ಕೋವಿಡ್​ ಸಾವು ಮರೆ ಮಾಚಲಾಗಿದೆ : ಮಹಾ ಸರ್ಕಾರದ ವಿರುದ್ಧ ಫಡ್ನವಿಸ್​ ವಾಗ್ದಾಳಿ

ಮುಂಬೈ ಮಹಾನಗರದಲ್ಲಿ ಸಂಭವಿಸಿದ ಹಲವಾರು ಕೋವಿಡ್​ ಸಂಬಂಧಿತ ಸಾವುಗಳನ್ನು ವರದಿಯಲ್ಲಿ ಮರೆ ಮಾಚಲಾಗಿದೆ ಎಂದು ಮಾಜಿ ಸಿಎಂ ದೇವೇಂದ್ರ ಫಡ್ನವಿಸ್​ ಗಂಭೀರ ಆರೋಪ ಮಾಡಿದ್ದು, ಈ ಸಂಬಂಧ ಸಿಎಂಗೆ ಪತ್ರ ಬರೆದಿದ್ದಾರೆ.

ಮುಂಬೈ : ನಗರದಲ್ಲಿ ಕೊರೊನಾ ಅಟ್ಟಹಾಸ ಮೆರೆಯುತ್ತಿರುವ ಮಧ್ಯೆಯೇ ಪ್ರತಿಪಕ್ಷ ನಾಯಕ ದೇವೇಂದ್ರ ಫಡ್ನವಿಸ್​ ಗಂಭೀರ ಆರೋಪವೊಂದನ್ನು ಮಾಡಿದ್ದು, ಮಹಾನಗರದ ಪಾಲಿಕೆ ಸುಮಾರು 950 ಕೋವಿಡ್ ಸಾವುಗಳನ್ನು ಮರೆಮಾಚಿದೆ ಎಂದಿದ್ದಾರೆ.

ಈ ಬಗ್ಗೆ ಸಿಎಂ ಉದ್ದವ್ ಠಾಕ್ರೆಗೆ ಪತ್ರ ಬರೆದಿರುವ ಅವರು, ಕೋವಿಡ್​ ಸಂಬಂಧಿತ ಸಾವುಗಳ ಅಂಕಿ ಅಂಶ ಘೋಷಿಸುವ ಮೊದಲು ಅದು ಬೃಹತ್​ ಮುಂಬೈ ಮಹಾನಗರದ ಪಾಲಿಕೆಯ ಡೆತ್​ ಆಡಿಟ್​ ಸಮಿತಿಗೆ ಹೋಗುತ್ತದೆ. ಬಳಿಕ ಘೋಷಣೆ ಮಾಡಲಾಗುತ್ತದೆ. ಆದರೆ, ಡೆತ್​ ಆಡಿಟ್​ ಸಮಿತಿ ಸುಮಾರು 950 ಜನರ ಸಾವನ್ನು ಕೋವಿಡ್​ ಸಾವಲ್ಲ ಎಂದು ಹೇಳಿದೆ. ಐಸಿಎಂಆರ್​ ಮಾರ್ಗ ಸೂಚಿ ಪ್ರಕಾರ ಅವು ಕೋವಿಡ್​ ಸಾವುಗಳೇ ಆಗಿವೆ. ಆದರೆ, ಸಮಿತಿಯ ವರದಿಯಲ್ಲಿ ಮಾತ್ರ ಅವುಗಳನ್ನು ಉಲ್ಲೇಖಿಸಲಾಗಿಲ್ಲ ಎಂದು ಆರೋಪಿಸಿದ್ದಾರೆ.

ಇದೊಂದು ಕ್ಷಮಿಸಲಾರದ ನಿರ್ಲಕ್ಷ್ಯ. ಅಷ್ಟೊಂದು ಮಟ್ಟದಲ್ಲಿ ಕೋವಿಡ್​ ಸಾವುಗಳನ್ನು ಮರೆಮಾಚುವ ಹಿಂದಿನ ಉದ್ದೇಶವಾದರೂ ಏನು ಎಂದು ತಿಳಿಯಬೇಕು. ಈ ಕುರಿತು ಸೂಕ್ತ ತನಿಖೆಯಾಗಬೇಕು ಎಂದು ಫಡ್ನವಿಸ್​ ಆಗ್ರಹಿಸಿದ್ದಾರೆ.