ಮಹಾರಾಷ್ಟ್ರದಲ್ಲಿ ಹುಲಿ ದಾಳಿಗೆ ಮಹಿಳೆ ಬಲಿ

ಮಹಾರಾಷ್ಟ್ರದ ಚಂದ್ರಪುರದ ತಡೋಬಾ ಅಂಧಾರಿ ಟೈಗರ್ ರಿಸರ್ವ್‌ನಲ್ಲಿ ಲೀಲಾಬಾಯಿ ಜಿವ್ಟೋಡ್ ಎಂಬ 63 ವರ್ಷದ ಮಹಿಳೆಯನ್ನು ಹುಲಿ ಬಲಿ ತೆಗೆದುಕೊಂಡಿದೆ. ಮೃತರು ಸತಾರಾ ಕಾಡಿನಲ್ಲಿ (ಸಂರಕ್ಷಿತ ಅರಣ್ಯ ಪ್ರದೇಶ) ಕೆಲವು ಟೆಂಡೂ ಎಲೆಗಳನ್ನು ತರಲು ತೆರಳಿದ್ದರು ಎಂದು ತಿಳಿದುಬಂದಿದೆ.

ಚಂದ್ರಪುರ: ಮಹಾರಾಷ್ಟ್ರದ ಚಂದ್ರಪುರ ಜಿಲ್ಲೆಯ ತಡೋಬಾ ಅಂಧಾರಿ ಟೈಗರ್ ರಿಸರ್ವ್​ (ಟಿಎಟಿಆರ್) ವ್ಯಾಪ್ತಿ ಪ್ರದೇಶದಲ್ಲಿ 63 ವರ್ಷದ ಮಹಿಳೆಯನ್ನು ಹುಲಿ ಸಾಯಿಸಿದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಮಂಗಳವಾರ ಮುಂಜಾನೆ ಈ ಘಟನೆ ನಡೆದಿದ್ದು, ಮೃತರನ್ನು ಕೋಲಾರ ಗ್ರಾಮದ ನಿವಾಸಿ ಲೀಲಾಬಾಯಿ ಜಿವ್ಟೋಡ್ ಎಂದು ಗುರುತಿಸಲಾಗಿದೆ. ಮೃತರು ಟೆಂಡೂ ಎಲೆಗಳನ್ನು ತರಲು ಸತಾರಾ ಕಾಡಿಗೆ (ಸಂರಕ್ಷಿತ ಅರಣ್ಯ ಪ್ರದೇಶ) ತೆರಳಿದ್ದರು. ಈ ವೇಳೆ ಹುಲಿ ದಾಳಿ ಮಾಡಿದೆ ಎಂದು ಮುಖ್ಯ ಅರಣ್ಯ ಸಂರಕ್ಷಣಾಧಿಕಾರಿ (ಟಿಎಟಿಆರ್) ಎನ್.ಆರ್. ಪ್ರವೀಣ್ ಹೇಳಿದ್ದಾರೆ.

ಮಹಿಳೆಯ ಶವವನ್ನು ಮೀಸಲು ಕೇಂದ್ರ ವಲಯದಿಂದ ವಶಪಡಿಸಿಕೊಳ್ಳಲಾಗಿದೆ. ಈ ಪ್ರದೇಶದಲ್ಲಿ ಹುಲಿಗಳಿವೆ ಎಂದು ಎಚ್ಚರಿಸಿದ್ದರೂ, ಗ್ರಾಮಸ್ಥರು ಟೆಂಡೂ ಎಲೆಗಳನ್ನು ಸಂಗ್ರಹಿಸಲು ಕಾಡಿಗೆ ಹೋಗುತ್ತಿದ್ದಾರೆ ಎಂದು ಅರಣ್ಯ ಸಂರಕ್ಷಣಾಧಿಕಾರಿ ಹೇಳಿದ್ದಾರೆ.

ಸತಾರಾ ಗ್ರಾಮ ಪ್ರದೇಶದಲ್ಲಿ ವರದಿಯಾದ ಮಾನವ-ಪ್ರಾಣಿ ಸಂಘರ್ಷದ ಎರಡನೇ ಘಟನೆ ಇದು ಎಂದು ಅವರು ಹೇಳಿದರು. ಈ ವರ್ಷ ಚಂದ್ರಪುರ ಜಿಲ್ಲೆಯಲ್ಲಿ ಹುಲಿ ದಾಳಿಯಲ್ಲಿ ಕನಿಷ್ಠ 11 ಜನರು ಸಾವನ್ನಪ್ಪಿದ್ದಾರೆ.