ಹೊಸದಿಲ್ಲಿ: ಕೊರೊನಾ ವೈರಸ್ ಮೊದಲಿಗೆ ಕಂಡು ಬಂದಿದ್ದು ಚೀನಾದಲ್ಲಿ. ಹೀಗಾಗಿ ಅದನ್ನು ಚೀನಾ ವೈರಸ್, ವುಹಾನ್ ವೈರಸ್ ಎಂತಲೂ ಅನೇಕರು ಕರೆಯುತ್ತಾರೆ. ಹೀಗೆ ಕರೆಯುವ ಮೂಲಕ ಹಲವರು ಚೀನಾ ಮೇಲಿನ ಸಿಟ್ಟನ್ನೂ ತೀರಿಸಿಕೊಳ್ತಾರೆ. ಆದ್ರೆ ಚೀನಾ ವೈರಸ್ ಎಂದರೆ ಚೀನಾಗೆ ಕೋಪ ಬರುವುದು ಮಾತ್ರ ಸತ್ಯ.
ಬಿಜೆಪಿ ಎಂಎಲ್ಎ ಒಬ್ಬರು ಇತ್ತೀಚೆಗೆ ಚೀನಾ ವೈರಸ್ ಗೋ ಬ್ಯಾಕ್ ಎಂದಿದ್ದಕ್ಕೆ ಚೀನಾ ಕಣ್ಣು ಕೆಂಪಗಾಗಿವೆ. ಏ.5 ರಂದು ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಕರೆಕೊಟ್ಟಿದ್ದ ದೀಪ ಪ್ರಜ್ವಲನ ಸಮಯದಲ್ಲಿ ಬಿಜೆಪಿ ಎಂಎಲ್ಎ ರಾಜಾ ಸಿಂಗ್ ಚೀನಾ ವೈರಸ್ ಗೋ ಬ್ಯಾಕ್ ಎಂದು ಬಹಿರಂಗವಾಗಿಯೇ ಘೋಷಣೆ ಕೂಗಿದ್ದರು. ಇದರಿಂದ ಕೆಂಡಾಮಂಡಲವಾಗಿರುವ ಭಾರತದಲ್ಲಿರುವ ಚೀನಾ ರಾಯಭಾರ ಕಚೇರಿ ಎಂಎಲ್ಎ ರಾಜಾ ಸಿಂಗ್ಗೆ ಪತ್ರ ಬರೆದು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದೆ.
"ಕೊರೊನಾ ವೈರಸ್ ಬಗ್ಗೆ ಮೊಟ್ಟ ಮೊದಲು ಜಗತ್ತಿಗೆ ಮಾಹಿತಿ ನೀಡಿದ್ದೇ ಚೀನಾ. ಹಾಗಂತ ಅದು ಚೀನಾದಲ್ಲಿ ಹುಟ್ಟಿತ್ತು ಎಂದರ್ಥವಲ್ಲ" ಎಂದು ಪತ್ರದಲ್ಲಿ ತಿಳಿಸಿರುವ ಚೀನಾ ರಾಯಭಾರಿ ಲಿಯು ಬಿಂಗ್, ಚೀನಾ ವೈರಸ್ ಎಂದಿದ್ದಕ್ಕೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.
ಅಮೆರಿಕ ಅಧ್ಯಕ್ಷರೇ ಕೊರೊನಾ ವೈರಸ್ಗೆ ಚೀನಾ ವೈರಸ್ ಎಂದಿದ್ದಾರೆ. ಹಾಗಿರುವಾಗ ನಾನು ಅಂದಿದ್ರಲ್ಲಿ ತಪ್ಪೇನು ಎಂದು ರಾಜಾ ಸಿಂಗ್ ಪ್ರಶ್ನಿಸಿದ್ದಾರೆ.
