ನವದೆಹಲಿ: 2019ರ ಪುಲ್ವಾಮಾ ದಾಳಿ ಪ್ರಕರಣ ಕುರಿತಾಗಿ ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್ಐಎ) ಈಗಾಗಲೇ ಚಾರ್ಜ್‌ಶೀಟ್ ಸಲ್ಲಿಸಿದ್ದು, ದಾಳಿಯ ಹಿಂದೆ ಮೋಸ್ಟ್ ವಾಂಟೆಂಡ್ ಉಗ್ರ ಅಜರ್ ಮಸೂದ್ ಕೈವಾಡ ಇರುವುದು ಖಚಿತಪಡಿಸಿದೆ.
ಇದೀಗ ಮತ್ತೊಂದು ಮಹತ್ವದ ಮಾಹಿತಿ ಬಹಿರಂಗಗೊಂಡಿದ್ದು, ದಾಳಿಗೋಸ್ಕರ ಜೈಶ್-ಎ-ಮೊಹಮ್ಮದ್ ಉಗ್ರ ಸಂಘಟನೆ 1.85 ಲಕ್ಷ ರೂ ನೀಡಿ ಮಾರುತಿ ಇಕೋ ವಾಹನ ಖರೀದಿ ಮಾಡಿದ್ದು, ಅದರಲ್ಲಿ ಕೆಲವೊಂದು ಮಾರ್ಪಾಡು ಮಾಡಲು 35 ಸಾವಿರ ರೂ ಖರ್ಚು ಮಾಡಿತ್ತು ಎಂದು ತಿಳಿದು ಬಂದಿದೆ.
2019ರ ಪುಲ್ವಾಮಾ ದಾಳಿ: ಎನ್ಐಎ ಚಾರ್ಜ್ಶೀಟ್ನಲ್ಲಿ ಅಜರ್ ಮಸೂದ್ ಸೇರಿ 19 ಉಗ್ರರ ಹೆಸರು!
ಚಾರ್ಜ್ಶೀಟ್ನಲ್ಲಿ ಸಲ್ಲಿಕೆಯಾಗಿರುವ ಪ್ರಕಾರ 10 ಲಕ್ಷ ರೂ ಪಾಕ್ನಿಂದ ಐದು ಕಂತುಗಳಲ್ಲಿ ಜನವರಿಯಿಂದ ಫೆಬ್ರವರಿ ತಿಂಗಳಲ್ಲಿ ಉಗ್ರ ಮಸೂದ್ ಅಜರ್ ಅಲಿ ಸೋದರಳಿಯ ಉಮರ್ ಫಾರೂಖ್ ಅಕೌಂಟ್ಗೆ ವರ್ಗಾವಣೆಗೊಂಡಿದೆ. 2.25 ಲಕ್ಷ ರೂ. ಸ್ಫೋಟಕ ವಸ್ತು ಖರೀದಿ ಮಾಡಲು ಬಳಕೆ ಮಾಡಲಾಗಿದ್ದು, 35 ಸಾವಿರ ರೂ. ವೆಚ್ಚದ 4 ಕೆಜಿ ಅಲೋಮಿನಿಯಂ ಆನ್ಲೈನ್ ಮೂಲಕ ಆರ್ಡರ್ ಮಾಡಲಾಗಿದೆ ಎಂದು ಎನ್ಐಎ ಮಾಹಿತಿ ನೀಡಿದೆ.
ಕಳೆದ ಆಗಸ್ಟ್ 25ರಂದು ಜಮ್ಮು ನ್ಯಾಯಾಲಯಕ್ಕೆ ಸುಮಾರು 5 ಸಾವಿರ ಪುಟಗಳ ಚಾರ್ಜ್‌ಶೀಟ್ ಸಲ್ಲಿಕೆ ಮಾಡಲಾಗಿದ್ದು, ಸಿಆರ್ಪಿಎಫ್ ಪಡೆ ಮೇಲೆ ಭಯೋತ್ಪಾದಕ ದಾಳಿ ನಡೆದು 18 ತಿಂಗಳ ಬಳಿಕ ವರದಿ ಸಲ್ಲಿಕೆಯಾಗಿದೆ. ದಾಳಿ ನಡೆಯಲು ಮುಖ್ಯವಾಗಿ ಮಸೂದ್ ಅಜರ್ ಪ್ರಮುಖ ರೂವಾರಿ ಎಂದು ಇದರಲ್ಲಿ ಉಲ್ಲೇಖ ಮಾಡಲಾಗಿದೆ. ಉಳಿದಂತೆ ಇವರ ಸಹೋದರ ಅಬ್ದುಲ್ ಅಸ್ಗರ್,ಅಮರ್ ಅಲ್ವಿ ಹಾಗೂ ಸೋದರಳಿಯ ಉಮರ್ ಫಾರೂಖ್ ಹೆಸರು ಇದೆ. 2019ರ ಫೆಬ್ರವರಿ 14ರಂದು ನಡೆದಿದ್ದ ಆತ್ಮಾಹುತಿ ಬಾಂಬ್ ದಾಳಿಯಲ್ಲಿ 40 ಯೋಧರು ಹುತಾತ್ಮರಾಗಿದ್ದರು.
