ಕೋವಿಡ್​ ಹೋರಾಟದಲ್ಲಿ ಡ್ರೋನ್​ಗಳ ಪರಿಣಾಮಕಾರಿ ಬಳಕೆ: ಒಂದು ಅವಲೋಕನ

ದೂರದಿಂದಲೇ ನಿಯಂತ್ರಿಸಬಲ್ಲ ಮಾನವ ರಹಿತ ಡ್ರೋನ್ ತಂತ್ರಜ್ಞಾನ ಕೊರೊನಾ ವೈರಸ್​ ಹೋರಾಟದಲ್ಲಿ ಅತಿ ಹೆಚ್ಚು ಬಳಕೆಯಾಗುತ್ತಿದೆ. ಪೊಲೀಸರು ಈಗ ಡ್ರೋನ್​ಗಳ ಮುಖಾಂತರ ಬಹುದೊಡ್ಡ ಪ್ರದೇಶದ ಮೇಲೆ ನಿರಂತರ ಕಣ್ಗಾವಲಿರಿಸಬಲ್ಲರು. ಖುದ್ದಾಗಿ ಸ್ಥಳಕ್ಕೆ ಹೋಗುವ ಅಗತ್ಯ ಕಡಿಮೆಯಾಗಿರುವುದರಿಂದ ಅವರಿಗೆ ಸೋಂಕು ಹರಡುವ ಅಪಾಯ ಅಷ್ಟರ ಮಟ್ಟಿಗೆ ಕಡಿಮೆಯಾಗಿದೆ. ಆದಾಗ್ಯೂ ಡ್ರೋನ್​ಗಳ ಬಳಕೆಯಿಂದ ವ್ಯಕ್ತಿಯ ಖಾಸಗಿತನ ಹಾಗೂ ಬದುಕುವ ಹಕ್ಕಿಗೆ ಚ್ಯುತಿಯುಂಟಾಗುತ್ತಿದೆ ಎಂದು ಸಾಮಾಜಿಕ ಮಾಧ್ಯಮ ಹಾಗೂ ಮುಖ್ಯವಾಹಿನಿ ಮಾಧ್ಯಮಗಳಲ್ಲಿ ಆಗಾಗ ಚರ್ಚೆಯಾಗುತ್ತಿದೆ. ಅದೇನೇ ಇದ್ದರೂ ಡ್ರೋನ್​ಗಳ ಬಳಕೆಯಿಂದ ತಕ್ಕಮಟ್ಟಿಗೆ ಪರಿಣಾಮಕಾರಿಯಾಗಿ ಕಾರ್ಯನಿರ್ವಹಿಸಲು ಸಾಧ್ಯವಾಗಿರುವುದಂತೂ ಸತ್ಯ.

ಕೋವಿಡ್​-19 ಸಂಕಷ್ಟದ ಸಮಯದಲ್ಲಿ ಸಾಮಾಜಿಕ ಅಂತರ ಕಾಯ್ದುಕೊಂಡರೂ ಆಡಳಿತದ ನಿತ್ಯದ ಕೆಲಸಗಳನ್ನು ಪರಿಣಾಮಕಾರಿಯಾಗಿ ನಿರ್ವಹಿಸುವುದು ತುಸು ಸವಾಲಿನ ಕೆಲಸವೇ ಆಗಿದೆ. ಜಗತ್ತಿನಲ್ಲಿ ಸರ್ಕಾರ, ಸಂಘ - ಸಂಸ್ಥೆಗಳು ಮತ್ತು ಸಮಾಜ ಎಲ್ಲವೂ ಸಾಮಾಜಿಕ ಅಂತರ ಕಾಯ್ದುಕೊಂಡು ಪರಸ್ಪರ ಹೇಗೆ ಕೆಲಸ ಮಾಡುವುದು ಎಂಬ ಬಗ್ಗೆ ಹಲವಾರು ಪ್ರಯತ್ನಗಳು ನಡೆಯುತ್ತಿವೆ.

