ರೋಮ್: ಮಾನವರಿಗೆ ಕೋವಿಡ್-19 ವೈರಸ್ ಹರಡದಂತೆ ತಡೆಗಟ್ಟುವ ವ್ಯಾಕ್ಸಿನ್ ಅನ್ನು ಯಶಸ್ವಿಯಾಗಿ ಅಭಿವೃದ್ಧಿಪಡಿಸಿರುವುದಾಗಿ ಇಟಲಿಯ ಕೆಲ ಸಂಶೋಧಕರು ಹೇಳಿಕೊಂಡಿದ್ದಾರೆ. ವೈರಸ್ ಅನ್ನು ತಟಸ್ಥಗೊಳಿಸಬಲ್ಲ ವ್ಯಾಕ್ಸಿನ್ ಕಂಡುಹಿಡಿದಿರುವುದಾಗಿ ಕೊರೊನಾ ವೈರಸ್ ಕಾಯಿಲೆ ಔಷಧಿಯ ಕುರಿತು ಸಂಶೋಧನೆಗಳನ್ನು ನಡೆಸುತ್ತಿರುವ ಇಟಲಿಯ ಟಾಕಿಸ್ ಸಂಸ್ಥೆಯ ಸಿಇಓ ಲುಯಿಗಿ ಆರಿಸಿಚ್ಚಿಯೊ ಹೇಳಿದ್ದಾರೆ ಎಂದು ಅರಬ್ ನ್ಯೂಸ್ ವರದಿ ಮಾಡಿದೆ.
"ಇಟಲಿಯಲ್ಲಿ ತಯಾರಿಸಲಾದ ಈ ವ್ಯಾಕ್ಸಿನ್ ಪ್ರಾಥಮಿಕ ಪರೀಕ್ಷಾ ಹಂತದಲ್ಲಿದೆ. ಬೇಸಿಗೆಯ ನಂತರ ಮಾನವರ ಮೇಲೆ ವ್ಯಾಕ್ಸಿನ್ ಪ್ರಯೋಗಿಸಿ ನೋಡಲಾಗುವುದು." ಎಂದು ಆರಿಸಿಚ್ಚಿಯೊ ಹೇಳಿರುವುದಾಗಿ ಇಟಲಿಯ ನ್ಯೂಸ್ ಏಜೆನ್ಸಿ ANSA ತಿಳಿಸಿದೆ.
"ಸ್ಪಾಲ್ಲಾಂಜಾನಿ ಆಸ್ಪತ್ರೆಯ ಮೂಲಗಳ ಪ್ರಕಾರ, ನಮ್ಮ ವ್ಯಾಕ್ಸಿನ್ ಕೊರೊನಾ ವೈರಸ್ ಅನ್ನು ನಿಷ್ಕ್ರಿಯಗೊಳಿಸುತ್ತದೆ ಎಂಬುದನ್ನು ಸಾಬೀತು ಪಡಿಸಿದ್ದೇವೆ. ಮಾನವರ ದೇಹದಲ್ಲೂ ಇದೇ ಪ್ರಕ್ರಿಯೆ ನಡೆಯುವ ನಿರೀಕ್ಷೆ ಇದೆ." ಎಂದು ಅವರು ಹೇಳಿದ್ದಾರೆ.
ವ್ಯಾಕ್ಸಿನ್ ಅನ್ನು ಇಲಿಗಳ ಮೇಲೆ ಪ್ರಯೋಗಿಸಲಾಗಿದ್ದು, ಇಲಿಗಳ ದೇಹದಲ್ಲಿ ಕೊರೊನಾ ಪ್ರತಿಕಾಯಗಳು ಹುಟ್ಟಿಕೊಂಡು ವೈರಸ್ ತಟಸ್ಥಗೊಂಡಿದ್ದು ಸಾಬೀತಾಗಿದೆ. ತಾವು ತಯಾರಿಸಿದ ಒಟ್ಟು ಐದು ಮಾದರಿಗಳು ಉತ್ತಮವಾಗಿ ಕೆಲಸ ಮಾಡುತ್ತಿದ್ದು, ಅದರಲ್ಲಿ ಅತಿ ಹೆಚ್ಚು ಪರಿಣಾಮಕಾರಿಯಾದ ಎರಡು ಮಾದರಿಯ ವ್ಯಾಕ್ಸಿನ್ಗಳನ್ನು ಮುಂದಿನ ಸಂಶೋಧನೆಗಳಿಗಾಗಿ ಆರಿಸಲಾಗಿದೆ ಎಂದು ಸಂಶೋಧಕರು ತಿಳಿಸಿದ್ದಾರೆ.
