಡಿನ ಜನರ ಸಂಕಷ್ಟ ಅರಿತು, ಪರಿಹಾರಕ್ಕಾಗಿ ಕೆಲಸ ಮಾಡುವುದೇ ನನ್ನ ಉದ್ದೇಶ. ವಯನಾಡಿನ ಎಲ್ಲರಿಗೂ ಕಾಂಗ್ರೆಸ್ ಪಕ್ಷದ ಬಾಗಿಲು ಸದಾ ತೆರೆದಿರುತ್ತೆ ಎಂದರು.
ರಾಹುಲ್ ಮಾತುಗಳ ನಡುವೆ, ನೆರೆದಿದ್ದ ಕಾಂಗ್ರೆಸ್ಸಿಗರು ಚೌಕೀದಾರ್ ಚೋರ್ ಹೈ ಎಂದು ಕೂಗಿದರು. ಚುನಾವಣೆ ಬಳಿಕ ಮೊದಲು ಈ ಘೋಷಣೆ ಕೇಳುತ್ತಿದ್ದೇನೆ ಎಂದು ರಾಹುಲ್ ಮೋದಿ ಅವರನ್ನು ತಿವಿದರು.
