ಕಾಂಗ್ರಾ(ಹಿಮಾಚಲ ಪ್ರದೇಶ): ಕೊರೊನಾ ಸೋಂಕು ಹರಡುವಿಕೆ ಜೋರಾಗಿರುವ ಕಾರಣ ಮಕ್ಕಳು ಶಾಲೆಗೆ ಹೋಗದಂತಹ ಪರಿಸ್ಥಿತಿ ಇದೆ. ಹೀಗಾಗಿ ಕೆಲ ರಾಜ್ಯಗಳ ಸರ್ಕಾರಗಳು ಆನ್ಲೈನ್ ಶಿಕ್ಷಣಕ್ಕೆ ಹೆಚ್ಚು ಆದ್ಯತೆ ನೀಡುತ್ತಿವೆ.
ಹಿಮಾಚಲ ಪ್ರದೇಶದ ಕಾಂಗ್ರಾ ಜಿಲ್ಲೆಯ ಗುಮ್ಮಾರ್ ಪಂಚಾಯಿತಿ ವ್ಯಾಪ್ತಿಯ ಗ್ರಾಮದಲ್ಲಿನ ಕುಟುಂಬವೊಂದು ತಮ್ಮ ಮಕ್ಕಳಿಗೆ ಸ್ಮಾರ್ಟ್ಫೋನ್ ಕೊಡಿಸುವ ಉದ್ದೇಶದಿಂದ ಮನೆಗೆ ಆಧಾರವಾಗಿದ್ದ ಹಸು ಮಾರಾಟ ಮಾಡಿದೆ.
ಮಕ್ಕಳು ಆನ್ಲೈನ್ ಮೂಲಕ ಶಿಕ್ಷಣ ಪಡೆಯಲು ಸ್ಮಾರ್ಟ್ಫೋನ್ ಇರಲಿಲ್ಲ. ಹೀಗಾಗಿ, ಕೇವಲ 6 ಸಾವಿರ ರೂಪಾಯಿಗೆ ಹಸು ಮಾರಾಟ ಮಾಡಿ ಮೊಬೈಲ್ ಖರೀದಿಸಿದ್ದೇವೆ ಎಂದು ಮಕ್ಕಳ ತಂದೆ ಕುಲ್ದೀಪ್ ಹೇಳಿದ್ದಾರೆ.
ತೀರ ಬಡತನದಲ್ಲಿರುವ ಈ ಕುಟುಂಬ, ಒಪ್ಪೊತ್ತಿನ ಊಟಕ್ಕೂ ಪರದಾಡುತ್ತಿದೆ. ಹಸುವಿನ ಹಾಲು ಮಾರಾಟದಿಂದ ಬಂದ ಹಣದಿಂದ ದಿನನಿತ್ಯದ ಅಗತ್ಯ ವಸ್ತುಗಳನ್ನು ಖರೀದಿಸುವುದಾಗಿ ಕುಟುಂಬ ಹೇಳುತ್ತಿದೆ.
ಕುಲ್ದೀಪ್ ಅವರಿಗೆ ಎರಡು ಗಂಡು ಮಕ್ಕಳು ಹಾಗೂ ಓರ್ವ ಹೆಣ್ಣು ಮಗಳಿದ್ದಾಳೆ. ಈ ಮಕ್ಕಳು 4 ಹಾಗೂ 2ನೇ ತರಗತಿಯಲ್ಲಿ ವ್ಯಾಸಂಗ ಮಾಡುತ್ತಿದ್ದಾರೆ. ಇಷ್ಟು ದಿನ ಪಕ್ಕದ ಮನೆಗೆ ಹೋಗಿ ಅವರು ವಿದ್ಯಾರ್ಜನೆ ಮಾಡುತ್ತಿದ್ದರು. ಆದರೆ ಅದು ಸಾಧ್ಯವಾಗದ ಕಾರಣ ಹಸು ಮಾರಾಟ ಮಾಡಿ ಸ್ಮಾರ್ಟ್ಫೋನ್ ತೆಗೆದುಕೊಂಡು ಬಂದಿದ್ದಾರೆ.
ಇದೇ ವೇಳೆ ಗ್ರಾಮ ಪಂಚಾಯತಿ ವಿರುದ್ಧ ಹರಿಹಾಯ್ದಿರುವ ಕುಲ್ದೀಪ್, ಬಿಪಿಎಲ್ ಕಾರ್ಡ್ನಿಂದಲೂ ತಮ್ಮ ಹೆಸರು ತೆಗೆದಿದ್ದು, ನರೇಗಾ ಯೋಜನೆಯಿಂದಲೂ ಸರಿಯಾದ ಕೆಲಸ ಸಹ ಸಿಗುತ್ತಿಲ್ಲ ಎಂದು ಸಮಸ್ಯೆ ಹೇಳಿಕೊಂಡರು.
