ಹೈದರಾಬಾದ್: ಇತ್ತೀಚೆಗೆ ಭಾರತದಲ್ಲಿ ನಿಷೇಧಿಸಲ್ಪಟ್ಟ 59 ಅತ್ಯಂತ ಜನಪ್ರಿಯ ಚೀನಾ ಆ್ಯಪ್ಗಳು 2014 ರಿಂದೀಚೆಗೆ ಭಾರತದಲ್ಲಿ 5 ಬಿಲಿಯನ್ (500 ಕೋಟಿ) ಡೌನ್ಲೋಡ್ ಆಗಿದ್ದವು ಎಂದು ಮೂಲಗಳು ತಿಳಿಸಿವೆ. ಆ್ಯಪ್ ಮಾರ್ಕೆಟ್ ಸಮೀಕ್ಷಕ ವೆಬ್ಸೈಟ್ ಸೆನ್ಸಾರ್ ಟವರ್ ಈ ಕುತೂಹಲಕಾರಿ ಮಾಹಿತಿಯನ್ನು ಬಹಿರಂಗಪಡಿಸಿದೆ.
ದೇಶದಲ್ಲಿ ಯುವಜನತೆಗೆ ಅತಿ ಪ್ರಿಯವಾಗಿದ್ದ ವಿಡಿಯೋ ಆ್ಯಪ್ ಟಿಕ್ಟಾಕ್ನ ಒಟ್ಟು ಜಾಗತಿಕ ಡೌನ್ಲೋಡ್ ಪೈಕಿ ಭಾರತದಲ್ಲೇ ಶೇ.30 ರಷ್ಟು ಡೌನ್ಲೋಡ್ ಮಾಡಲಾಗಿತ್ತು. ಭಾರತದಲ್ಲಿ ಟಿಕ್ಟಾಕ್ 611 ಮಿಲಿಯನ್ ಬಾರಿ ಲೈಫ್ಟೈಮ್ ಡೌನ್ಲೋಡ್ ಕಂಡಿತ್ತು ಎಂದು ಸೆನ್ಸಾರ್ ಟವರ್ ಹೇಳಿದೆ. ಕೇವಲ ಡೌನ್ಲೋಡ್ ಮಾತ್ರವಲ್ಲದೇ ಟಿಕ್ಟಾಕ್ ಭಾರತದಲ್ಲಿ ಅತಿ ಹೆಚ್ಚು ಸಕ್ರಿಯ ಬಳಕೆದಾರರನ್ನು ಹೊಂದಿತ್ತೆಂಬುದು ವಾಸ್ತವ.
ಆ್ಯಪ್ ಬ್ಯಾನ್ ಹಿಂದಿನ ಕಾನೂನು
ಭಾರತದ ಮಾಹಿತಿ ತಂತ್ರಜ್ಞಾನ ಕಾಯ್ದೆ, 2000 ರ ಸೆಕ್ಷನ್ 69 ಎ ಅಡಿಯಲ್ಲಿ ಚೀನಾ ಆ್ಯಪ್ಗಳನ್ನು ಬ್ಯಾನ್ ಮಾಡಲಾಗಿದೆ. ಈ ಕಾಯ್ದೆಯಡಿ ಯಾವುದೇ ಕಂಪ್ಯೂಟರ್ನಿಂದ ಬಳಕೆದಾರರಿಗೆ ಮಾಹಿತಿ ವರ್ಗಾವಣೆಯನ್ನು ನಿರ್ಬಂಧಿಸುವ ಅಧಿಕಾರವನ್ನು ಸರ್ಕಾರ ಹೊಂದಿದೆ.
ನಿಷೇಧವನ್ನು ಹೇಗೆ ಜಾರಿ ಮಾಡಲಾಗುತ್ತದೆ?
ಕೇಂದ್ರ ಸರ್ಕಾರದ ಆದೇಶವು ಕೈಸೇರುತ್ತಿದ್ದಂತೆಯೇ ಗೂಗಲ್ ಪ್ಲೇ ಸ್ಟೋರ್ ಹಾಗೂ ಆ್ಯಪಲ್ ಸ್ಟೋರ್ಗಳು ಈ ಆ್ಯಪ್ಗಳನ್ನು ತಮ್ಮ ಪ್ಲಾಟ್ಫಾರ್ಮ್ನಿಂದ ತೆಗೆದು ಹಾಕುವುದು ಕಡ್ಡಾಯ. ಅದರಂತೆ ಈಗಾಗಲೇ ಟಿಕ್ಟಾಕ್ ಅನ್ನು ತೆಗೆದು ಹಾಕಲಾಗಿದೆ. ಇದರ ಜೊತೆಗೆ ಈ ಆ್ಯಪ್ಗಳಿಗೆ ಡೇಟಾ ಟ್ರಾಫಿಕ್ ನಿಲ್ಲಿಸಲು ಇಂಟರ್ನೆಟ್ ಸೇವಾ ಪೂರೈಕೆದಾರರು ಹಾಗೂ ಟೆಲಿಕಾಂ ಕಂಪನಿಗಳೊಂದಿಗೆ ಸರ್ಕಾರ ಮಾತುಕತೆ ನಡೆಸುತ್ತಿದೆ. ಈ ಕ್ರಮಗಳು ಜಾರಿಗೆ ಬಂದ ತಕ್ಷಣ ಬ್ಯಾನ್ ಆಗಿರುವ ಆ್ಯಪ್ಗಳು ತಾನಾಗಿಯೇ ಕೆಲಸ ಮಾಡುವುದನ್ನು ನಿಲ್ಲಿಸುತ್ತವೆ.
