ಮುಂಬೈ: ಮದುವೆ ಮಾಡಲೋ, ಮನೆ ಕಟ್ಟಲೋ ತಮ್ಮ ಪಿಎಫ್ ಹಣ ನಿರೀಕ್ಷಿಸುತ್ತಿರುವ ಭಾರತೀಯರಿಗೆ ಶಾಕ್ ಆಗುವಂತಹ ಸುದ್ದಿ ಹರಿದಾಡುತ್ತಿದೆ. ಸಾವಿರಾರು ಕೋಟಿ ಪಿಎಫ್ ಹಣವನ್ನು IL&FS ಗ್ರೂಪ್ನಲ್ಲಿ ಹೂಡಿಕೆ ಮಾಡಿದ್ದ ಪ್ರಾವಿಡಂಟ್ ಅಂಡ್ ಪೆನ್ಷನ್ ಫಂಡ್ ಟ್ರಸ್ಟ್ ತನ್ನ ಹಣವನ್ನೆ ಕಳೆದುಕೊಳ್ಳುವ ಭೀತಿಯಲ್ಲಿದ್ದು, ರಾಷ್ಟ್ರೀಯ ಕಂಪನಿ ಕಾನೂನು ಮೇಲ್ವಿಚಾರಣ ನ್ಯಾಯಮಂಡಳಿಗೆ ಅರ್ಜಿ ಸಲ್ಲಿಸಿದೆ.
ಭಾರತೀಯರ ಪಿಎಫ್ ಹಣವನ್ನು ಹೊಂದಿರುವ ಪ್ರಾವಿಡಂಟ್ ಅಂಡ್ ಪೆನ್ಷನ್ ಫಂಡ್ ಟ್ರಸ್ಟ್ IL&FS ಗ್ರೂಪ್ನ ಬಾಂಡ್ಗಳಿಗೆ ಸಾವಿರಾರು ಕೋಟಿ ರೂಪಾಯಿ ಹೂಡಿಕೆ ಮಾಡಿದೆ. ಕಂಪನಿಗೆ ಟ್ರಸ್ಟ್ ಹೂಡಿದ ಹಣ ಅಸುರಕ್ಷಿತ ಸಾಲದ ಸಾಲಿಗೆ ಸೇರಿದೆ. ಇದರಿಂದ ಟ್ರಸ್ಟ್ ತನ್ನೆಲ್ಲ ಹಣವನ್ನು ಕಳೆದುಕೊಳ್ಳುವ ಭೀತಿಯಲ್ಲಿದೆ. ಇದು ಹಲವಾರು ಪಿಎಫ್ದಾರರನ್ನೂ ಸಂಕಷ್ಟಕ್ಕೆ ಸಿಲುಕಿಸಿದೆ.
ಟ್ರಸ್ಟ್ ಹೊರತಾಗಿಯೂ ಸಾರ್ವಜನಿಕ ಕಂಪನಿಗಳಾದ ಎಂಎಂಟಿಸಿ, ಇಂಡಿಯನ್ಆಯಿಲ್, ಸಿಐಡಿಸಿಒ,ಹೆಚ್ಯುಡಿಸಿಒ, ಐಡಿಬಿಐ, ಎಸ್ಬಿಐ ಹಾಗೂ ಗುಜರಾತ್ ಹಾಗೂ ಹಿಮಾಚಲ ಪ್ರದೇಶದ ಎಲೆಕ್ಟ್ರಾನಿಕ್ ಬೋರ್ಡ್ಗಳು ಸಹ ನ್ಯಾಯಮಂಡಳಿಗೆ ಅರ್ಜಿ ಸಲ್ಲಿಸಿವೆ. ಖಾಸಗಿ ಕಂಪನಿಗಳಾದ ಹಿಂದೂಸ್ತಾನ್ ಯೂನಿಲೀವರ್ ಹಾಗೂ ಏಷಿಯನ್ ಪೇಂಟ್ಸ್ ಸಹ ಈ ಪಟ್ಟಿಯಲ್ಲಿವೆ ಎನ್ನಲಾಗಿದೆ.
14 ಲಕ್ಷ ನೌಕರರ 50 ವಿಧದ ನಿವೃತ್ತಿ ನಿಧಿಯನ್ನು IL&FS ಗ್ರೂಪ್ನಲ್ಲಿ ಹೂಡಿಕೆ ಮಾಡಲಾಗಿದೆ. ಆದರೆ ಈ ಬಗ್ಗೆ ಗ್ರೂಪ್ನ ವಕ್ತಾರ ಶರದ್ ಗೋಯೆಲ್ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.
ಮೂಲಗಳಂತೆ, ಗ್ರೂಪ್ನಲ್ಲಿ 302 ಸಂಸ್ಥಗೆಳು ಬಂಡವಾಳ ಹೂಡಿದ್ದು, ಭಾರತದ 169 ಕಂಪನಿಗಳು ಸಹ ಇದರಲ್ಲಿವೆ. ತಮ್ಮ ಟ್ರಸ್ಟ್ ಕಟ್ಟುಪಾಡುಗಳನ್ನು ಪಾಲಿಸಿದ 22 ಕಂಪನಿಗಳನ್ನು ಗ್ರೀನ್ ವರ್ಗಕ್ಕೂ, ಸುರಕ್ಷಿತ ಸಾಲಗಾರರಿಗೆ ಮರುಪಾವತಿ ಮಾಡಬಲ್ಲ10 ಕಂಪನಿಗಳನ್ನು ಅಂಬರ್ ವರ್ಗಕ್ಕೂ, ಅಂತೆಯೇ ತಮ್ಮ ನಿಯಮ ಪಾಲಿಸದ 38 ಕಂಪನಿಗಳನ್ನು ರೆಡ್ ವರ್ಗಕ್ಕೂ ಸೇರಿಸಲಾಗಿದೆ. 100 ಕಂಪನಿಗಳ ಬಗ್ಗೆ ಪರಿಶೀಲನೆ ನಡೆಯುತ್ತಿದೆ. ಸುರಕ್ಷಿತ ಸಾಲದಾತ ಬ್ಯಾಂಕ್ಗಳು ಮಾತ್ರ ಬಾಕಿ ಮೊತ್ತವನ್ನು ಪಡೆದುಕೊಳ್ಳಲಿದ್ದು, ಅಸುರಕ್ಷಿತ ಬಾಂಡ್ದಾರರು ಹೂಡಿಕೆ ಕಳೆದುಕೊಳ್ಳಲಿವೆ ಎನ್ನಲಾಗಿದೆ. ಅಸುರಕ್ಷಿತ ಸಾಲದ ಪಟ್ಟಿಯಲ್ಲಿರುವ ಪ್ರಾವಿಡಂಟ್ ಅಂಡ್ ಪೆನ್ಷನ್ ಫಂಡ್ ಟ್ರಸ್ಟ್ ಈಗ ಇದೇ ಆತಂಕ ಎದುರಿಸುತ್ತಿದೆ.
