ಭೋಪಾಲ್: ತೆರಿಗೆ ವಂಚನೆ ಆರೋಪ ಎದುರಿಸುತ್ತಿರುವ ಮಾಜಿ ಮುಖ್ಯಮಂತ್ರಿ ಕಮಲ್ ನಾಥ್ ನಿಕಟವರ್ತಿಗಳಾದ 64 ಶಾಸಕರ ಪಟ್ಟಿಯನ್ನು ಆದಾಯ ತೆರಿಗೆ ಇಲಾಖೆ ಬಿಡುಗಡೆ ಮಾಡಿದೆ.
ಲೋಕಸಭಾ ಚುನಾವಣೆಯ ಸಂದರ್ಭದಲ್ಲಿ ಈ ಶಾಸಕರ ಆಸ್ತಿಗಳ ಮೇಲೆ ಆದಾಯ ತೆರಿಗೆ ಅಧಿಕಾರಿಗಳು ದಾಳಿ ನಡೆಸಿದ್ದರು. ಅಂದಿನಿಂದ ಇಂದಿನವರೆಗೆ ಇದೊಂದು ವಿವಾದಾತ್ಮಕ ವಿಷಯವಾಗಿ ಮುಂದುವರೆದಿದೆ.
ಸರ್ಕಾರಿ ಇಲಾಖೆಗಳನ್ನು ಪಟ್ಟಿ ಮಾಡಲಾಗಿದೆ, ಮಂತ್ರಿಗಳನ್ನಲ್ಲ:
ಆದಾಯ ತೆರಿಗೆ ಇಲಾಖೆ ಬಿಡುಗಡೆ ಮಾಡಿರುವ ಪಟ್ಟಿಯಲ್ಲಿ ಹಣ ಎಲ್ಲಿಂದ ಬಂತು ಎಂದು ಅನೇಕ ಸರ್ಕಾರಿ ಇಲಾಖೆಗಳ ಹೆಸರುಗಳನ್ನು ಉಲ್ಲೇಖಿಸಲಾಗಿದೆ. ಆದರೆ, ಆ ಇಲಾಖೆಗಳ ಮುಖ್ಯಸ್ಥರಾಗಿದ್ದ ಮಂತ್ರಿಗಳ ಹೆಸರುಗಳನ್ನು ಹೇಳಲಾಗಿಲ್ಲ. ಮುಖ್ಯವಾಗಿ ಸಜ್ಜನ್ ಸಿಂಗ್ ವರ್ಮಾ ನಿರ್ವಹಿಸುತ್ತಿದ್ದ ಲೋಕೋಪಯೋಗಿ ಇಲಾಖೆಯ ಮುಂದೆ 7.20 ಲಕ್ಷ ರೂ. ಎಂದು ಬರೆಯಲಾಗಿದೆ.
ಅದೇ ರೀತಿ, ಅಂದಿನ ನಗರಾಭಿವೃದ್ಧಿ ಮತ್ತು ಆಡಳಿತ ಸಚಿವರಾಗಿದ್ದ ದಿಗ್ವಿಜಯ್ ಸಿಂಗ್ ಅವರ ಪುತ್ರ ಜಯವರ್ಧನ್ ಸಿಂಗ್ ಅವರ ಇಲಾಖೆಯನ್ನು ಉಲ್ಲೇಖಿಸಲಾಗಿದೆ. ಈ ಇಲಾಖೆಯ ಜೊತೆಗೆ 7.20 ಲಕ್ಷ ರೂ. ಬರೆಯಲಾಗಿದೆ. ಇದಲ್ಲದೆ ಇಂಧನ ಇಲಾಖೆಯನ್ನೂ ಈ ಪಟ್ಟಿಯಲ್ಲಿ ಸೇರಿಸಲಾಗಿದ್ದು, ಈ ಇಲಾಖೆಯ ಮುಂದೆ 1 ಕೋಟಿ ಎಂದು ಬರೆಯಲಾಗಿದೆ. ಆದರೆ, ಅಂದು ಈ ಇಲಾಖೆಯನ್ನು ನಿರ್ವಹಿಸುತ್ತಿದ್ದ ಮಾಜಿ ಸಚಿವ ಪ್ರಿಯವ್ರತ್ ಸಿಂಗ್ ಅವರ ಹೆಸರನ್ನು ಪಟ್ಟಿಯಲ್ಲಿ ಉಲ್ಲೇಖಿಸಿಲ್ಲ. ಅದೇ ರೀತಿ, ಸಾರ್ವಜನಿಕ ಆರೋಗ್ಯ ಮತ್ತು ಎಂಜಿನಿಯರಿಂಗ್ ಇಲಾಖೆಯ ಮುಂದೆ 1 ಕೋಟಿ ರೂ. ಬರೆಯಲಾಗಿದೆ. ಆಗ ಈ ಇಲಾಖೆಯ ಸಚಿವರಾಗಿದ್ದವರು ಸುಖದೇವ್ ಪಾನ್ಸೆ.