ಮುಂಚೂಣಿಯಲ್ಲಿ ನಿಂತು ಕೋವಿಡ್​ ಹೋರಾಟ ನಡೆಸುತ್ತಿರುವ ವೈದ್ಯರು, ಆರೋಗ್ಯ ಕಾರ್ಯಕರ್ತರು, ಪೊಲೀಸ್ ಇಲಾಖೆ, ಖಾಸಗಿ ಭದ್ರತಾ ಪಡೆ ಹಾಗೂ ಅಧಿಕಾರಿಗಳು ನಿಜವಾದ ಅರ್ಥದಲ್ಲಿ ಹೀರೋಗಳಾಗಿದ್ದಾರೆ. ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್, ಬಿಗ್ ಡೇಟಾ, ಜಿಐಎಸ್​ ಮತ್ತು ಮ್ಯಾಪಿಂಗ್, ಲೊಕೇಶನ್ ತಂತ್ರಜ್ಞಾನ ಹಾಗೂ ಸ್ವಯಂಚಾಲಿತ ಯಂತ್ರಗಳು ಕೋವಿಡ್​ ನಿಯಂತ್ರಣದಲ್ಲಿ ಇತ್ತೀಚೆಗೆ ಪ್ರಮುಖ ಪಾತ್ರ ವಹಿಸುತ್ತಿವೆ.

ಅದರಲ್ಲೂ ದೂರದಿಂದಲೇ ನಿಯಂತ್ರಿಸಬಲ್ಲ ಮಾನವ ರಹಿತ ಡ್ರೋನ್ ತಂತ್ರಜ್ಞಾನ ಕೊರೊನಾ ವೈರಸ್​ ಹೋರಾಟದಲ್ಲಿ ಅತಿ ಹೆಚ್ಚು ಬಳಕೆಯಾಗುತ್ತಿದೆ. ಪೊಲೀಸರು ಈಗ ಡ್ರೋನ್​ಗಳ ಮುಖಾಂತರ ಬಹುದೊಡ್ಡ ಪ್ರದೇಶದ ಮೇಲೆ ನಿರಂತರ ಕಣ್ಗಾವಲಿರಿಸಬಲ್ಲರು. ಖುದ್ದಾಗಿ ಸ್ಥಳಕ್ಕೆ ಹೋಗುವ ಅಗತ್ಯ ಕಡಿಮೆಯಾಗಿರುವುದರಿಂದ ಅವರಿಗೆ ಸೋಂಕು ಹರಡುವ ಅಪಾಯ ಅಷ್ಟರ ಮಟ್ಟಿಗೆ ಕಡಿಮೆಯಾಗಿದೆ. ಆದಾಗ್ಯೂ ಡ್ರೋನ್​ಗಳ ಬಳಕೆಯಿಂದ ವ್ಯಕ್ತಿಯ ಖಾಸಗಿತನ ಹಾಗೂ ಬದುಕುವ ಹಕ್ಕಿಗೆ ಚ್ಯುತಿಯುಂಟಾಗುತ್ತಿದೆ ಎಂದು ಸಾಮಾಜಿಕ ಮಾಧ್ಯಮ ಹಾಗೂ ಮುಖ್ಯವಾಹಿನಿ ಮಾಧ್ಯಮಗಳಲ್ಲಿ ಆಗಾಗ ಚರ್ಚೆಯಾಗುತ್ತಿದೆ. ಅದೇನೇ ಇದ್ದರೂ ಡ್ರೋನ್​ಗಳ ಬಳಕೆಯಿಂದ ತಕ್ಕಮಟ್ಟಿಗೆ ಪರಿಣಾಮಕಾರಿಯಾಗಿ ಕಾರ್ಯನಿರ್ವಹಿಸಲು ಸಾಧ್ಯವಾಗಿರುವುದಂತೂ ಸತ್ಯ.

ಪ್ರಸ್ತುತ ಕೋವಿಡ್​-19 ಸಂಕಷ್ಟದ ಅವಧಿಯಲ್ಲಿ ಡ್ರೋನ್​ಗಳನ್ನು ಯಾವೆಲ್ಲ ಉದ್ದೇಶಗಳಿಗಾಗಿ ಬಳಸಲಾಗುತ್ತಿದೆ ಹಾಗೂ ಅವುಗಳ ಬಳಕೆ ಎಷ್ಟು ಪರಿಣಾಮಕಾರಿಯಾಗಿದೆ ಎಂಬುದನ್ನು ನೋಡೋಣ.

