ನವದೆಹಲಿ: ಪುಲ್ವಾಮಾ ಉಗ್ರದಾಳಿಗೆ ಪ್ರತೀಕಾರವಾಗಿ ಭಾರತೀಯ ವಾಯುಸೇನೆ ನಡೆಸಿದ್ದ ಏರ್ಸ್ಟ್ರೈಕ್ ಬಳಿಕ ಭಾರತೀಯ ನೌಕಾಸೇನೆ ಸುಮಾರು 3 ವಾರಗಳ ಕಾಲ ಪಾಕಿಸ್ತಾನ ಜಲಾಂತರ್ಗಾಮಿಗಾಗಿ ಸತತ ಹುಡುಕಾಟ ನಡೆಸಿತ್ತು ಎಂಬ ಅಚ್ಚರಿಯ ವಿಚಾರ ಇದೀಗ ಹೊರಬಿದ್ದಿದೆ.
ಪುಲ್ವಾಮಾ ಭಯೋತ್ಪಾದಕ ಕೃತ್ಯದ ನಂತರ ಭಾರತ ಪಾಕಿಸ್ತಾನದ ಮಿಲಿಟರಿ ಚಲನವಲನದ ಮೇಲೆ ತೀವ್ರ ನಿಗಾ ಇಟ್ಟಿತ್ತು. ಆದರೆ ಬಾಲಾಕೋಟ್ ವಾಯುದಾಳಿಯ ಬಳಿಕ ಪಾಕಿಸ್ತಾನದ ಹೊಂದಿದ್ದ ಅಗೋಸ್ತಾ ಕ್ಲಾಸ್ನ ಪಿಎನ್ಎಸ್ ಸಾದ್ ಎನ್ನುವ ಅತ್ಯಾಧುನಿಕ ಸಬ್ಮೆರಿನ್ ತನ್ನ ಕಾರ್ಯಕ್ಷೇತ್ರದಿಂದ ನಾಪತ್ತೆಯಾಗಿತ್ತು ಎಂದು ಹಿರಿಯ ಅಧಿಕಾರಿ ಹೇಳಿದ್ದಾರೆ.
ಪಿಎನ್ಎಸ್ ಸಾದ್ ಏರ್ ಇಂಡಿಪೆಂಡೆಂಟ್ ಪ್ರೊಪಲ್ಶನ್(Air Independent Propulsion) ಎನ್ನುವ ತಂತ್ರಜ್ಞಾನ ಹೊಂದಿದ್ದು, ಈ ಮೂಲಕ ಸಾಮಾನ್ಯ ಸಬ್ಮೆರಿನ್ಗಿಂತ ಹೆಚ್ಚು ಅವಧಿಗೆ ನೀರಿನ ಒಳಭಾಗದಲ್ಲಿ ತಟಸ್ಥವಾಗಿರಬಲ್ಲದು. ಈ ವಿಚಾರ ತಿಳಿದಿದ್ದ ಭಾರತ ಈ ಸಬ್ಮೆರಿನ್ಗಾಗಿ ಭಾರಿ ಹುಡುಕಾಟ ನಡೆಸಿತ್ತು.
ಕರಾಚಿ ಸಮೀಪದಿಂದ ಪಿಎನ್ಎಸ್ ಸಾದ್ ಕಣ್ಮರೆಯಾಗಿತ್ತು. ಈ ಸಬ್ಮೆರಿನ್ ಗುಜರಾತನ್ನು ಐದು ದಿನದಲ್ಲಿ, ಮುಂಬೈ ಅನ್ನು ಐದು ದಿನದಲ್ಲಿ ತಲುಪುವ ಸಾಮರ್ಥ್ಯ ಹೊಂದಿತ್ತು. ಇದು ನಿಜಕ್ಕೂ ಭಾರತದ ಭದ್ರತೆಗೆ ಅತಿದೊಡ್ಡ ಸವಾಲಾಗಿತ್ತು ಎಂದು ಮೂಲಗಳು ತಿಳಿಸಿವೆ.
