ನವದೆಹಲಿ: ಅಂಫಾನ್‌ ಚಂಡಮಾರುತದಿಂದ ಉಂಟಾಗುವ ಪರಿಹಾರ ಕಾರ್ಯಾಚರಣೆಗೆ ವಾಯು ಸೇನೆ ಮತ್ತಷ್ಟು ಅಲರ್ಟ್‌ ಆಗಿದೆ. ಅಗತ್ಯ ಪರಿಹಾರಗಳನ್ನು ಒದಗಿಸಲು ಎಲ್ಲಾ ರೀತಿಯ ಸಿದ್ಧತೆಗಳನ್ನು ಮಾಡಿಕೊಂಡಿದ್ದು, ಪರಿಹಾರ ಸಾಮಗ್ರಿಗಳ ಪೂರೈಕೆಗಾಗಿ ಸೇನಾ ವಿಮಾನಗಳನ್ನು ಕಾರ್ಯ ಸನ್ನದ್ಧಗೊಳಿಸಿದೆ. ಇದಕ್ಕಾಗಿ 56 ಬೃಹತ್ ವಿಮಾನಗಳು, 25 ಸಣ್ಣ ವಿಮಾನಗಳು ಹಾಗೂ 31 ಹೆಲಿಕಾಪ್ಟರ್‌ಗಳನ್ನು ವಿಪತ್ತು ಕಾರ್ಯಾಚರಣೆಗಾಗಿ ಗುರುತಿಸಿದೆ.
ತನ್ನ ವಾಯು ನೆಲೆಗಳಲ್ಲಿರುವ ವಿಮಾನಗಳು, ಹೆಲಿಕಾಪ್ಟರ್‌ಗಳಲ್ಲಿ ಹೆಚ್ಚಿನ ಪರಿಹಾರ ಸಾಮಗ್ರಿಗಳನ್ನು ಸಾಗಿಸಲು ಮುಂದಾಗಿದೆ. ತುರ್ತು ಸ್ಪಂದನೆಗಾಗಿ ಸೇನಾ ಪೈಲಟ್‌ಗಳು ಸಿದ್ಧರಿದ್ದಾರೆ. ಮಾತ್ರವಲ್ಲದೇ, ಆಡಳಿತಾಧಿಕಾರಿಗಳು ಮತ್ತು ಎನ್‌ಡಿಆರ್‌ಎಫ್‌ನ ಸಮನ್ವಯತೆಯಲ್ಲಿ ವಾಯು ಸೇನೆಯ ಮುಖ್ಯ ಕಚೇರಿಯಲ್ಲಿ ಬಿಕ್ಕಟ್ಟು ನಿರ್ವಹಣೆ ದಳ ಕಾರ್ಯ ಪ್ರವೃತ್ತವಾಗಿದೆ.
ಮೇ 21 ರಂದು ಎರಡು ಸಿ-130 ವಿಮಾನಗಳ ಮೂಲಕ ಪುಣೆ ಮತ್ತು ಅರಕೋಣಂನಿಂದ ನಾಲ್ಕು ಎನ್‌ಡಿಆರ್‌ಎಫ್‌ ತಂಡಗಳನ್ನು ಕೋಲ್ಕತ್ತಾಗಿ ಏರ್‌ಲಿಫ್ಟ್‌ ಮಾಡಲಾಗಿದೆ. ಜೊತೆಗೆ ಪರಿಹಾರಕ್ಕೆ ಬೇಕಿರುವ 8.6 ಟನ್‌ ಉಪಕರಣಗಳು ಕೋಲ್ಕತ್ತಾಗೆ ರವಾನಿಸಿವೆ.
ಪಶ್ಚಿಮ ಬಂಗಾಳದಲ್ಲಿ ಅಂಫಾನ್‌ ಚಂಡಮಾರುತ ತನ್ನ ರೌದ್ರನರ್ತನವನ್ನು ಪ್ರದರ್ಶಿಸಿ ಈವರೆಗೆ 83 ಮಂದಿಯನ್ನು ಬಲಿ ಪಡೆದಿದೆ. ಕರಾವಳಿ ತೀರದಲ್ಲಿ 4 ಜಿಲ್ಲೆಗಳಲ್ಲಿ ಬಿರುಗಾಳಿ ಸಹಿತ ಸುರಿದ ಧಾರಾಕಾರ ಮಳೆಗೆ ನೂರಾರು ಮನೆಗಳ ನೆಲ ಸಮವಾದ್ರೆ, ಸಾವಿರಾರು ಮರಗಳು ಧರೆಗುರುಳಿವೆ. ಕೋಲ್ಕತ್ತ ವಿಮಾನ ನಿಲ್ದಾಣ ಜಲಾವೃತವಾಗಿ ನದಿಯಂತಾಗಿದೆ. ಮಾತ್ರವಲ್ಲದೇ ನಿಲ್ದಾಣದ ಒಂದು ಭಾಗದ ಚಾವಣಿ ಕುಸಿದು ಬಿದ್ದಿದೆ.