ಡ್ರೋನ್​ ಬಳಕೆಯ ಉದ್ದೇಶಗಳು ಹಾಗೂ ಅದರ ಪರಿಣಾಮಗಳು

ಮಾಹಿತಿ ಪ್ರಸಾರ: ನಿರ್ದಿಷ್ಟ ಪ್ರದೇಶದಲ್ಲಿ ಆಗು ಹೋಗುಗಳ ಮೇಲೆ ಕಣ್ಣಿಡುವ ಹೊರತಾಗಿ, ಲಾಕ್​ಡೌನ್​ ನಿಯಮಗಳು ಹಾಗೂ ಕೋವಿಡ್​ ತಡೆಗೆ ಕೈಗೊಳ್ಳಬೇಕಾದ ಮುಂಜಾಗ್ರತೆಗಳ ಕುರಿತು ಡ್ರೋನ್​ ಲೌಡ್​ಸ್ಪೀಕರ್​ಗಳ ಮೂಲಕ ಗ್ರಾಮೀಣ ಪ್ರದೇಶಗಳಲ್ಲಿ ಅರಿವು ಮೂಡಿಸಲಾಗುತ್ತಿದೆ. ಗುಡ್ಡಗಾಡಿನಲ್ಲಿರುವ ಹಾಗೂ ಸಂಪರ್ಕ ಸಾಧನಗಳ ವ್ಯವಸ್ಥೆ ಇಲ್ಲದ ಪ್ರದೇಶಗಳಲ್ಲಿ ಡ್ರೋನ್ ಬಳಸಿ ಜನರಿಗೆ ಆರೋಗ್ಯ ಸಂಬಂಧಿ ಮಾಹಿತಿ ತಲುಪಿಸಲಾಗುತ್ತಿರುವುದು ತಂತ್ರಜ್ಞಾನದ ಬಹುದೊಡ್ಡ ಸದುಪಯೋಗವಾಗಿದೆ. ಚೀನಾ ಹಾಗೂ ಯುರೋಪಿನ ಕೆಲ ಪ್ರದೇಶಗಳಲ್ಲಿ ಇಂಥ ವ್ಯವಸ್ಥೆಯನ್ನು ವ್ಯಾಪಕವಾಗಿ ಬಳಸಲಾಗುತ್ತಿದೆ.

ಸೋಂಕು ನಿವಾರಕ ದ್ರಾವಣ ಸಿಂಪಡಣೆ: ಜನನಿಬಿಡ ಪ್ರದೇಶಗಳಲ್ಲಿ ಕೋವಿಡ್​ ಸೋಂಕು ಹರಡದಂತೆ ತಡೆಯಲು, ಕೃಷಿಗಾಗಿ ಬಳಸುವ ರಾಸಾಯನಿಕ ಸಿಂಪಡಣೆ ಯಂತ್ರಗಳನ್ನು ಡ್ರೋನ್​ಗಳಿಗೆ ಜೋಡಿಸಿ ಕೋವಿಡ್ ಸೋಂಕು ನಿವಾರಕ ದ್ರಾವಣವನ್ನು ಸಿಂಪಡಿಸಲಾಗುತ್ತಿದೆ. ಸಾಂಪ್ರದಾಯಿಕ ಪದ್ಧತಿಗಿಂತ ಡ್ರೋನ್ ಮೂಲಕ ಈ ಕೆಲಸ 50 ಪಟ್ಟು ಕಡಿಮೆ ಸಮಯದಲ್ಲಿ ಮಾಡಬಹುದು ಹಾಗೂ ಅತಿ ಹೆಚ್ಚು ಪ್ರದೇಶದಲ್ಲಿ ದ್ರಾವಣವನ್ನು ಸಿಂಪಡಿಸಬಹುದು. ದ್ರಾವಣ ಸಿಂಪಡಿಸುವ ಡ್ರೋನ್ ಒಂದಕ್ಕೆ ಒಂದು ಬಾರಿ 16 ಲೀಟರ್​ನಷ್ಟು ದ್ರಾವಣವನ್ನು ತುಂಬಿಸಬಹುದು ಹಾಗೂ ಒಂದು ಗಂಟೆಯಲ್ಲಿ 1 ಸಾವಿರ ಚದರ ಮೀಟರ್​ ಪ್ರದೇಶದಲ್ಲಿ ಇದನ್ನು ಸಿಂಪಡಿಸಬಹುದು ಎಂದು ಜಗತ್ತಿನ ಅತಿ ದೊಡ್ಡ ಡ್ರೋನ್ ಯಂತ್ರ ತಯಾರಿಕಾ ಕಂಪನಿ ಡಿಜೆಐ ಹೇಳಿದೆ.

