ವಿಮಾನಯಾನ ಸಚಿವಾಲಯದ ಸಲಹೆ ನಂತರ ಬುಕ್ಕಿಂಗ್​ ನಿಲ್ಲಿಸಿದ ಏರ್​​ ಇಂಡಿಯಾ!

ಪ್ರಯಾಣಿಕ ವಿಮಾನ ಸೇವೆ ಪುನರಾರಂಭಿಸುವ ಬಗ್ಗೆ ಸರ್ಕಾರ ನಿರ್ಧಾರ ತೆಗೆದುಕೊಂಡ ನಂತರವೇ ಬುಕ್ಕಿಂಗ್​ ಪ್ರಾರಂಭಿಸುವಂತೆ ಕೇಂದ್ರ ನಾಗರಿಕ ವಿಮಾನಯಾನ ಸಚಿವರು ಸಲಹೆ ನೀಡಿದ ನಂತರ ಏರ್​ ಇಂಡಿಯಾ ವಿಮಾನಗಳ ಬುಕ್ಕಿಂಗ್ ಸ್ಥಗಿತಗೊಳಿಸಿದೆ.

ನವದೆಹಲಿ: ಏರ್‌ ಇಂಡಿಯಾ ವಿಮಾನಗಳ ಬುಕ್ಕಿಂಗ್​ ತೆಗೆದುಕೊಳ್ಳುವುದನ್ನು ನಿಲ್ಲಿಸಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಪ್ರಯಾಣಿಕರ ವಿಮಾನ ಸೇವೆ ಪುನರಾರಂಭಿಸುವ ಬಗ್ಗೆ ಸರ್ಕಾರ ನಿರ್ಧಾರ ತೆಗೆದುಕೊಂಡ ನಂತರವೇ ಬುಕ್ಕಿಂಗ್​ ಪ್ರಾರಂಭಿಸುವಂತೆ ವಿಮಾನಯಾನ ಸಂಸ್ಥೆಗಳಿಗೆ ಕೇಂದ್ರ ನಾಗರಿಕ ವಿಮಾನಯಾನ ಸಚಿವ ಹರ್ದೀಪ್ ಸಿಂಗ್ ಪುರಿ ಸಲಹೆ ನೀಡಿದ್ದಾರೆ.

ಮೇ 4ರಿಂದ ಆಯ್ದ ದೇಶೀಯ ವಿಮಾನ ಮತ್ತು ಜೂನ್ 1ರಿಂದ ಆಯ್ದ ಅಂತಾರಾಷ್ಟ್ರೀಯ ವಿಮಾನಗಳ ಬುಕ್ಕಿಂಗ್​ ಪ್ರಾರಂಭಿಸಲಾಗಿದೆ ಎಂದು ಏರ್​ ಇಂಡಿಯಾ ಶನಿವಾರ ತಿಳಿಸಿತ್ತು. ಆದ್ರೀಗ ನಾವು ಎಲ್ಲಾ ಬುಕ್ಕಿಂಗ್​ಗಳನ್ನು ನಿಲ್ಲಿಸಿದ್ದೇವೆ. ಪ್ರಯಾಣಿಕರು ಕಾಯ್ದಿರಿಸಿದ್ದ ಎಲ್ಲಾ ಟಿಕೆಟ್​ಗಳನ್ನು ರದ್ದುಪಡಿಸಲಾಗಿದೆ ಎಂದು ವಿಮಾನಯಾನ ಸಂಸ್ಥೆ ಅಧಿಕಾರಿಗಳು ತಿಳಿಸಿದ್ದಾರೆ.

ಏರ್ ಇಂಡಿಯಾದ ವೆಬ್‌ಸೈಟ್‌ನಲ್ಲಿ ಶನಿವಾರ ಪ್ರಕಟವಾದ ಅಧಿಸೂಚನೆಯಲ್ಲಿ 'ಮೇ 4, 2020ರಿಂದ ಪ್ರಯಾಣಕ್ಕಾಗಿ ಆಯ್ದ ದೇಶೀಯ ವಿಮಾನಗಳಿಗಾಗಿ ಮತ್ತು 2020ರ ಜೂನ್ 1ರಿಂದ ಅಂತಾರಾಷ್ಟ್ರೀಯ ವಿಮಾನಯಾನಕ್ಕಾಗಿ ಬುಕ್ಕಿಂಗ್​ ಪ್ರಾರಂಭಿಸಲಾಗಿದೆ' ಎಂದು ತಿಳಿಸಿತ್ತು. ಇದೀಗ ಈ ಅಧಿಸೂಚನೆಯನ್ನು ವೆಬ್‌ಸೈಟ್‌ನಿಂದ ತೆಗೆದುಹಾಕಲಾಗಿದೆ.