ಹೈದರಾಬಾದ್: ನ್ಯಾಷನಲ್ ಲೈಬ್ರರಿ ಆಫ್ ಮೆಡಿಸಿನ್ ವಿಜ್ಞಾನಿಗಳು COVID-19 ವೈರಸ್ನ ಕೆಲ ಪ್ರಮುಖ ಜೀನ್ ಗುಣಲಕ್ಷಣಗಳನ್ನು ಪತ್ತೆಹಚ್ಚುವಲ್ಲಿ ಸಫಲರಾಗಿದ್ದಾರೆ. ಅಲ್ಲದೆ ಇದಕ್ಕೂ ಹೆಚ್ಚು ಮಾರಣಾಂತಿಕವಾದ ಕೋವಿಡ್-19 ಗಿಂತ ಭಿನ್ನವಾದ ಇತರ ಕೊರೊನಾ ವೈರಸ್ ಲಕ್ಷಣಗಳನ್ನು ಸಹ ವಿಜ್ಞಾನಿಗಳು ಪತ್ತೆ ಮಾಡಿದ್ದಾರೆ.
ಜೀನ್ ಗುಣಲಕ್ಷಣಗಳ ವಿಶ್ಲೇಷಣೆಯಿಂದ ಭವಿಷ್ಯದಲ್ಲಿ ಎರಗಬಹುದಾದ ಮತ್ತೊಂದು ಬಗೆಯ ಕೊರೊನಾ ವೈರಸ್ ಎಷ್ಟು ಪ್ರಬಲವಾಗಿರಬಹುದು ಎಂಬುದನ್ನು ತಿಳಿಯಲು ಸಹಕಾರವಾಗಲಿದೆ. ಹಾಗೆಯೇ ಮಾನವರಿಗೆ ಸಂಚಕಾರ ತರಬಲ್ಲ ಪ್ರಾಣಿಗಳಿಂದ ಹರಡಬಹುದಾದ ಕೊರೊನಾ ವೈರಸ್ ಬಗ್ಗೆಯೂ ತಿಳಿಯಬಹುದಾಗಿದೆ.
ಕೋವಿಡ್-19 ವಿಶ್ವದಲ್ಲಿ ಈಗಾಗಲೇ 3 ಲಕ್ಷ 80 ಸಾವಿರಕ್ಕೂ ಅಧಿಕ ಜನರನ್ನು ಬಲಿ ಪಡೆದಿದೆ. ಹೀಗಾಗಿ ವೈರಸ್ಗಳ ಸಾಂಕ್ರಾಮಿಕತೆಯ ಇತಿಹಾಸ ಹಾಗೂ ಕೋವಿಡ್-19 ಜೀನ್ ಗುಣಲಕ್ಷಣಗಳನ್ನು ಅರಿಯುವುದು ಬಹಳ ಮುಖ್ಯವಾಗಿದೆ.
"ಈ ಅಧ್ಯಯನದಲ್ಲಿ ನಾವು ಕೊರೊನಾ ವೈರಸ್ ಅನ್ನೇ ಹೋಲುವ ಹಾಗೂ ಮಾನವರಿಗೆ ಗಂಭೀರ ಕಾಯಿಲೆ ಉಂಟುಮಾಡುವ ವೈರಸ್ಗಳ ಬಗ್ಗೆ ಸಂಶೋಧನೆ ಮಾಡುತ್ತಿದ್ದೇವೆ. ಕಡಿಮೆ ಪರಿಣಾಮದ ಕೊರೊನಾ ವೈರಸ್ ಬಗ್ಗೆ ಹಲವಾರು ಗುಣಲಕ್ಷಣಗಳನ್ನು ನಾವು ಈಗಾಗಲೇ ಕಂಡು ಹಿಡಿದಿದ್ದೇವೆ. ಆದರೆ ಈ ಎಲ್ಲ ಸಂಶೋಧನೆಗಳ ನಿಜವಾದ ಫಲಿತಾಂಶಗಳು ಪ್ರಸ್ತುತ ವಾಸ್ತವದಲ್ಲಿ ನಡೆಯುತ್ತಿರುವ ನೇರ ಪ್ರಯೋಗಗಳ ನಂತರವೇ ತಿಳಿದು ಬರಲಿವೆ." ಎಂದು ಎನ್ಎಲ್ಎಂ ನ್ಯಾಷನಲ್ ಸೆಂಟರ್ ಫಾರ್ ಬಯೊಟೆಕ್ನಾಲಜಿ ಇನ್ಫರ್ಮೇಶನ್ ಸಂಸ್ಥೆಯ ಸಂಶೋಧಕ ಡಾ. ಯೂಜೀನ್ ಕೋನಿನ್ ಹೇಳಿದ್ದಾರೆ.
SARS-CoV-2 ವೈರಸ್ ಹಾಗೂ ಇತರ ಕೊರೊನಾ ವೈರಸ್ ಜೀನ್ ಲಕ್ಷಣಗಳ ಪತ್ತೆಗೆ ತುಲನಾತ್ಮಕ ಜೀನ್ ಶಾಸ್ತ್ರ ಹಾಗೂ ಮಶೀನ್ ಲರ್ನಿಂಗ್ ತಂತ್ರಜ್ಞಾನವನ್ನು ಬಳಸಲಾಗಿದೆ ಎಂದು ಸಂಶೋಧಕರು ತಿಳಿಸಿದ್ದಾರೆ. SARS-CoV-2 ವೈರಸ್ ಹಾಗೂ ಇತರ ಹೆಚ್ಚು ಮಾರಣಾಂತಿಕ ಕೊರೊನಾ ವೈರಸ್ಗಳ ಪ್ರೋಟೀನ್ಗಳನ್ನು ಈ ಸಂಶೋಧಕರು ಈಗಾಗಲೇ ಪತ್ತೆ ಮಾಡಿದ್ದಾರೆ. ಪತ್ತೆಯಾದ ಜೀನ್ ಗುಣಲಕ್ಷಣಗಳು ಈ ಕೊರೊನಾ ವೈರಸ್ಗಳಿಂದಾಗಬಹುದಾದ ಮಾರಣಾಂತಿಕ ಪರಿಣಾಮಗಳನ್ನು ಹೋಲುತ್ತವೆ ಹಾಗೂ ಪ್ರಾಣಿಗಳಿಂದ ಮಾನವ ಶರೀರದೊಳಗೆ ಪ್ರವೇಶಿಸಬಲ್ಲ ಅವುಗಳ ಸಾಮರ್ಥ್ಯವನ್ನು ಬಹಿರಂಗಪಡಿಸಿವೆ.
"ಈ ನೂತನ ಸಂಶೋಧನೆಗಳು ಕೋವಿಡ್-19 ವೈರಸ್ ಹಾಗೂ ಅದನ್ನು ತಡೆಯಲು ಬೇಕಾದ ಕ್ರಮಗಳ ಬಗ್ಗೆ ಸಂಶೋಧಕರು ಹೆಚ್ಚಿನದನ್ನು ತಿಳಿಯಲು ಅನುಕೂಲವಾಗಲಿವೆ." ಎಂದು ಎನ್ಎಲ್ಎಂ ನಿರ್ದೇಶಕಿ ಪ್ಯಾಟ್ರಿಸಿಯಾ ಫ್ಲಾಟ್ಲೇ ಬೆನ್ನಾನ್ ತಿಳಿಸಿದ್ದಾರೆ.