ದೆಹಲಿಯಲ್ಲಿ ಕಾಣಿಸಿಕೊಂಡ ಅಮೃತ್​ಪಾಲ್​: ಮತ್ತೊಂದು ಸಿಸಿಟಿವಿ ವಿಡಿಯೋ ವೈರಲ್​

ಅಮೃತ್​ಪಾಲ್​ ಬೇರೆ ಬೇರೆ ಭಾಗಗಳಲ್ಲಿ ಒಂದೊಂದು ವೇಷದಲ್ಲಿ ಕಾಣಿಸಿಕೊಳ್ಳುತ್ತಿರುವ ಸಿಸಿಟಿವಿ ವಿಡಿಯೋಗಳು ಬೆಳಕಿಗೆ ಬರುತ್ತಿವೆ.

ಚಂಡೀಗಢ: ಖಲಿಸ್ತಾನ್​ ಪ್ರತ್ಯೇಕತಾವಾದಿ ಅಮೃತ್​ಪಾಲ್​ ಸಿಂಗ್​ ಬಂಧನ ಭೀತಿಯಿಂದ ಪೊಲೀಸರಿಂದ ಕಣ್ತಪ್ಪಿಸಿಕೊಂಡು ಓಡಾಡುತ್ತಿರುವುದು ಗೊತ್ತೇ ಇದೆ. ಕಳೆದ ವಾರ ಮಾರುವೇಷದಲ್ಲಿ ಅಮೃತ್​ಪಾಲ್ ಪಂಜಾಬ್​ನಲ್ಲಿ ಓಡಾಡುತ್ತಿರುವುದು ಹಾಗೂ ಆತನಿಗೆ ಸಹಚರರು ಸಹಾಯ ಮಾಡಿರುವುದು ಸಿಸಿಟಿವಿ ಕ್ಯಾಮರಾದಲ್ಲಿ ಸೆರೆಯಾಗಿ, ವೈರಲ್​ ಆಗಿತ್ತು. ಇದೀಗ ಅಂತಹದೇ ಅಮೃತ್​ಪಾಲ್​ ಹಾಗೂ ಆತನ ಸಹಚರ ಪಾಪಲ್​ಪ್ರೀತ್ ಸಿಂಗ್​ ಇರುವಮತ್ತೊಂದು ಸಿಸಿಟಿವಿ ವಿಡಿಯೋ ಬೆಳಕಿಗೆ ಬಂದಿದೆ.

ಈ ಬಾರಿ ಬೆಳಕಿಗೆ ಬಂದಿರುವ ವಿಡಿಯೋ ರಾಜಧಾನಿ ದೆಹಲಿಯದ್ದು ಎಂದು ಹೇಳಲಾಗುತ್ತಿದೆ. ಈ ಸಿಸಿಟಿವಿ ವೀಡಿಯೊದಲ್ಲಿ, ಅಮೃತಪಾಲ್ ಪೇಟವಿಲ್ಲದೆ ಮತ್ತು ಉದ್ದನೆಯ ಕೂದಲಿನೊಂದಿಗೆ ಹೊಸ ವೇಷದಲ್ಲಿ ಕಾಣಿಸಿಕೊಂಡಿದ್ದಾನೆ. ವಿಡಿಯೋದಲ್ಲಿ, ಅಮೃತ್​ಪಾಲ್​ ಜೊತೆಗೆ ಅವನ ಸಹಚರ ಪಾಪಲ್​ಪ್ರೀತ್​ ಸಿಂಗ್ ಕೂಡ ಬೀದಿಯಲ್ಲಿ ಬ್ಯಾಗ್ ಹೊತ್ತುಕೊಂಡು ಅವನ ಹಿಂದೆ ಹೋಗುತ್ತಿರುವುದನ್ನು ಕಾಣಬಹುದು. ಈ ವೀಡಿಯೋ ಮಾರ್ಚ್ 23ರ ಸಂಜೆಯ ವೇಳೆಯದ್ದು ಎಂದು ಹೇಳಲಾಗಿದೆ.

ಅಮೃತ್​ಪಾಲ್​ ಸಿಂಗ್​ ನನ್ನು ಸೆರೆ ಹಿಡಿಯಲು ಪೊಲೀಸರು ನಿರಂತರ ಹುಡುಕಾಟ ನಡೆಸುತ್ತಿದ್ದಾರೆ. ಈ ಕಾರ್ಯಾಚರಣೆಯ ಸಮಯದಲ್ಲಿ, ಪೊಲೀಸರು ಅಮೃತಪಾಲ್ ಅವರ ನೂರಾರು ಸಹಚರರನ್ನು ಬಂಧಿಸಿದ್ದರು. ಆದರೆ ಅಮೃತಪಾಲ್ ಮತ್ತು ಅವರ ಸಹಚರ ಪಾಪಲ್​ಪ್ರೀತ್​ ಸಿಂಗ್ ಪೊಲೀಸರಿಂದ ತಪ್ಪಿಸಿಕೊಂಡು ತಲೆಮರೆಸಿಕೊಂಡಿದ್ದಾರೆ.

