ಫರಿದಾಬಾದ್/ಹರಿಯಾಣ: ಇಂದು ನಾವು ಗ್ಯಾಜೆಟ್‌ಗಳ ಮೇಲೆ ಸಂಪೂರ್ಣವಾಗಿ ಅವಲಂಬಿತರಾಗಿದ್ದೇವೆ. ಆದರೆ ಜಾಗರೂಕರಾಗಿರಿ.. ಏಕೆಂದರೆ ಸೈಬರ್ ಹ್ಯಾಕರ್‌ಗಳು ಈ ಗ್ಯಾಜೆಟ್‌ಗಳನ್ನು ಹ್ಯಾಕ್ ಮಾಡುತ್ತಾರೆ ಮತ್ತು ಖಾಸಗಿ ಚಾಟ್ ಮಾಹಿತಿಯನ್ನು ಕದಿಯುತ್ತಾರೆ. ಇದು ಬ್ಲ್ಯಾಕ್‌ ಮೇಲಿಂಗ್‌ನಂತಹ ಘಟನೆಗಳಿಗೆ ಕಾರಣವಾಗುತ್ತದೆ. ಇಂತಹದ್ದೇ ಒಂದು ಪ್ರಕರಣಕ್ಕೆ ಸಂಬಂಧಿಸಿದಂತೆ ಹರಿಯಾಣದ ಫರಿದಾಬಾದ್ ಸೈಬರ್ ಪೊಲೀಸರು ವಾಟ್ಸ್ಯಾಪ್ ಹ್ಯಾಕಿಂಗ್ ಗ್ಯಾಂಗ್ ಅನ್ನು ಹೆಡೆಮುರಿ ಕಟ್ಟಿದ್ದಾರೆ.
ಈ ಗ್ಯಾಂಗ್ನ ಖದೀಮರು ಕಾಲೇಜು ಹುಡುಗಿಯರನ್ನೇ ಗುರಿಯಾಗಿರಿಸಿಕೊಂಡು ಅವರ ವಾಟ್ಸ್ಯಾಪ್ ಹ್ಯಾಕ್ ಮಾಡಿ ಅವರ ಖಾಸಗಿ ಚಾಟ್ಗಳನ್ನು ಮುಂದಿಟ್ಟುಕೊಂಡು ಅವರಿಗೆ ಬ್ಲಾಕ್ಮೇಲ್ ಮಾಡುತ್ತಿದ್ದರು. ಪೊಲೀಸರು ನೀಡಿರುವ ಮಾಹಿತಿ ಪ್ರಕಾರ, ಈ ಗ್ಯಾಂಗ್ ಇದುವರೆಗೆ 100 ಕ್ಕೂ ಹೆಚ್ಚು ವಿದ್ಯಾರ್ಥಿನಿಯರ ವಾಟ್ಸ್ಯಾಪ್ ಹ್ಯಾಕ್ ಮಾಡಿದೆ. ಆಶ್ಚರ್ಯಕರ ಸಂಗತಿಯೆಂದರೆ, ಈ ಗ್ಯಾಂಗ್ನ ಮಾಸ್ಟರ್ ಮೈಂಡ್ ಮನೀಶ್ ಕೇವಲ ಹತ್ತನೇ ತರಗತಿ ಪಾಸ್, ಗ್ಯಾಂಗ್‌ಗೆ ನಕಲಿ ಸಿಮ್ ನೀಡುತ್ತಿದ್ದ ಅವನ ಹೆಂಡತಿ, ಸತ್ತಾರ್ ಖಾನ್ 8 ನೇ ಕ್ಲಾಸ್ ಪಾಸ್.. ಈ ಗ್ಯಾಂಗ್ನ ಮತ್ತೋರ್ವ ಸದಸ್ಯ ಹೈಸ್ಕೂಲ್ ಮೆಟ್ಟಿಲು ಕೂಡ ಹತ್ತಿಲ್ಲ. ಆದರೆ ಗ್ಯಾಜೆಟ್‌ ಹ್ಯಾಕಿಂಗ್ನಲ್ಲಿ ವೃತ್ತಿಪರ ಹ್ಯಾಕರ್‌ಗಳನ್ನು ಕೂಡ ಮೀರಿಸುವಷ್ಟು ನಿಸ್ಸೀಮರು ಈ ಹ್ಯಾಕರ್ಸ್.
ಈ ಗ್ಯಾಂಗ್ ಕಾರ್ಯಾಚರಣೆ ಹೇಗಿತ್ತು?
