ನವದೆಹಲಿ: ಕೋವಿಡ್ ಲಾಕ್ಡೌನ್ ಸಂದರ್ಭದಲ್ಲಿ ಸಾಕುಪ್ರಾಣಿಗಳನ್ನು ದತ್ತು ಪಡೆಯುವ ಪ್ರಮಾಣ ಹೆಚ್ಚಾಗಿದ್ದು, ಅವುಗಳಿಗೆ ನೀಡುವ ಆಹಾರ ಪದಾರ್ಥಗಳ ಮಾರಾಟ ಕೂಡ ಶೇ 20ರಷ್ಟು ಏರಿಕೆಯಾಗಿದೆ.
ಪೆಡಿಗ್ರೀ, ವಿಸ್ಕಾಸ್, ಐಎಎಂಎಸ್ ಮತ್ತು ಟೆಂಪ್ಟೇಷನ್ನಂತಹ ಜನಪ್ರಿಯ ಬ್ರಾಂಡ್‌ಗಳನ್ನು ಹೊಂದಿರುವ ಮಾರ್ಸ್ ಪೆಟ್‌ಕೇರ್, ನೆಸ್ಲೆ ಒಡೆತನದ ಪ್ಯೂರಿನಾ ಕಂಪನಿಗಳು 2020ರಲ್ಲಿ ಸಾಕುಪ್ರಾಣಿಗಳಿಗೆ ನೀಡುವ ಆಹಾರ ಮಾರಾಟದಲ್ಲಿ ಹೆಚ್ಚಿನ ಲಾಭ ಪಡೆದಿವೆ.
ಈ ಆಹಾರ ಪದಾರ್ಥಗಳು ಮಳಿಗೆಗಳಲ್ಲಿ ಮಾತ್ರವಲ್ಲದೆ ಆನ್ಲೈನ್ ಪ್ಲಾಟ್‌ಫಾರ್ಮ್‌ಗಳಲ್ಲೂ ಅಧಿಕ ಪ್ರಮಾಣದಲ್ಲಿ ಮಾರಾಟವಾಗಿವೆ. ಹೀಗಾಗಿ ಭಾರತದಲ್ಲಿ ತಯಾರಕರು ತಮ್ಮ ಉತ್ಪನ್ನದ ಮೇಲೆ ಬಂಡವಾಳವನ್ನು ಹೆಚ್ಚಿಸುತ್ತಿದ್ದಾರೆ ಹಾಗೂ ಹೊಸ ಹೊಸ ಟಿವಿ ಜಾಹೀರಾತುಗಳನ್ನು ನೀಡುತ್ತಾ, ಡಿಜಿಟಲ್ ಅಭಿಯಾನಗಳನ್ನು ಆರಂಭಿಸಿದ್ದಾರೆ.
ಇದನ್ನೂ ಓದಿ: ಹುಲಿ ಚರ್ಮ, ವಿಶೇಷ ಜಾತಿಯ ಆಮೆ ಕಳ್ಳ ಸಾಗಣೆ: ಇಬ್ಬರ ಬಂಧನ
ಲಾಕ್ಡೌನ್ ವೇಳೆ ಮನೆಯಲ್ಲೇ ಬೇಸರದಿಂದ ಇರುತ್ತಿದ್ದ ಅನೇಕ ಜನರು, ಅದರಲ್ಲಿಯೂ ಯುವಜನತೆ ಸಾಕುಪ್ರಾಣಿಗಳನ್ನು ದತ್ತು ತೆಗೆದುಕೊಂಡು, ಅವುಗಳೊಂದಿಗೆ ಆಡುತ್ತಾ ಕಾಲ ಕಳೆದಿದ್ದಾರೆ. ಇನ್ನೂ ಕೆಲವರು ಅನೇಕ ಪ್ರಾಣಿಗಳು ಹಸಿವಿನಿಂದ ಬಳಲುತ್ತಿವೆ ಎಂಬುದನ್ನು ಅರಿತು ಅವುಗಳಿಗೆ ಆಹಾರ ನೀಡಿದ್ದಾರೆ. ಎನ್‌ಜಿಒಗಳಿಗೆ ಆಹಾರವನ್ನು ದಾನ ಮಾಡಿದ್ದಾರೆ.
2020 ರಲ್ಲಿ ನಾಯಿಮರಿಯನ್ನು ದತ್ತು ಪಡೆದ ಪ್ರಮಾಣ ಶೇ 50ಕ್ಕಿಂತ ಅಧಿಕವಿದ್ದು, ಶೇ 40ಕ್ಕಿಂತ ಹೆಚ್ಚಿನ ಸಂಖ್ಯೆಯಲ್ಲಿ ಬೆಕ್ಕುಗಳು ಮಾರಾಟವಾಗಿವೆ ಮಾರ್ಸ್ ಪೆಟ್‌ಕೇರ್ ಇಂಡಿಯಾ ಜನರಲ್ ಮ್ಯಾನೇಜರ್ ಗಣೇಶ್ ರಮಣಿ ತಿಳಿಸಿದ್ದಾರೆ.