ದಿಗ್ವಿಜಯ್ ಸಿಂಗ್ ಸೇರಿದಂತೆ 64 ಜನರ ವಿಚಾರಣೆ ಸಾಧ್ಯತೆ:
ಕಮಲ್ ನಾಥ್ ಸರ್ಕಾರದ ಅವಧಿಯಲ್ಲಿ ನಡೆಸಲಾದ ಆದಾಯ ತೆರಿಗೆ ಇಲಾಖೆಯ ದಾಳಿಗಳಲ್ಲಿ ವಶಪಡಿಸಿಕೊಂಡ ದಾಖಲೆಗಳು ಅನೇಕ ಪ್ರಮುಖ ವ್ಯಕ್ತಿಗಳು ಹಗರಣದಲ್ಲಿ ಪಾಲ್ಗೊಂಡಿರುವ ಬಗ್ಗೆ ಬಹಿರಂಗಪಡಿಸಿವೆ. ಚುನಾವಣಾ ಆಯೋಗವು ಈಗಾಗಲೇ ಮೂವರು ಐಪಿಎಸ್ ಅಧಿಕಾರಿಗಳು ಮತ್ತು ರಾಜ್ಯ ಸೇವಾ ಅಧಿಕಾರಿಯ ಹೆಸರನ್ನು ಬಹಿರಂಗಪಡಿಸಿದೆ.
ಓದಿ: ರಾಜಕಾರಣಿಗಳ ಮೇಲೆ ಐಟಿ ದಾಳಿ... ಇಲಾಖೆಗೆ ಸ್ಪಷ್ಟನೆ ನೀಡಲು ಆಯೋಗದ ಬುಲಾವ್
ಈಗ ಆದಾಯ ತೆರಿಗೆ ಇಲಾಖೆ ಬಿಡುಗಡೆ ಮಾಡಿರುವ ಪಟ್ಟಿಯಲ್ಲಿ ಮಾಜಿ ಶಾಸಕರಾದ ದಿಗ್ವಿಜಯ್ ಸಿಂಗ್ ಮತ್ತು ಸಜ್ಜನ್ ಸಿಂಗ್ ಸೇರಿದಂತೆ 64 ಶಾಸಕರು ಮತ್ತು ನಾಯಕರ ಹೆಸರುಗಳಿವೆ. ಪಟ್ಟಿಯಲ್ಲಿ, ಎಲ್ಲಾ ಶಾಸಕರು, ಐಪಿಎಸ್ ಅಧಿಕಾರಿಗಳು ಮತ್ತು ಉದ್ಯಮಿಗಳ ಹೆಸರಿನ ಮುಂದೆ ಈ ಮೊತ್ತವನ್ನು ಬರೆಯಲಾಗಿದ್ದು, ಇದರಲ್ಲಿ ಮೂವರು ಐಪಿಎಸ್ ಅಧಿಕಾರಿಗಳಾದ ಸುಶೋಭನ್ ಬ್ಯಾನರ್ಜಿ, ಸಂಜಯ್ ಮಾನೆ ಮತ್ತು ವಿ.ಮಧುಕುಮಾರ್ ಹೆಸರಿನ ಮುಂದೆ 25 ಲಕ್ಷ ರೂ. ಎಂದು ಬರೆಯಲಾಗಿದೆ.
ರಶೀದಿಗಳಲ್ಲಿ ಒಂದು ಬಿಸಾಹುಲಾಲ್ ಸಿಂಗ್ ಅವರ ಸಹಿಯನ್ನು ಹೊಂದಿದೆ. ಇದು ಚುನಾವಣಾ ವೆಚ್ಚವಾಗಿ 5 ಲಕ್ಷ ರೂ. ಪಡೆಯಲಾಗಿದೆ ಎಂದು ತೋರಿಸುತ್ತಿದೆ. ಅದೇ ರೀತಿ, ಆಗಿನ ಕಾಂಗ್ರೆಸ್ ರಾಜ್ಯ ಕೋಶಾಧಿಕಾರಿ ಗೋವಿಂದ್ ಸಿಂಗ್ ಅವರ ಸಹಿಯೊಂದಿಗೆ, 3 ಕೋಟಿ ರೂ. ಹಣ ವರ್ಗಾವಣೆಯಾಗಿರುವುದನ್ನು ತೋರಿಸುತ್ತಿದೆ. ಈ ವಿಚಾರವಾಗಿ, ಆರ್ಥಿಕ ಅಪರಾಧ ವಿಭಾಗ (ಇಒಡಬ್ಲ್ಯು) ಶೀಘ್ರದಲ್ಲಿ ಎಫ್ಐಆರ್ ದಾಖಲಿಸುವ ಸಾಧ್ಯತೆಯಿದೆ. ಆ ಬಳಿಕ ಪಟ್ಟಿಯಲ್ಲಿ ಹೆಸರಿರುವ ವ್ಯಕ್ತಿಗಳ ವಹಿವಾಟಿನ ಬಗ್ಗೆ ವಿಚಾರಣೆ ನಡೆಸಬಹುದು.
