ಬ್ರೆಜಿಲ್​ನ ಸ್ಲಂ ನಿವಾಸಿಗಳಿಗೆ ಕೊರೊನಾ ಬರದಂತೆ ತಡೆಯಲು ತರಬೇತಿ

ಕೋವಿಡ್​ ಸೋಂಕಿನಿಂದ ಹೆಚ್ಚು ಅಪಾಯವಿರುವುದು ಬಡವರಿಗೆ. ಕೋವಿಡ್​ ಬಂದಲ್ಲಿ ಅದರಿಂದ ಪಾರಾಗಲು ಅವರಿಗೆ ಸಾಧ್ಯವೇ ಆಗದು ಎಂಬ ಪರಿಸ್ಥಿತಿ ಬ್ರೆಜಿಲ್​ನಲ್ಲಿದೆ. ಹೀಗಾಗಿ ಬ್ರೆಜಿಲ್​ನ ಸ್ಲಂ ನಿವಾಸಿಗಳಿಗೆ ಕೊರೊನಾ ಬರದಂತೆ ತಡೆಯುವುದು ಹೇಗೆ ಎಂಬ ಬಗ್ಗೆ ತರಬೇತಿ ನೀಡಲಾಗುತ್ತಿದೆ.

ಹೈದರಾಬಾದ್: ಕೊರೊನಾ ವೈರಸ್​ನಿಂದ ಜಗತ್ತು ತತ್ತರಿಸಿದೆ. ಬಹುತೇಕ ಸಮಾಜದ ಕೆಳಹಂತದ ಬಡವರೇ ಇದರಿಂದ ಹೆಚ್ಚು ಬಾಧಿತರಾಗಿದ್ದಾರೆ. ಬ್ರೆಜಿಲ್​ನ ಕತೆಯೂ ಇದಕ್ಕೆ ಹೊರತಾಗಿಲ್ಲ. ಹೀಗಾಗಿ ಬ್ರೆಜಿಲ್​ನ ಸ್ಲಂ ನಿವಾಸಿಗಳಿಗೆ ಕೊರೊನಾ ಬರದಂತೆ ಹೇಗೆ ತಡೆಯುವುದು ಎಂಬ ಬಗ್ಗೆ ತರಬೇತಿ ಆಯೋಜಿಸಲಾಗುತ್ತಿದೆ.

63 ವರ್ಷದ ಮನೆಗೆಲಸ ಮಾಡುವ ಮಹಿಳೆ ಕೋವಿಡ್​ಗೆ ಬಲಿಯಾಗಿದ್ದು ಬ್ರೆಜಿಲ್​ನ ಮೊದಲ ಕೋವಿಡ್​ ಸಾವಾಗಿತ್ತು. ಇಟಲಿಯಿಂದ ಮರಳಿ ಬಂದಿದ್ದ ಮಾಲೀಕನಿಂದ ಆಕೆಗೆ ಕೊರೊನಾ ಸೋಂಕು ತಗುಲಿತ್ತು. ಆದರೆ ಆಕೆಯ ಮಾಲೀಕ ಮಾತ್ರ ಸೋಂಕಿನಿಂದ ಗುಣಮುಖನಾಗಿ ಬದುಕಿದ್ದಾನೆ. ಮಾಲೀಕನಿಗೆ ಚಿಕಿತ್ಸೆ ಪಡೆಯಲು ಹಣ ಹಾಗೂ ವಿಶ್ರಾಂತಿಗಾಗಿ ಸಾಕಷ್ಟು ಸಮಯವಿತ್ತು. ಅದು ಆಕೆಯ ಬಳಿ ಇರಲಿಲ್ಲ. ಹೀಗಾಗಿ ಆಕೆ ಸಾವನ್ನಪ್ಪಬೇಕಾಯಿತು.

ಈ ಘಟನೆಯನ್ನು ನೋಡಿದರೆ ಕೋವಿಡ್​ ಸೋಂಕಿನಿಂದ ಹೆಚ್ಚು ಅಪಾಯವಿರುವುದು ಬಡವರಿಗೇ ಎಂಬುದು ಗೊತ್ತಾಗುತ್ತದೆ. ಕೋವಿಡ್​ ಬಂದಲ್ಲಿ ಅದರಿಂದ ಪಾರಾಗಲು ಅವರಿಗೆ ಸಾಧ್ಯವೇ ಆಗದು ಎಂಬ ಪರಿಸ್ಥಿತಿ ಇದೆ. ಹೀಗಾಗಿಯೇ ಈಗ ಸ್ಲಂಗಳಲ್ಲಿರುವ ಬಡವರಿಗೆ ಸುರಕ್ಷತೆಯ ತರಬೇತಿಗಳನ್ನು ನೀಡಲಾಗುತ್ತಿದೆ.