ಮುಂಗೇರ್(ಬಿಹಾರ): ಬಿಹಾರ ವಿಧಾನಸಭೆ ಚುನಾವಣೆ ಫಲಿತಾಂಶ ಈಗಾಗಲೇ ಬಹಿರಂಗಗೊಂಡಿದ್ದು, ಎಲ್ಲ ಅಭ್ಯರ್ಥಿಗಳ ಹಣೆಬರಹ ಹೊರಬಿದ್ದಿದೆ. ಇದರ ಮಧ್ಯೆ ಕೆಲವೊಂದು ಚಿತ್ರ-ವಿಚಿತ್ರ ಫಲಿತಾಂಶ ಬಹಿರಂಗಗೊಂಡಿವೆ.
ಬಿಹಾರದ ಜಮಾಲ್ಪುರ್ ವಿಧಾನಸಭೆ ಕ್ಷೇತ್ರದಲ್ಲಿ ಎನ್ಸಿಪಿ ಅಭ್ಯರ್ಥಿಯಾಗಿ ಕಣಕ್ಕಿಳಿದಿದ್ದ ಇಂದ್ರದೇವ್ ದಾಸ್ ಅವರಿಗೆ ಕೇವಲ 2 ವೋಟ್ ಬಿದ್ದಿವೆ. ವಿಶೇಷವೆಂದರೆ ಇವರ ಮನೆಯಲ್ಲಿ 18 ಮತದಾರರಿದ್ದು, ಎಲ್ಲರೂ ಬೂತ್ ಸಂಖ್ಯೆ 177ರಲ್ಲಿ ಮತದಾನ ಮಾಡಿದ್ದರು. ಆದರೆ, ಮತ ಎಣಿಕೆ ಮಾಡಿದಾಗ ಕೇವಲ 2 ಮತಗಳು ಇವರ ಪರವಾಗಿ ಚಲಾವಣೆಗೊಂಡಿವೆ. ಇವಿಎಂ ಮಷಿನ್ನಲ್ಲಿ ಆಗಿರುವ ತೊಂದರೆಯಿಂದ ಈ ರೀತಿಯಾಗಿ ಆಗಿದೆಯಾ ಅಥವಾ ಬೇರೆ ಪಕ್ಷಕ್ಕೆ ಅವರು ವೋಟ್ ಹಾಕಿದ್ದಾರಾ ಎಂಬ ಸ್ಪಷ್ಟ ಚಿತ್ರಣ ಗೊತ್ತಾಗಿಲ್ಲ.
ಚುನಾವಣೆಯಲ್ಲಿ ಕಳೆದ ಅನೇಕ ದಿನಗಳಿಂದ ಇತನ ಪರವಾಗಿ ಕುಟುಂಬಸ್ಥರು ಪ್ರಚಾರ ನಡೆಸಿದ್ದರು. ಆದರೆ ಮತದಾನದ ವೇಳೆ ಈ ರೀತಿಯಾಗಿ ಆಗಿರುವುದಕ್ಕೆ ಪ್ರಮುಖ ಕಾರಣ ಏನು ಎಂಬುದು ತಿಳಿದು ಬಂದಿಲ್ಲ ಎಂದು ಇಂದ್ರದೇವ್ ದಾಸ್ ಹೇಳಿಕೊಂಡಿದ್ದಾರೆ. ಇದರ ಜತೆಗೆ ತಮಗೆ ಆಗಿರುವ ಮೋಸದ ವಿರುದ್ಧ ಅವರು ಕೋರ್ಟ್ ಮೆಟ್ಟಿಲೇರಲು ತಯಾರಿ ನಡೆಸಿರುವುದಾಗಿ ಹೇಳಿದ್ದಾರೆ.