ಪಿಎನ್ಎಸ್ ಸಾದ್ ಹುಡುಕಾಟಕ್ಕೆ ಆಧುನಿಕ ಆ್ಯಂಟಿ ಸಬ್ಮೆರಿನ್ ಹಾಗೂ ವಿಮಾನಗಳನ್ನು ಬಳಸಿ ಭಾರತ ದೊಡ್ಡ ಮಟ್ಟದಲ್ಲಿ ಹುಡುಕಾಟ ನಡೆಸಿತ್ತು.
ಕರಾಚಿಯನ್ನು ಮೂಲವಾಗಿರಿಸಿ ಪಿಎನ್ಎಸ್ ಒಂದು ಅವಧಿಯಲ್ಲಿ ತಲುಪಬಹುದಾದ ಎಲ್ಲ ಸ್ಥಳಗಳನ್ನು ಅಂತಿಮಗೊಳಿಸಿ ದೊಡ್ಡ ಕಾರ್ಯಾಚರಣೆ ಮಾಡಲಾಯಿತು. ಗುಜರಾತ್‌, ಮಹಾರಾಷ್ಟ್ರ ಸೇರಿದಂತೆ ಇತರೇ ರಾಜ್ಯಗಳ ಕರಾವಳಿ ಭಾಗದಲ್ಲಿ ಹುಡುಕಾಟ ನಡೆಸಲಾಯಿತು. ಒಂದು ವೇಳೆ ಪಿಎನ್ಎಸ್ ಸಾದ್ ಭಾರತದ ಜಲಮಾರ್ಗವನ್ನು ಪ್ರವೇಶಿಸಿದ್ದರೆ ವಹಿಸಬೇಕಾದ ಎಲ್ಲ ರೀತಿಯ ಮುಂಜಾಗ್ರತೆಯನ್ನು ಮಾಡಿಕೊಂಡೇ ಹುಡುಕಾಟ ಮಾಡಲಾಗಿತ್ತು ಎಂದು ಮೂಲಗಳು ತಿಳಿಸಿವೆ.
ನ್ಯೂಕ್ಲಿಯರ್ ಸಬ್ಮೆರಿನ್ ಐಎನ್ಎಸ್ ಚಕ್ರ ಹಾಗೂ ಐಎನ್ಎಸ್ ಕಲ್ವಾರಿಯನ್ನು ಕಾರ್ಯಾಚರಣೆಗೆ ಇಳಿಸಿ ಭಾರತೀಯ ನೌಕಾದಳ ಪಾಕಿಸ್ತಾನದಿಂದ ಎದುರಾಬಹುದಾದ ಎಲ್ಲ ದಾಳಿಗೂ ಸಾಕಷ್ಟು ಎಚ್ಚರ ವಹಿಸಿತ್ತು. ದಿನದಿಂದ ದಿನಕ್ಕೆ ಹುಡುಕಾಟವನ್ನು ಮತ್ತಷ್ಟು ಚುರುಕುಗೊಳಿಸಿ ಉಪಗ್ರಹಗಳ ಸಹಾಯವನ್ನೂ ಪಡೆಯಲಾಗಿತ್ತು.
ಬರೋಬ್ಬರಿ 21 ದಿನಗಳ ಹುಡುಕಾಟದ ಬಳಿಕ ಭಾರತೀಯ ನೌಕಾದಳ ಪಿಎನ್ಎಸ್ ಸಾದ್ ಸಬ್ಮೆರಿನ್ ಅನ್ನು ಯಶಸ್ವಿಯಾಗಿ ಪತ್ತೆಹಚ್ಚಿತ್ತು. ಪಾಕಿಸ್ತಾನದ ಪಶ್ಚಿಮ ಭಾಗದಲ್ಲಿ ಪಿಎನ್ಎಸ್ ಸಾದ್ ಸಬ್ಮೆರಿನ್ ಅನ್ನು ಅಡಗಿಸಿಟ್ಟಿತ್ತು. ಉಭಯ ದೇಶಗಳ ನಡುವೆ ಯುದ್ಧದ ಸಾಧ್ಯತೆಯಿಂದ ಪಿಎನ್ಎಸ್ ಸಾದ್ ಸಬ್ಮೆರಿನ್ ಅನ್ನು ದಾಳಿಗೆ ಸಿದ್ಧವಾಗಿಸಿ ನಿಯೋಜನೆ ಮಾಡಿತ್ತು ಎನ್ನುವುದು ಈಗ ಬಹಿರಂಗವಾಗಿದೆ.
