ನವದೆಹಲಿ: ಈಗಾಗಲೇ ಸೇನಾ ಮುಖ್ಯಸ್ಥ ಬಿಪಿನ್ ರಾವತ್ ಅವರು ಸೇನೆಯಲ್ಲಿ ಸಧೃಢತೆ ಬಗ್ಗೆ ಹೆಚ್ಚಿನ ಒತ್ತು ನೀಡುತ್ತಿದ್ದರೆ, ಇತ್ತ ನೈರುತ್ಯ ಸೇನಾ ಕಮಾಂಡರ್ ಲೆಫ್ಟಿನೆಂಟ್ ಜನರಲ್ ಅಲೋಕ್ ಕ್ಲೇರ್ ದೆಹಲಿಯಿಂದ ಜೈಪುರದ ತನಕ ಸೈಕಲ್ ತುಳಿಯುವ ಮೂಲಕ ಫಿಟ್ನೆಸ್ ಬಗ್ಗೆ ವಿಶೇಷ ಜಾಗೃತಿ ಮೂಡಿಸಿದ್ದಾರೆ.
"ಫಿಟ್ನೆಸ್ ಕುರಿತು ಜಾಗೃತಿ ಮೂಡಿಸುವ ಸಲುವಾಗಿ, ನೈರುತ್ಯ ಸೇನಾ ಕಮಾಂಡರ್ ಲೆಫ್ಟಿನೆಂಟ್ ಜನರಲ್ ಅಲೋಕ್ ಕ್ಲೇರ್, ಸೇನಾ ಸಿಬ್ಬಂದಿಯೊಡನೆ ದೆಹಲಿಯಿಂದ ಜೈಪುರಕ್ಕೆ ಸೈಕಲ್ ಮೂಲಕ ತೆರಳಿದ್ದಾರೆ" ಎಂದು ಸೇನಾ ಅಧಿಕಾರಿಗಳು ತಿಳಿಸಿದ್ದಾರೆ.
ಶನಿವಾರ ಮುಸ್ಸಂಜೆ ಹೊತ್ತಿಗೆ ದೆಹಲಿಯಿಂದ ಸೈಕಲ್ನಲ್ಲಿ ಹೊರಟ ಅಧಿಕಾರಿ ಭಾನುವಾರ ಬೆಳಗ್ಗೆ 8 ಗಂಟೆಗೆ ಜೈಪುರ ತಲುಪಿದ್ದಾರೆ. 270 ಕಿಲೋ ಮೀಟರ್ ದೂರ ಕ್ರಮಿಸಿ ಅವರು ಜೈಪುರದಲ್ಲಿ ತಮ್ಮ ಹೊಸ ನೇಮಕಾತಿಯ ಹುದ್ದೆಯ ಅಧಿಕಾರ ಸ್ವೀಕರಿಸಿದ್ದಾರೆ.
ಸೈನ್ಯದ ಫಿಟ್ಟೆಸ್ಟ್ ಜನರಲ್ಗಳಲ್ಲಿ ಅಲೋಕ್ ಕ್ಲೇರ್ ಒಬ್ಬರಾಗಿದ್ದಾರೆ. ಇತ್ತೀಚೆಗೆ ಅವರು, ತಮ್ಮ 58ನೇ ವಯಸ್ಸಿನಲ್ಲಿ ಪ್ಯಾರಾ ಜಂಪ್ ಮಾಡುವ ಮೂಲಕ ಗಮನಸೆಳೆದಿದ್ದರು.
