ನವದೆಹಲಿ: ವಿಮಾನಯಾನ ಸಂಸ್ಥೆಗಳು ನಿಯಮಗಳನ್ನು ಉಲ್ಲಂಘಿಸಿದರೆ 2 ವಾರಗಳ ಕಾಲ ತಮಗೆ ನೀಡುವ ವಿಮಾನ ಮಾರ್ಗಗಳನ್ನು ರದ್ದು ಮಾಡುವುದಾಗಿ ನಾಗರಿಕ ವಿಮಾನಯಾನ ನಿರ್ದೇಶನಾಲಯ(ಡಿಜಿಸಿಎ) ಎಚ್ಚರಿಸಿದೆ.
ಏರೋಡ್ರೋಮ್‌ ಅಥವಾ ವಿಮಾನದಲ್ಲಿ ಪ್ರಯಾಣಿಸುವಾಗ ಯಾವುದೇ ಒಬ್ಬ ವ್ಯಕ್ತಿಯ ವೈಯಕ್ತಿಕ ಫೋಟೋ ತೆಗೆದರೆ ಕ್ರಮ ಕೈಗೊಳ್ಳುವುದಾಗಿ ಎಲ್ಲಾ ಪ್ರಾದೇಶಿಕ ವಿಮಾನ ಸಂಸ್ಥೆಗಳು, ಭಾರತದ ಏರ್ಪೋರ್ಟ್‌ ಪ್ರಾಧಿಕಾರ, ಇತರೆ ಕಾರ್ಯನಿರ್ವಹಣ ಸಂಸ್ಥೆಗಳಿಗೆ ಡಿಜಿಸಿಎ ಇಂದು ಆದೇಶ ಹೊರಡಿಸಿದೆ. ಮುಂದಿನ ದಿನಗಳಲ್ಲಿ ಇಂತಹ ತಪ್ಪುಗಳು ಮರುಕಳಿಸಿದರೆ ಈ ಹೊಸ ಆದೇಶವನ್ನು ಜಾರಿಗೆ ಮಾಡುವುದಾಗಿ ತಿಳಿಸಿದೆ.
ಸೆಪ್ಟೆಂಬರ್‌ 9ರಂದು ಬಾಲಿವುಡ್‌ ನಟಿ ಕಂಗನಾ ರನೌತ್ ಇಂಡಿಗೋ ವಿಮಾನದಲ್ಲಿ ಚಲಿಸುತ್ತಿದ್ದಾಗ ಫೋಟೋಗ್ರಾಫರ್‌ ಮತ್ತು ವಿಡಿಯೋಗ್ರಾಫರ್ ಗೆ ಅವಕಾಶ ನೀಡಲಾಗಿತ್ತು ಎಂಬ ಆರೋಪ ಕೇಳಿಬಂದಿತ್ತು. ಮಾತ್ರವಲ್ಲದೆ ಸಾಮಾಜಿಕ ಅಂತರವನ್ನೂ ಕಾಯ್ದುಕೊಂಡಿರಲಿಲ್ಲ. ಈ ವಿಡಿಯೋ ವೈರಲ್‌ ಆಗಿ ಸುದ್ದಿಗೆ ಗ್ರಾಸವಾಗಿತ್ತು. ಈ ಸಂಬಂಧ ಡಿಜಿಸಿಎ ಇಂಡಿಯೋ ಸಂಸ್ಥೆಗೆ ವರದಿ ಕೇಳಿದ ಮರು ದಿನವೇ ಹೊಸ ಆದೇಶ ಜಾರಿ ಮಾಡಿದೆ.
