ಹೈದರಾಬಾದ್: ತೆಲಂಗಾಣದಲ್ಲಿ ಕೊರೊನಾ ರ‍್ಯಾಪಿಡ್ ಟೆಸ್ಟ್ ಪ್ರಾರಂಭವಾದ ಬಳಿಕ ಕಳೆದ 10 ದಿನಗಳಲ್ಲಿ 2,000ಕ್ಕೂ ಹೆಚ್ಚು ಸೋಂಕಿತರು ನಾಪತ್ತೆಯಾಗಿದ್ದಾರೆ ಎಂದು ರಾಜ್ಯ ಆರೋಗ್ಯ ಸಚಿವಾಲಯದ ಮೂಲಗಳು ತಿಳಿಸಿವೆ.
ರಾಜ್ಯದ ವಿವಿಧ ಸರ್ಕಾರಿ ಆಸ್ಪತ್ರೆಗಳು ಹಾಗೂ ಕೋವಿಡ್ ಕೇಂದ್ರಗಳಲ್ಲಿ ಕೋವಿಡ್ ಪರೀಕ್ಷೆಗೆ ಒಳಪಟ್ಟು, ವರದಿ ಪಾಸಿಟಿವ್ ಬಂದ ಬಳಿಕ ಸೋಂಕಿತರ ಪತ್ತೆಯೇ ಇಲ್ಲ. ಸೋಂಕಿತರು ತಪ್ಪು/ಸುಳ್ಳು ದೂರವಾಣಿ ಸಂಖ್ಯೆ ಹಾಗೂ ವಿಳಾಸ ನೀಡಿದ್ದರಿಂದ ಆರೋಗ್ಯ ಮತ್ತು ಪುರಸಭೆ ಅಧಿಕಾರಿಗಳಿಗೆ ಅವರನ್ನು ಹುಡುಕಲು ಸಾಧ್ಯವಾಗುತ್ತಿಲ್ಲ. ಕರೆ ಮಾಡಿದರೆ ಕೆಲವರ ಮೊಬೈಲ್ ಸ್ವಿಚ್ ಆಫ್ ಆಗಿದೆ ಎಂಬ ಮಾಹಿತಿ ದೊರೆತಿದೆ.
ತೆಲಂಗಾಣದಲ್ಲಿ ಈವರೆಗೆ 41,018 ಕೇಸ್ಗಳು ಹಾಗೂ 396 ಸಾವು ವರದಿಯಾಗಿದೆ. ಈ ಪೈಕಿ 27,295 ಮಂದಿ ಗುಣಮುಖರಾಗಿದ್ದು, 13,328 ರೋಗಿಗಳು ವಿವಿಧ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.
