ಲಾಹೌಲ್: ನಾಲ್ಕು ದಿನದ ಹಿಂದೆ ಪ್ರಧಾನಿ ನರೇಂದ್ರ ಮೋದಿ ಲೋಕಾರ್ಪಣೆ ಮಾಡಿದ ಅಟಲ್ ಸುರಂಗ ಮಾರ್ಗ ಸದ್ಯ ಸಂಚಾರಕ್ಕೆ ಮುಕ್ತವಾಗಿದೆ. ಲಾಹೌಲ್ ವ್ಯಾಲಿಯ ಹಲವು ಪ್ರದೇಶಳಿಗೆ ಸಂಪರ್ಕ ಕೊಂಡಿಯಾಗಿ ಈ ಸುರಂಗ ಮಾರ್ಗ ತಲೆಎತ್ತಿದೆ. ಇದರಿಂದ ಚಳಿಗಾಳದಲ್ಲಿ ತೀವ್ರ ಮಂಜಿನ ಕಾರಣದಿಂದಾಗಿ ಸಮಸ್ಯೆ ಎದುರಿಸುತ್ತಿದ್ದ ಸವಾರರು ನಿಟ್ಟುಸಿರು ಬಿಟ್ಟಿದ್ದಾರೆ.
ಆದರೆ ಇಲ್ಲಿನ ಸ್ಪಿಟಿ ಪ್ರದೇಶದ ಜನರು ಮಾತ್ರ ಅಟಲ್ ಟನಲ್ ನಿರ್ಮಾಣಗೊಂಡರೂ ದಟ್ಟ ಮಂಜಿನ ಪರಿಣಾಮ ಸುರಂಗ ಮಾರ್ಗ ಸೇವೆಯಿಂದ ದೂರ ಉಳಿಯುತ್ತಾರೆ. ಕುಂಜಮ್ ಪಾಸ್ ಇಲ್ಲಿನ ಲಾಹೌಲ್ ಹಾಗೂ ಸ್ಪಿಟಿ ಪ್ರದೇಶವನ್ನು ಸಂಪರ್ಕಿಸಲಿದೆ. ಆದರೆ ಹಿಮಪಾತದ ತಿಂಗಳುಗಳಲ್ಲಿ ಕುಂಜಮ್ ಪಾಸ್ ಮುಚ್ಚಿರಲಿದ್ದು, ಇದರಿಂದಾಗಿ ಸ್ಪಿಟಿ ಪ್ರದೇಶಕ್ಕೆ ತಲುಪುವ ಮಾರ್ಗಗಳು ಇಲ್ಲವಾಗುತ್ತವೆ.
ಇನ್ನು ಹಿಮಾಚಲ ಪ್ರದೇಶದಲ್ಲಿ ಲಾಹೌಲ್ ಹಾಗೂ ಸ್ಪಿಟಿ ಅತ್ಯಂತ ದೊಡ್ಡ ಜಿಲ್ಲೆಗಳಾಗಿವೆ. ವರ್ಷದ ಆರು ತಿಂಗಳಲ್ಲಿ ಈ ಜಿಲ್ಲೆಗಳು ಸಂಪೂರ್ಣವಾಗಿ ಹಿಮದಿಂದ ಆವೃತವಾಗಿರುತ್ತವೆ. ಈ ಟನಲ್ ನಿರ್ಮಾಣದ ಮೊದಲು ಜನರು ವ್ಯತಿರಿಕ್ತ ಸ್ಥಿತಿಯನ್ನು ಎದುರಿಸಬೇಕಾಗಿತ್ತು. 6 ತಿಂಗಳ ನಿರಂತರ ಹಿಮಪಾತದಿಂದಾಗಿ ಹೊರಜಗತ್ತಿನ ಸಂಪರ್ಕವೇ ಬಂದ್ ಆಗಿರುತ್ತಿತ್ತು. ಯಾವುದೇ ತುರ್ತು ಪರಿಸ್ಥಿತಿಯಲ್ಲಿ ಜನರನ್ನು ಕುಲ್ಲು ಪ್ರದೇಶಕ್ಕೆ ಕರೆತರಲು ಹೆಲಿಕಾಪ್ಟರ್ ಸಹಾಯ ಪಡೆಯಲೇಬೇಕಿದೆ. ಈ ಸೌಲಭ್ಯ ಕೇವಲ ಹಣವಂತರ ಸ್ವತ್ತಾಗಿದೆ.
ಇದಲ್ಲದೆ ಇತಿಹಾಸ ತಜ್ಞ ಸೆರಿಂಗ್ ಡೋರ್ಜೆ ಪ್ರಕಾರ, ಈ ಸುರಂಗ ಮಾರ್ಗದ ನಿರ್ಮಾಣದಿಂದಾಗಿ ಲಡಾಖ್ ತಲುಪುವ ದೂರ ಕೇವಲ 45ರಿಂದ 50 ಕಿ.ಮೀಟರ್ನಷ್ಟು ಮಾತ್ರ ಕಡಿಮೆಯಾಗಿದೆ. ಅಲ್ಲದೆ ಲಡಾಖ್ ತಲುಪಲು ಮೂರು ಮಾರ್ಗಗಳಿವೆ. ಅದರಲ್ಲಿ ಬಾರಾಲಾಚ, ಲಾಚುನೋಲಾ ಮತ್ತು ಟ್ಯಾಂಗ್ಲಾಕ್ ಪ್ರಮುಖವೆನಿಸಿವೆ. ಈ ಪಾಸ್ಗಳಲ್ಲಿ ಸುರಂಗ ನಿರ್ಮಿಸದಿದ್ದರೆ ಲಡಾಖ್ ತಲುಪುವುದು ಇನ್ನಷ್ಟು ಕಷ್ಟವಾಗುತ್ತಿತ್ತು ಎಂದಿದ್ದಾರೆ.
ಅಲ್ಲದೆ ಟನಲ್ ನಿರ್ಮಾಣದಿಂದಾಗಿ ಲಾಹೌಲ್ ಪ್ರದೇಶದ ಜನರು ಸಂಪರ್ಕ ಸಾಧಿಸುವಲ್ಲಿ ಇನ್ನಷ್ಟು ಬೆಳವಣಿಗೆ ಹೊಂದಬಹುದು ಆದರೆ ಹೊರಜಗತ್ತಿನ ನಿರಂತರ ಸಂಪರ್ಕದಿಂದಾಗಿ ಅವರ ಸಂಸ್ಕೃತಿಗೆ ಮಾರಕವಾಗಬಹುದು ಎಂದಿದ್ದಾರೆ.