ಔಷಧ ಹಾಗೂ ಅಗತ್ಯ ವಸ್ತುಗಳ ಸಾಗಣೆ: ವೈದ್ಯರು ಹಾಗೂ ಆಸ್ಪತ್ರೆಗಳಿಗೆ ಬೇಕಾದ ಔಷಧ ಮತ್ತು ಸಲಕರಣೆಗಳನ್ನು ತುರ್ತಾಗಿ ರವಾನಿಸಬೇಕಾಗುತ್ತದೆ. ಹಾಗೆಯೇ ರೋಗಿಯ ಟೆಸ್ಟ್ ಸ್ಯಾಂಪಲ್​ಗಳನ್ನು ಸಹ ಶೀಘ್ರವಾಗಿ ಪ್ರಯೋಗಾಲಯಗಳಿಗೆ ರವಾನಿಸಬೇಕಾಗುತ್ತದೆ. ಕೊರೊನಾ ವೈರಸ್​ ಹುಟ್ಟಿಕೊಂಡ ಚೀನಾದ ವುಹಾನ್​ನ ಆಸ್ಪತ್ರೆಗಳಿಗೆ ಡ್ರೋನ್ ಮೂಲಕವೇ ಔಷಧ ಹಾಗೂ ಇತರ ಅಗತ್ಯ ವಸ್ತುಗಳನ್ನು ರವಾನಿಸಲಾಗುತ್ತಿದೆ. ಇದರಿಂದ ಅನಗತ್ಯವಾಗಿ ಕೊರೊನಾ ಸೋಂಕು ಹರಡುವುದನ್ನು ಎಷ್ಟೋ ಪಟ್ಟು ಕಡಿಮೆ ಮಾಡಲು ಸಾಧ್ಯವಾಗಿದೆ.

ಶರೀರದ ತಾಪಮಾನ ಪರೀಕ್ಷೆ: ಕೊರೊನಾ ವೈರಸ್​ನ ಅತಿ ತುರ್ತು ಸಂದರ್ಭಗಳಲ್ಲಿ ಚೀನಾ ಡ್ರೋನ್ ಮೂಲಕ ಜನರ ಶರೀರದ ತಾಪಮಾನ ಪರೀಕ್ಷೆ ನಡೆಸುತ್ತಿತ್ತು. ಮುಖತಃ ಭೇಟಿಯಿಂದ ಸೋಂಕು ಹರಡುವ ಭಯವಿಲ್ಲದೇ ತಾಪಮಾನ ಪರೀಕ್ಷಿಸಲು ಡ್ರೋನ್​ಗಳು ಉಪಯುಕ್ತವಾಗಿವೆ.

ಭಾರತದಲ್ಲಿ ಡ್ರೋನ್ ತಂತ್ರಜ್ಞಾನದ ಬಳಕೆ

ಆರೋಗ್ಯ ವ್ಯವಸ್ಥೆ ನಿರ್ವಹಣೆಗೆ ಹಾಗೂ ಬೃಹತ್ ಜನವಸತಿ ಪ್ರದೇಶಗಳ ಮೇಲೆ ಕಣ್ಗಾವಲಿರಿಸಲು ಭಾರತದಲ್ಲಿ ಡ್ರೋನ್​ಗಳ ಬಳಕೆ ಇತ್ತೀಚೆಗೆ ವ್ಯಾಪಕವಾಗುತ್ತಿದೆ. ನಿರ್ದಿಷ್ಟ ಪ್ರದೇಶದಲ್ಲಿ ಸೋಂಕು ನಿವಾರಕ ಸಿಂಪಡಿಸುವುದು, ಲಾಕ್​ಡೌನ್​ ನಿಯಮಗಳ ಪಾಲನೆಯ ಮೇಲೆ ಕಣ್ಣಿಡುವುದು ಮುಂತಾದ ಕೆಲಸಗಳಿಗಾಗಿ ಡ್ರೋನ್ ಬಳಸಲಾಗುತ್ತಿದೆ.

