ವಿದರ್ಭ: ಮಹಾರಾಷ್ಟ್ರದಲ್ಲಿ ಭೀಕರ ಬರ ಎದುರಾದ ಹಿನ್ನೆಲೆ ಇಲ್ಲಿನ ವರ್ಧಾ ಜಿಲ್ಲೆಯ ಜನ ಮಳೆಗಾಗಿ ಬೊಂಬೆಗಳ ಮದುವೆ ಮಾಡಿದ್ದಾರೆ.
ಮಹಾರಾಷ್ಟ್ರದ ವಾರ್ದಾ ಜಿಲ್ಲೆಯ ವಿದರ್ಭ ಪ್ರದೇಶವು ಬರದಿಂದ ತತ್ತರಿಸಿದೆ. ಈ ಪ್ರದೇಶದಲ್ಲಿ ವರ್ಷಕ್ಕೆ ಕನಿಷ್ಠ ಒಂದು ಮದುವೆ ಸಮಾರಂಭವಾದರೂ ಜರುಗಬೇಕು. ಆದರೆ ಮಳೆ ಬರದೇ ಬರ ಉಂಟಾಗಿದ್ದರಿಂದ ಜನರ ಆರ್ಥಿಕ ಮಟ್ಟ ಕುಸಿದಿದೆ. ಈ ಕಾರಣಕ್ಕಾಗಿಯೇ ವರ್ಧಾ ಪ್ರದೇಶದ ಸುತ್ತಮುತ್ತ ಮದುವೆ ವಯಸ್ಸಿಗೆ ಬಂದ ಸುಮಾರು 22 ಯುವಕರು ಮತ್ತು ಮದುವೆ ವಯಸ್ಸಿನ ಇಬ್ಬರು ಹುಡುಗಿಯರ ಮದುವೆಯೇ ಆಗಿಲ್ಲವಂತೆ. ಆದ ಕಾರಣ ಈ ರೀತಿ ಬೊಂಬೆಗಳ ಮದುವೆ ಮಾಡುತ್ತಿರುವುದಾಗಿ ಸ್ಥಳೀಯರು ತಿಳಿಸಿದ್ದಾರೆ.
ಇನ್ನು ಮನುಷ್ಯರು ಮದುವೆಯಾಗುವ ರೀತಿಯಲ್ಲಿಯೇ ಹಳದಿ ಶಾಸ್ತ್ರ ಮೊದಲಾದ ಶಾಸ್ತ್ರಗಳನ್ನು ಬೊಂಬೆಗಳಿಗೂ ಮಾಡಲಾಗಿದೆ. ಕಳೆದ ಕೆಲವು ವರ್ಷಗಳಿಂದ ಇಲ್ಲಿನ ರೈತರು ಬರವನ್ನು ಎದುರಿಸುತ್ತಿದ್ದಾರೆ. ಈ ವರ್ಷ ಪರಿಸ್ಥಿತಿ ತೀರಾ ಹದಗೆಟ್ಟಿದ್ದು, ಹೆಚ್ಚು ತೊಂದರೆ ಅನುಭವಿಸುವಂತಾಗಿದೆ. ಗ್ರಾಮದಲ್ಲಿ ಮದುವೆ ನಡೆಯುವವರೆಗೂ ಈ ಸಮಸ್ಯೆಗೆ ಪರಿಹಾರವಿಲ್ಲ. ಮಳೆಯಿಲ್ಲದೇ ಮದುವೆಯಾಗುವಂತಿಲ್ಲ ಎಂಬ ಪರಿಸ್ಥಿತಿ ಬೇರೆ ಎದುರಾಗಿದೆ. ಈ ಹಿನ್ನೆಲೆ ಮಳೆಗಾಗಿ ಬೊಂಬೆಗಳ ಮದುವೆ ಮೊರೆ ಹೋಗಲಾಗಿದೆ.
