ಮುಂಬೈ: ಪಾಲ್ಘರ್ನಲ್ಲಿ ಸಾಧುಗಳ ಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪ್ರತಿಪಕ್ಷಗಳು ರಾಜಕೀಯ ಬಣ್ಣ ಬಳಿಯುತ್ತಿವೆ ಎಂದು ಮಹಾರಾಷ್ಟ್ರ ಗೃಹ ಸಚಿವ ಅನಿಲ್ ದೇಶ್ಮುಖ್ ವಾಗ್ದಾಳಿ ನಡೆಸಿದ್ದಾರೆ.
ನಿನ್ನೆ ಈ ಪ್ರಕರಣದ ಕುರಿತು ಸಿಐಡಿ ಚಾರ್ಜ್ಶೀಟ್ ದಾಖಲಿಸಿದೆ. ಈ ಬಗ್ಗೆ ಮಾತನಾಡಿದ ಅನಿಲ್, ಇಬ್ಬರು ಸಾಧುಗಳು ಹಾಗೂ ಅವರ ಡ್ರೈವರ್ ನನ್ನು ಕೊಲೆ ಮಾಡಲಾಗಿದೆ. ಪ್ರಕರಣದ ಸಂಬಂಧ ಸದ್ಯ ಸಿಐಡಿ ವಿಚಾರಣೆ ನಡೆಸುತ್ತಿದ್ದು, ಈಗಾಗಲೇ 808 ಮಂದಿಯನ್ನು ವಿಚಾರಣೆಗೆ ಒಳಪಡಿಸಲಾಗಿದೆ. 154 ಮಂದಿಯನ್ನು ಬಂಧಿಸಲಾಗಿದೆ. ಇದರಲ್ಲಿ 11 ಮಂದಿ ಬಾಲಾಪರಾಧಿಗಳಾಗಿದ್ದಾರೆ. ಇವರಿಗೆ ಜಾಮೀನು ಮಂಜೂರು ಮಾಡಿಲ್ಲ. ಆದರೆ, ಕೆಲವರು ಈ ಪ್ರಕರಣಕ್ಕೆ ರಾಜಕೀಯ ಬಣ್ಣ ನೀಡಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಮುಂಬೈನಿಂದ ಸೂರತ್ಗೆ ತೆರಳುತ್ತಿದ್ದ ಮೂವರು ಸಾಧುಗಳಾದ ಕಲ್ಪವೃಕ್ಷಗಿರಿ ಮಹಾರಾಜ್ (70), ಸಹಾಯಕ ಸುಶೀಲ್ಗಿರಿ ಮಹಾರಾಜ್ (35), ಜುನಾ ಅಖಾಡ (30) ಮತ್ತು ಅವರ ಡ್ರೈವರ್ ನೀಲೇಶ್ ತೇಲ್ಗಡೆ (30)ಯವರನ್ನು ಏಪ್ರಿಲ್ 16ರ ರಾತ್ರಿ ವೇಳೆ ಪಾಲ್ಘರ್ ಸಮೀಪ ಕೊಲೆ ಮಾಡಲಾಗಿತ್ತು. ಅಲ್ಲಿನ ಕೆಲ ಬುಡಕಟ್ಟು ಜನಾಂಗದ ಜನರು ಕಲ್ಲು ಎಸೆದು, ದೊಣ್ಣೆಯಿಂದ ಹೊಡೆದು ಇವರನ್ನು ಸಾಯಿಸಿದ್ದರು ಎಂದು ಹೇಳಲಾಗಿತ್ತು.
