ಸಾಹಿಬ್ಗಂಜ್ (ಜಾರ್ಖಂಡ್): ಕೊರೊನಾ ಸೋಂಕು ಪುಟ್ಟ ಕಂದಮ್ಮಗಳಿಂದ ಹಿಡಿದು ವಯೋವೃದ್ಧರವರೆಗೂ ಯಾರನ್ನೂ ಬಿಡದೆ ಕಾಡುತ್ತಿದೆ. ಈ ಮಧ್ಯೆ ಕೆಲವೆಡೆ ಹಿರಿ ಜೀವಗಳೂ ಕೊರೊನಾ ಗೆದ್ದು ಬರುತ್ತಿರುವ ಸುದ್ದಿಗಳು ಮನಸ್ಸಿಗೆ ಖುಷಿ ನೀಡುತ್ತಿವೆ.
ಕೊರೊನಾ ಸೋಂಕಿನಿಂದ ಅತೀ ಹೆಚ್ಚು ವೃದ್ಧರು ಬಲಿಯಾಗುತ್ತಿದ್ದಾರೆ. ಇದಕ್ಕೆ ಕಾರಣ ಅವರಲ್ಲಿ ರೋಗ ನಿರೋಧಕ ಶಕ್ತಿಯ ಕೊರತೆ ಮತ್ತು ಇತರ ಕಾಯಿಲೆಗಳು ಅಂಟಿಕೊಂಡಿರುವುದು. ಆದರೆ, ಜಾರ್ಖಂಡ್ನ 99 ವರ್ಷದ ವೃದ್ಧೆಯೊಬ್ಬರು ಕೊರೊನಾ ಗೆದ್ದು ಬಂದು ಅಚ್ಚರಿ ಮೂಡಿಸಿದ್ದಾರೆ.
ಜಾರ್ಖಂಡ್ ಸಾಹಿಬ್ಗಂಜ್ ಸಕ್ರೋಗರ್ ಪ್ರದೇಶದ 99 ವರ್ಷದ ದ್ರೌಪದಿ ದೇವಿಯೇ ಕೊರೊನಾ ಗೆದ್ದ ಅಜ್ಜಿ. ಸಾಹಿಬ್ಗಂಜ್ ಬಿಹೇವಿಯರ್ನ ನ್ಯಾಯಾಲಯದಲ್ಲಿ ಕೆಲಸ ಮಾಡುತ್ತಿರುವ ಈಕೆಯ ಹಿರಿಯ ಮಗ ರಾಮ್ಸ್ವರೂಪ್ ಚೌರಾಸಿಯಾ ಎಂಬಾತನಿಗೆ ಸೋಂಕು ತಗುಲಿತ್ತು. ಆತನ ಸಂಪರ್ಕದಲ್ಲಿದ್ದ ದ್ರೌಪದಿ ದೇವಿಗೂ ಸೋಂಕು ಹರಡಿತ್ತು. ಹೀಗಾಗಿ ತಾಯಿ, ಮಗ ರಾಜ್ ಮಹಲ್ ಉಪ ವಿಭಾಗ ವಿಶೇಷ ಕೋವಿಡ್ ಆಸ್ಪತ್ರೆಗೆ ದಾಖಲಾಗಿದ್ದರು. ಚಿಕಿತ್ಸೆಯ ಬಳಿಕ ಇದೀಗ ಎರಡನೇ ವರದಿಯಲ್ಲೂ ವೃದ್ಧೆಗೆ ನೆಗೆಟಿವ್ ಬಂದಿದೆ. ಹೀಗಾಗಿ ವೈದ್ಯರು ಡಿಸ್ಚಾರ್ಜ್ ಮಾಡಿ ಮನೆಗೆ ಕಳುಹಿಸಿಕೊಟ್ಟಿದ್ದಾರೆ. ಅಜ್ಜಿ ಕೊರೊನಾ ಗೆದ್ದು ಮನೆಗೆ ಮರಳುತ್ತಿದ್ದಂತೆ ಕುಟುಂಬಸ್ಥರು ಆರತಿ ಎತ್ತಿ ಬರಮಾಡಿಕೊಂಡರು.
ಈ ಕುರಿತು ಮಾತನಾಡಿರುವ ರಾಮ್ಸ್ವರೂಪ್ ಚೌರಾಸಿಯಾ, ತಾಯಿಯ ಶಿಸ್ತುಬದ್ಧ ಜೀವನ ಮತ್ತು ಆಹಾರ ಕ್ರಮದಿಂದ ಚೇತರಿಸಿಕೊಳ್ಳಲು ಸಾಧ್ಯವಾಯಿತು. ಬೆಳಿಗ್ಗೆ 4 ಗಂಟೆಗೆ ಸ್ನಾನ ಮಾಡಿ ಲಘು ಉಪಹಾರ ಸೇವಿಸಿ ಬಳಿಕ ತುಳಸಿ ರಸವನ್ನು ಸೇವಿಸುತ್ತಾರೆ. ಇದು ಅವರ ಆರೋಗ್ಯಕ್ಕೆ ಅನುಕೂಲವಾಯಿತು ಎಂದಿದ್ದಾರೆ.
