ಚೆನ್ನೈ: ಅಮೆರಿಕದ ನೂತನ ಉಪಾಧ್ಯಕ್ಷರಾಗಿ ಭಾರತೀಯ ಮೂಲದ ಕಮಲಾ ಹ್ಯಾರಿಸ್ ಆಯ್ಕೆಯಾಗಿದ್ದು, ಅವರಿಗೆ ಈಗಾಗಲೇ ಪ್ರಧಾನಿ ನರೇಂದ್ರ ಮೋದಿ ಟ್ವೀಟ್ ಮಾಡಿ ಅಭಿನಂದನೆ ಸಲ್ಲಿಸಿದ್ದಾರೆ. ಇದರ ಮಧ್ಯೆ ಡಿಎಂಕೆ ಮುಖ್ಯಸ್ಥ ಸ್ಟಾಲಿನ್ ಕಮಲಾ ಹ್ಯಾರಿಸ್ಗೆ ತಮಿಳಿನಲ್ಲೇ ಪತ್ರ ಬರೆದಿದ್ದಾರೆ.
'ವಣಕ್ಕಂ' ಎಂದು ತಮಿಳು ಭಾಷೆಯಲ್ಲಿ ಶುಭಾಶಯ ಕೋರಿರುವ ಡಿಎಂಕೆ ಅಧ್ಯಕ್ಷ ಸ್ಟಾಲಿನ್, ಅವರಿಗೆ ತಮಿಳುನಾಡಿನೊಂದಿಗೆ ಇರುವ ಸಂಬಂಧದ ಬಗ್ಗೆ ಪತ್ರದಲ್ಲಿ ಬರೆದಿದ್ದಾರೆ. ನಿಮ್ಮ ಅಧಿಕಾರವಧಿಯಲ್ಲಿ ಅಮೆರಿಕಕ್ಕೆ ಒಳ್ಳೆಯ ಹೆಸರು ತಂದುಕೊಡಿ ಎಂದಿರುವ ಸ್ಟಾಲಿನ್, ಕಮಲಾ ಹ್ಯಾರಿಸ್ ಅವರ ತಾಯಿ ಅವರ ಮಾತೃ ಭಾಷೆ ತಮಿಳು ಆಗಿರುವ ಕಾರಣ ಈ ಪತ್ರ ಮತ್ತಷ್ಟು ಸಂತೋಷವನ್ನುಂಟು ಮಾಡಲಿದೆ ಎಂದು ತಿಳಿಸಿದ್ದಾರೆ. ಇದರ ಜತೆಗೆ ಕಮಲಾ ಹ್ಯಾರಿಸ್ ಅವರ ಗೆಲುವು ದ್ರಾವಿಡ್ ಚಳಚಳಿಗೆ ಆತ್ಮವಿಶ್ವಾಸ ನೀಡಿದೆ ಎಂದಿದ್ದಾರೆ.
ತಮಿಳುನಾಡಿನೊಂದಿಗೆ ಕಮಲಾ ಹ್ಯಾರಿಸ್ ತಾಯಿ ಶಿಮಲಾ ಗೋಪಾಲನ್ ಹ್ಯಾರಿಸ್ ಅವರು ಹೆಚ್ಚು ಸಂಪರ್ಕವಿರುವ ವಿಚಾರ ಹಂಚಿಕೊಂಡಿರುವ ಸ್ಟಾಲಿನ್, ಅಮೆರಿಕದ ಮೊದಲ ಮಹಿಳಾ ಉಪಾಧ್ಯಕ್ಷರು ತಮಿಳುನಾಡಿನವರು ಆಯ್ಕೆಯಾಗಿದ್ದಕ್ಕೆ ತಮಗೆ ಹೆಮ್ಮೆ ಇದೆ ಎಂದಿದ್ದಾರೆ. ಕಠಿಣ ಪರಿಶ್ರಮದ ಮೂಲಕ ಹ್ಯಾರಿಸ್ ಗೆಲುವು ತಂದುಕೊಟ್ಟಿದ್ದು, ತಮಿಳು ಸಂಬಂಧ ಹೊಂದಿರುವ ಮಹಿಳೆ ಯುಎಸ್ನಲ್ಲಿ ಆಡಳಿತ ನಡೆಸಲು ಅರ್ಹರಾಗಿದ್ದಾರೆ ಎಂದು ಹೇಳಿದ್ದಾರೆ.
ನಿಮ್ಮ ಅಧಿಕಾರಾವಧಿ ಅಮೆರಿಕಕ್ಕೆ ಹೆಚ್ಚಿನ ಪ್ರಶಸ್ತಿ ತಂದುಕೊಡಲಿ ಮತ್ತು ತಮಿಳರ ಪರಂಪರೆ ಹೆಮ್ಮೆಯನ್ನ ಜಗತ್ತಿಗೆ ತಿಳಿಸಲಿ ಎಂದಿರುವ ಸ್ಟಾಲಿನ್, ನಿಮ್ಮೆ ಭೇಟಿಯನ್ನ ಎದುರು ನೋಡುತ್ತಿದ್ದೇನೆ ಎಂದು ಹೇಳಿದ್ದಾರೆ. ಈ ಪತ್ರ ಸ್ಟಾಲಿನ್ ಅವರು ತಮ್ಮ ಫೇಸ್ಬುಕ್ ಪೋಸ್ಟ್ನಲ್ಲಿ ಶೇರ್ ಮಾಡಿಕೊಂಡಿದ್ದಾರೆ.
