ಮುಂಬೈನಲ್ಲಿ ಜಾರಕಿಹೊಳಿ ಮನವೊಲಿಕೆ ಯತ್ನ: 2 ದಿನದಲ್ಲಿ ಒಳ್ಳೆ ಸುದ್ದಿ ಕೊಡ್ತೀವಿ ಅಂದ್ರು ಮಹೇಂದ್ರ ಸಿಂಘಿ

ಮುಂಬೈಗೆ ತೆರಳಿರುವ ರೆಬಲ್ ಶಾಸಕ ರಮೇಶ್​ ಜಾರಕಿಹೊಳಿ ಅವರನ್ನು ಅಲ್ಲಿನ ಶಾಸಕ ಹಾಗೂ ಕಾಂಗ್ರೆಸ್​ ಅಲ್ಪಸಂಖ್ಯಾತ ಘಟಕದ ಅಧ್ಯಕ್ಷ ಮಹೇಂದ್ರ ಸಿಂಘಿ ಭೇಟಿ ಮಾಡಿ, ಮಾತುಕತೆ ನಡೆಸಿದರು. ಈ ವೇಳೆ, ಇದು ನಮ್ಮ ಮನೆಯ ವಿಚಾರ, ಮಾಧ್ಯಮದೊಂದಿಗೆ ಹಂಚಿಕೊಳ್ಳಲು ಆಗಲ್ಲ ಎಂದು ಹೇಳಿದರು.

ಮುಂಬೈ: ರಾಜ್ಯ ಸರ್ಕಾರಕ್ಕೆ ಶಾಕ್​ ನೀಡಿ, ಮುಂಬೈಗೆ ತೆರಳಿರುವ ರೆಬಲ್ ಶಾಸಕ ರಮೇಶ್​ ಜಾರಕಿಹೊಳಿ ಅವರನ್ನು ಅಲ್ಲಿನ ಶಾಸಕ ಹಾಗೂ ಕಾಂಗ್ರೆಸ್​ ಅಲ್ಪಸಂಖ್ಯಾತ ಘಟಕದ ಅಧ್ಯಕ್ಷ ಮಹೇಂದ್ರ ಸಿಂಘಿ ಭೇಟಿ ಮಾಡಿ, ಮಾತುಕತೆ ನಡೆಸಿದರು.

ಆನಂತರ ಮಾಧ್ಯಮದ ಜತೆ ಮಾತನಾಡಿದ ಅವರು, ರಮೇಶ್​ ಜಾರಕಿಹೊಳಿ ನನ್ನ ಮಿತ್ರ. ಅವರು ಮುಂಬೈಗೆ ಬಂದಿದ್ದರಿಂದ ಭೇಟಿಯಾಗಲು ಬಂದಿದ್ದೆ. ಇದು ನಮ್ಮ ಮನೆಯ ವಿಚಾರ, ಮಾಧ್ಯಮದೊಂದಿಗೆ ಹಂಚಿಕೊಳ್ಳಲು ಆಗಲ್ಲ ಎಂದು ಹೇಳಿದರು.

ಇಬ್ಬರು ಪಾಸಿಟಿವ್ ವಿಚಾರಗಳ ಕುರಿತು ಮಾತನಾಡಿದ್ದೇವೆ. ಕರ್ನಾಟಕದ ಹಿತದೃಷ್ಟಿಯಿಂದಲೇ ಈ ಚರ್ಚೆ ನಡೆದಿದೆ. ಇನ್ನೆರಡು ದಿನಗಳಲ್ಲಿ ಇದೆಲ್ಲವೂ ಸರಿಹೋಗಲಿದೆ. ಮಾಧ್ಯಮದವರು ಹೆಚ್ಚು ತಲೆಕೆಡಿಸಿಕೊಳ್ಳಬೇಡಿ. ನಿಮಗೆ ಒಳ್ಳೆಯ ಸುದ್ದಿಯನ್ನೇ ಕೊಡ್ತೀವಿ ಎಂದರು.

ಸದ್ಯ ರಮೇಶ್​ ಅವರೊಬ್ಬರನ್ನು ಮಾತ್ರ ಭೇಟಿ ಮಾಡಿದ್ದೇನೆ. ಬೇರೆ ಶಾಸಕರನ್ನು ಸಂಪರ್ಕಿಸಿಲ್ಲ ಎಂದರು.