ಪಾಟ್ನಾ: ಎಐಸಿಸಿ ಅಧ್ಯಕ್ಷ ಸ್ಥಾನಕ್ಕೆ ರಾಜೀನಾಮೆ ನೀಡುವ ರಾಹುಲ್ ಗಾಂಧಿ ಅಚಲ ನಿರ್ಧಾರ ಸಡಿಲಿಸುವಂತೆ ಕಾರ್ಯಕರ್ತರು ಒತ್ತಾಯಿಸುತ್ತಿದ್ದಾರೆ. ಬಿಹಾರದ ಯುವ ಕಾಂಗ್ರೆಸ್ ಘಟಕ ರಕ್ತದಲ್ಲಿ ಪತ್ರ ಬರೆದು, ರಾಹುಲ್ ನಿರ್ಧಾರ ಬದಲಿಸುವಂತೆ ಮನವಿ ಮಾಡಿದೆ.
ಪಕ್ಷದ ಕಚೇರಿ ಸಡಕತ್ ಆಶ್ರಮದಲ್ಲಿ ಸೇರಿದ್ದ ಯುವ ಕಾಂಗ್ರೆಸ್ ಘಟಕದ ಕಾರ್ಯಕರ್ತರು ಸಾಮೂಹಿಕವಾಗಿ ರಕ್ತದಲ್ಲಿ ರಾಹುಲ್ರಿಗೆ ಪತ್ರ ಬರೆದರು. ಅಧ್ಯಕ್ಷ ಸ್ಥಾನದಿಂದ ಕೆಳಗಿಳಿಯುವ ತಮ್ಮ ನಿರ್ಧಾರವನ್ನು ಮತ್ತೆ ಪರಿಶೀಲಿಸುವಂತೆ ಈ ಮೂಲಕ ಮನವಿ ಮಾಡಿದರು.
ರಕ್ತದಲ್ಲಿ ಬರೆದ ಪತ್ರವನ್ನು ರಾಜ್ಯದ ಕಾಂಗ್ರೆಸ್ ಮುಖ್ಯಸ್ಥ ಡಾ. ಮದನ್ ಮೋಹನ್ ಝಾ ಅವರಿಗೆ ಒಪ್ಪಿಸಿದ ಕಾರ್ಯಕರ್ತರು, ತಮ್ಮ ಕೋರಿಕೆಯನ್ನು ರಾಹುಲ್ರಿಗೆ ಮುಟ್ಟಿಸುವಂತೆ ತಿಳಿಸಿದರು.
ಇತ್ತೀಚೆಗೆ ಕೇಶವ್ ಚಂದ್ ಯಾದವ್ ನೇತೃತ್ವದಲ್ಲಿ ದೇಶದೆಲ್ಲೆಡೆಯಿಂದ ಯುವ ಕಾಂಗ್ರೆಸಿಗರು ದೆಹಲಿಗೆ ಆಗಮಿಸಿ, ರಾಹುಲ್ ಮನವೊಲಿಸಲು ಯತ್ನಿಸಿದ್ದರು. ಸತ್ಯ, ನ್ಯಾಯ, ಒಕ್ಕೂಟ ಹಾಗೂ ಪ್ರೀತಿಯ ಪ್ರತಿಪಾದಕ ರಾಹುಲ್ ಕಾಂಗ್ರೆಸ್ ಅಧ್ಯಕ್ಷರಾಗಿ ಮುಂದುವರೆಯಬೇಕು ಎಂದು ಈ ವೇಳೆ ಮನವಿ ಮಾಡಿದ್ದರು. 12 ಕೋಟಿಗೂ ಹೆಚ್ಚು ಮಂದಿ ರಾಹುಲ್ ಪರವಾಗಿಯೇ ಇದ್ದಾರೆ ಎಂದು ಯುವ ಕಾಂಗ್ರೆಸ್ ಉಪಾಧ್ಯಕ್ಷ ಬಿ.ವಿ. ಶ್ರೀನಿವಾಸ್ ಹೇಳಿದ್ದರು.
ಕಾಂಗ್ರೆಸ್ನ ಹಿರಿಯ ನಾಯಕರು ಸಹ ರಾಹುಲ್ರಿಗೆ ರಾಜೀನಾಮೆಯಿಂದ ಹಿಂದೆ ಸರಿಯುವಂತೆ ಮನವಿ ಮಾಡುತ್ತಿದ್ದಾರೆ. ಆದರೆ ರಾಹುಲ್ ಮುಂದಿನ ನಿರ್ಧಾರ ಇನ್ನೂ ಗೌಣವಾಗಿದೆ.