"ಕೋವಿಡ್​ ಬಿಕ್ಕಟ್ಟಿನ ಸಮಯದಲ್ಲಿ ಡ್ರೋನ್​ಗಳು ಎಷ್ಟು ಸಮರ್ಥವಾಗಿ ಕೆಲಸ ಮಾಡಬಲ್ಲವು ಎಂಬುದು ಈಗ ನಮಗೆಲ್ಲ ಅರಿವಾಗಿದೆ. ಈ ಮುನ್ನ ಖಾಸಗಿತನ ಹಾಗೂ ಸುರಕ್ಷತಾ ಕಾರಣಗಳಿಗಾಗಿ ಡ್ರೋನ್​ಗಳನ್ನು ಸಂಶಯದಿಂದ ನೋಡಲಾಗುತ್ತಿತ್ತು. ಆದರೆ, ಬದಲಾದ ಪರಿಸ್ಥಿತಿಯಲ್ಲಿ ಡ್ರೋನ್​ಗಳು ಅತ್ಯಂತ ಉಪಯುಕ್ತವಾಗಿ ಪರಿಣಮಿಸಿದ್ದು, ಈ ತಂತ್ರಜ್ಞಾನ ಇನ್ನಷ್ಟು ಬೆಳವಣಿಗೆ ಹೊಂದಲಿದೆ." ಎನ್ನುತ್ತಾರೆ ಡ್ರೋನ್ ಫೆಡರೇಶನ್ ಆಫ್ ಇಂಡಿಯಾದ ನಿರ್ದೇಶಕ ಸ್ಮಿತ್ ಶಾ.

ಡ್ರೋನ್​ ಬೆಲೆ

ಭಾರತದಲ್ಲಿ ಸದ್ಯ 50 ಕಂಪನಿಗಳು ಡ್ರೋನ್ ತಯಾರಿಸುತ್ತಿದ್ದು, 200 ಡ್ರೋನ್ ಸೇವೆ ನೀಡುವ ಕಂಪನಿ ಹಾಗೂ ವಾಣಿಜ್ಯ ಬಳಕೆಗಾಗಿ 5,000 ಜನ ಡ್ರೋನ್ ಪೈಲಟ್​ಗಳು ಕಾರ್ಯನಿರ್ವಹಿಸುತ್ತಿದ್ದಾರೆ. ಮಾರುಕಟ್ಟೆ ವಿಶ್ಲೇಷಕ ಸಂಸ್ಥೆ ಫಿಕ್ಕಿ-ಅರ್ನ್ಸ್ಟ್ & ಯಂಗ್ ಪ್ರಕಾರ, 2021 ರ ವೇಳೆಗೆ ಭಾರತದ ಡ್ರೋನ್ ಮಾರುಕಟ್ಟೆ 20 ಮಿಲಿಯನ್ ರೂಪಾಯಿಗಳಷ್ಟು ಬೆಳೆಯಲಿದೆ.

ಭಾರತದಲ್ಲಿ ಸುಮಾರು 2 ಲಕ್ಷದಷ್ಟು ಹವ್ಯಾಸಿ ಹಾಗೂ ವಾಣಿಜ್ಯ ಉಪಯೋಗದ ಡ್ರೋನ್​ಗಳಿವೆ. ವಿಭಿನ್ನ ವಿಶಿಷ್ಟತೆಗಳನ್ನು ಆಧರಿಸಿ ಇವುಗಳ ಬೆಲೆ 2 ಲಕ್ಷ ರೂ. ಗಳಿಂದ 20 ಮಿಲಿಯನ್ ರೂ.ಗಳಷ್ಟಿದೆ.