ವಾಷಿಂಗ್ಟನ್: ಇರಾನ್ ಮತ್ತೊಮ್ಮೆ ಇರಾಕ್ನಲ್ಲಿರುವ ಸೇನಾನೆಲೆಗಳ ಮೇಲೆ ದಾಳಿ ಮಾಡಿದೆ ಎಂದು ಅಮೆರಿಕಾ ರಕ್ಷಣಾ ಕಾರ್ಯದರ್ಶಿ ಮಾರ್ಕ್ ಎಸ್ಪರ್ ಆರೋಪಿಸಿದ್ದಾರೆ. ಸುಮಾರು 16 ಬ್ಯಾಲಿಸ್ಟಿಕ್ ಮಿಸೈಲ್ಗಳನ್ನು ಇರಾನ್ನ ಮೂರು ಸ್ಥಳಗಳಿಂದ ಇರಾಕ್ನಲ್ಲಿರುವ ಅಮೆರಿಕನ್ ವಾಯುನೆಲೆಗಳ ಮೇಲೆ ದಾಳಿ ನಡೆಸಿದೆ ಎಂದು ಮಾರ್ಕ್ ಎಸ್ಪರ್ ಸ್ಪಷ್ಟಪಡಿಸಿದ್ದಾರೆ.
ಅಮೆರಿಕಾದ ಜಂಟಿ ಸೇನಾ ಅಧ್ಯಕ್ಷ ಮಾರ್ಕ್ ಮಿಲ್ಲೆ ಅವರೊಂದಿಗಿನ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಎಸ್ಪರ್ ಒಟ್ಟು 16 ಮಿಸೈಲ್ಗಳನ್ನು ಇರಾನ್ ಉಡಾವಣೆ ಮಾಡಿದೆ. ಅದರಲ್ಲಿ 11 ಮಿಸೈಲ್ಗಳು ಐನ್ ಅಲ್ ಅಸಾದ್ ನ ವಾಯುನೆಲೆಗೆ ಅಪ್ಪಳಿಸಿವೆ. ಒಂದು ಮಿಸೈಲ್ ಇಬ್ರಿಲ್ ಬಳಿ ಬಿದ್ದಿದೆ ಎಂದು ಹೇಳಿದ್ದಾರೆ.
ಇದೇ ವೇಳೆ ಮಾತನಾಡಿದ ಅಮೆರಿಕಾದ ಜಂಟಿ ಸೇನಾ ಅಧ್ಯಕ್ಷ ಮಾರ್ಕ್ ಮಿಲ್ಲೆ '' ನಮಗೆ ಗೊತ್ತಿರುವುದು ಹಾಗೂ ನೋಡಿದ್ದರ ಆಧಾರದ ಮೇಲೆ ದಾಳಿಯ ಪರಿಣಾಮಗಳನ್ನು ಹೇಳುತ್ತಿದ್ದೇವೆ. ಅಮೆರಿಕಾ ಸೇನೆಯ ರಕ್ಷಣಾ ಕೌಶಲ್ಯ ಅನಾಹುತದ ತೀವ್ರತೆಯನ್ನು ಕಡಿಮೆ ಮಾಡಿವೆ'' ಎಂದು ಉಲ್ಲೇಖಿಸಿದರು. ಜೊತೆಗೆ ಇರಾಕ್ನಲ್ಲಿ ಇರಾನ್ ದಾಳಿಯಿಂದ ಆದ ಅನಾಹುತಗಳ ಬಗ್ಗೆ ಚರ್ಚೆ ಹಾಗೂ ಪರಿಹಾರ ಕಾರ್ಯಗಳ ಸಭೆಗೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಗೈರಾಗಿದ್ದರು ಎಂದು ಸ್ಪಷ್ಟಪಡಿಸಿದ್ದಾರೆ.
ಈ ಮಿಸೈಲ್ ದಾಳಿಯಲ್ಲಿ ಟೆಂಟ್ಗಳು, ಕೆಲ ರಸ್ತೆಗಳು, ಪಾರ್ಕಿಂಗ್ ಪ್ರದೇಶಗಳು ಹಾಗೂ ಒಂದು ಹೆಲಿಕಾಪ್ಟರ್ಗೆ ಹಾನಿಯಾಗಿದೆ ಎಂದು ವರದಿಯಾಗಿದೆ. ಯಾವುದೇ ಪ್ರಾಣಾಪಾಯ ಜರುಗಿಲ್ಲ. ಇರಾನ್ ಇಸ್ಲಾಮಿಕ್ ರೆವಲ್ಯೂಷನ್ ಗಾರ್ಡ್ ಕಾರ್ಪ್ಸ್ ಈ ದಾಳಿಗಳ ಹೊಣೆ ಹೊತ್ತಿದೆ. ಈ ಮೂಲಕ ಕಾಸಿಂ ಸೊಲೈಮಾನಿ ಹತ್ಯೆ ಪ್ರತೀಕಾರ ತೀರಿಸಿಕೊಳ್ಳುವುದಾಗಿ ಹೇಳಿಕೊಂಡಿದೆ.