ತಮ್ಮ ಗ್ಯಾಂಗ್ನ ಮಹಿಳೆ ಸದಸ್ಯರನ್ನು ಮುಂದಿಟ್ಟುಕೊಂಡು ಕಾಲೇಜು ಹುಡುಗಿಯರ ಜೊತೆ ಸ್ನೇಹ ಬೆಳೆಸಿ ನಂತರ ಅವರೊಂದಿಗೆ ಸಲುಗೆ ಬೆಳೆಸಿಕೊಳ್ಳುವುದು. ನಂತರ ಅವರ ಫೋನ್ ನಂಬರ್ ಪಡೆದುಕೊಳ್ಳುವುದು. ನಂತರ ಸುಲಭವಾಗಿ ವಿದ್ಯಾರ್ಥಿನಿಯರ ವಾಟ್ಸ್ಯಾಪ್ ಹ್ಯಾಕ್ ಮಾಡುತ್ತಿದ್ದರು.
ಈ ಗ್ಯಾಂಗ್ ಕಳೆದ 2 ವರ್ಷಗಳಿಂದ ಸುಮಾರು 100 ವಿದ್ಯಾರ್ಥಿನಿಯರನ್ನು ಈ ರೀತಿ ಬಲೆಗೆ ಹಾಕಿಕೊಂಡು ಅವರ ಖಾಸಗಿ ಸಂಭಾಷಣೆಗಳು, ಫೋಟೋಗಳನ್ನು ಕದಿಯುತ್ತಿದ್ದರು ಮತ್ತು ಅವುಗಳನ್ನು ಇಟ್ಟುಕೊಂಡು ಬ್ಲಾಕ್ ಮೇಲ್ ಮಾಡಿ Paytm ಮೂಲಕ ಹಣಕ್ಕೆ ಬೇಡಿಕೆ ಇಡುತ್ತಿದ್ದರು. ಪೊಲೀಸರು ಹೇಳಿರುವಂತೆ ಇವರು ಲಕ್ಷಾಂತರ ರೂಪಾಯಿಗಳಿಗೆ ಬೇಡಿಕೆ ಇಡುತ್ತಿರಲಿಲ್ಲ. ಬದಲಿಗೆ 5 ರಿಂದ 10 ಸಾವಿರ ರೂಗಳಿಗಷ್ಟೇ ಬೇಡಿಕೆ ಇಡುತ್ತಿದ್ದರು. ಕಾರಣ ಇಷ್ಟೇ, ಜಾಸ್ತಿ ಹಣ ಕೇಳಿದ್ರೆ ಪೊಲೀಸರ ಬಳಿ ಹೋಗಿ ಕಂಪ್ಲೆಂಟ್ ಕೊಡ್ತಾರೆ. ಆಗ ಪೊಲೀಸರಿಗೆ ಸಿಕ್ಕಿಬೀಳ್ತೇವೆ ಅನ್ನೋದು. ಅದೇ ಅಲ್ಪ ಮೊತ್ತದ ಹಣ ಕೇಳಿದ್ರೆ ಕೊಟ್ಟು ಸುಮ್ಮನಾಗ್ತಾರೆ ಅಂತ ಹೀಗೆ ಮಾಡ್ತಿದ್ರು ಅಂತ ಪೊಲೀಸರು ಇವರ ಖಯಾಲಿಯನ್ನು ಬಿಚ್ಚಿಟ್ಟಿದ್ದಾರೆ.
ದೆಹಲಿ, ಫರಿದಾಬಾದ್ ಸೇರಿದಂತೆ ಹಲವೆಡೆ ಈ ಗ್ಯಾಂಗ್ ಮೇಲೆ ಡಜನ್ಗಟ್ಟಲೇ ಪ್ರಕರಣಗಳು ದಾಖಲಾಗಿವೆ. ಬಾಲಕಿಯೊಬ್ಬಳು ನೀಡಿದ ನಂಬರ್ನಿಂದ ಪೊಲೀಸರಿಗೆ ಈ ಖತರ್ನಾಕ್ ಗುಂಪಿನ ಸುಳಿವು ಸಿಕ್ಕಿದ್ದು , ಈ ಹ್ಯಾಕರ್ಸ್ ಗ್ಯಾಂಗ್ ಅನ್ನು ಪೊಲೀಸರು ಬಂಧಿಸಿದ್ದಾರೆ. ಐಪಿಸಿ 419, 420, 354 ಡಿ, 467, 468 471, 120 ಬಿ ಸೆಕ್ಷನ್ ಅಡಿಯಲ್ಲಿ ಆರೋಪಿಗಳ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ.
