ಶೈತ್ಯಕಾರಕ ಹೊಂದಿರುವ ಎಸಿಗಳ ಆಮದು ಭಾರತದಲ್ಲಿ ಸಂಪೂರ್ಣ ಬ್ಯಾನ್..!

ದೇಶದಲ್ಲಿ ಅತ್ಯಂತ ಪ್ರಮುಖ ಹಬ್ಬಗಳು ಬರಲಿದ್ದು, ಈ ವೇಳೆ ಎಲೆಕ್ಟ್ರಾನಿಕ್ ಸರಕುಗಳ ಮೇಲೆ ಭರ್ಜರಿ ಕೊಡುಗೆಗಳನ್ನು ನೀಡಲು ಮುಂದಾಗುವ ವಾಣಿಜ್ಯ ಮಳಿಗೆಗಳಿಗೆ ಕೇಂದ್ರ ಸರ್ಕಾರ ಶಾಕ್ ನೀಡಿದೆ.

ನವದೆಹಲಿ: ಶೈತ್ಯಕಾರಕ ಹೊಂದಿರುವ ಎಲ್ಲಾ ಹವಾನಿಯಂತ್ರಣ ಸಾಧನ(ಎಸಿ)ಗಳ ಆಮದನ್ನು ಸಂಪೂರ್ಣವಾಗಿ ರದ್ದು ಮಾಡಿ ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ಇಲಾಖೆ ಅಧಿಸೂಚನೆ ಹೊರಡಿಸಿದೆ.

ಈ ಮೊದಲು ಹವಾನಿಯಂತ್ರಣ ಸಾಧನಗಳ ಆಮದು ನಿಯಮದಲ್ಲಿ ಹಾರ್ಮೊನೈಸ್ಡ್ ಸಿಸ್ಟಮ್​ ಕೋಡ್ (HS Code) 84151010 ಮತ್ತು 84151090 ಇರುವ ಎಸಿಗಳ ಆಮದು ''ಉಚಿತ'' ಎಂಬುದನ್ನು ''ನಿಷೇಧಿಸಲ್ಪಟ್ಟಿದೆ'' ಎಂದು ತಿದ್ದುಪಡಿ ಮಾಡಲಾಗಿದೆ ಎಂದು ಇಲಾಖೆ ಸ್ಪಷ್ಟನ ನೀಡಿದೆ.

ಶೈತ್ಯಕಾರಕಗಳನ್ನು ಹೊಂದಿರುವ ವಿಂಡೋ ಮತ್ತು ಸ್ಪ್ಲಿಟ್ ( window and split) ಎಸಿಗಳು ಈ ಮೂಲಕ ಭಾರತಕ್ಕೆ ಆಮದು ಮಾಡಿಕೊಳ್ಳುವುದು ರದ್ದಾಗಲಿದೆ.

ಭಾರತದಲ್ಲಿ ಅತ್ಯಂತ ಪ್ರಮುಖ ಹಬ್ಬಗಳು ಆರಂಭವಾಗಲಿದ್ದು, ಮಾರುಕಟ್ಟೆಗಳಲ್ಲಿ ಎಲೆಕ್ಟ್ರಾನಿಕ್ ಸರಕುಗಳ ಮೇಲೆ ಆಫರ್​ಗಳನ್ನು ಹೆಚ್ಚಾಗಿ ನೀಡುವ ವೇಳೆಯೇ ಎಸಿಗಳ ಆಮದನ್ನು ಕೇಂದ್ರ ಸರ್ಕಾರ ರದ್ದು ಮಾಡಿರುವುದನ್ನು ಗಮನಿಸಬೇಕಿದೆ.