ಅಮೃತ್​ಪಾಲ್​ ಸಿಂಗ್​ ಪೊಲೀಸರಿಂದ ತಪ್ಪಿಸಿಕೊಂಡು ತಲೆಮರೆಸಿಕೊಂಡ ನಂತರ ಹಲವಾರು ಸಿಸಿಟಿವಿ ದೃಶ್ಯಾವಳಿಗಳು ಅಥವಾ ಫೋಟೋಗಳು ಬೆಳಕಿಗೆ ಬರುತ್ತಿವೆ. ಪ್ರತಿ ವಿಡಿಯೋ, ಫೋಟೋಗಳಲ್ಲೂ ಅಮೃತ್​ಪಾಲ್​ ಒಂದೊಂದು ವೇಷದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾನೆ.

ಮೊದಲ ವಿಡಿಯೋದಲ್ಲಿ ಅಮೃತ್​ಪಾಲ್ ಸಿಂಗ್ ಪ್ಲಾಟಿನಾ ಮೋಟಾರ್ ಸೈಕಲ್ ಹಿಂದೆ ಕುಳಿತಿರುವುದು ಕಂಡುಬಂದಿತ್ತು. ಈ ಫೋಟೋದಲ್ಲಿ ಅಮೃತ್​ಪಾಲ್ ಸಿಂಗ್ ಗುಲಾಬಿ ಬಣ್ಣದ ಪೇಟ ಧರಿಸಿದ್ದರು. ನಂತರ ಎರಡನೇ ಫೋಟೋದಲ್ಲಿ ಅಮೃತ್​ಪಾಲ್ ಸಿಂಗ್ ರಸ್ತೆಯಲ್ಲಿ ಕಾಣಿಸಿಕೊಂಡಿದ್ದ. ವಿಡಿಯೋ ನೋಡಿದ ಪೊಲೀಸರು ತಕ್ಷಣ ಕ್ರಮ ಕೈಗೊಂಡು ಮೋಟಾರ್ ಸೈಕಲ್ ಹಾಗೂ ಜುಗಾಡು ರೆಹಾರಿ ಎರಡನ್ನೂ ವಶಪಡಿಸಿಕೊಂಡಿದ್ದರು.

ನಂತರ, ಲೂಧಿಯಾನದಲ್ಲಿ ಕಾಣಿಸಿಕೊಂಡ ಅಮೃತಪಾಲ್ ಮತ್ತು ಸಹಚರನ ಚಿತ್ರಗಳು ಹೊರಬಂದಿದ್ದವು. ಅಮೃತ್​ಪಾಲ್ ಸಿಂಗ್ 40 ರಿಂದ 50 ನಿಮಿಷಗಳ ಕಾಲ ನಗರದಾದ್ಯಂತ ಸುತ್ತಾಡುತ್ತಿದ್ದ ಎಂದು ಸ್ಥಳೀಯ ಪೊಲೀಸ್ ಕಮಿಷನರ್ ಹೇಳಿದ್ದರು. ಈ ಸಂಬಂಧ ವಿಡಿಯೋ ಕೂಡ ಬಿಡುಗಡೆ ಮಾಡಲಾಗಿದ್ದು, ಅದು ಲಡೋವಲ್ ಟೋಲ್ ಪ್ಲಾಜಾದ ವಿಡಿಯೋ ಎಂದು ಹೇಳಲಾಗಿತ್ತು. ಲುಧಿಯಾನದಲ್ಲೂ ಅಮೃತಪಾಲ್ ಸಿಂಗ್ ವಿಭಿನ್ನ ವೇಷದಲ್ಲಿ ಕಾಣಿಸಿಕೊಂಡಿದ್ದನು. ಅದರಲ್ಲಿ ಅಮೃತ್​ಪಾಲ್ ಪ್ಯಾಂಟ್ ಶರ್ಟ್ ಮತ್ತು ವೇಲ್ ಧರಿಸಿದ್ದರು.

ಹರಿಯಾಣದಲ್ಲಿ ಇದ್ದ ಬಗ್ಗೆ ಮಾಹಿತಿ: ಇದರ ನಂತರ ಅಮೃತಪಾಲ್ ಮತ್ತು ಅವರ ಸಹಚರ ಪಾಪಲ್​ಪ್ರೀತ್ ಸಿಂಗ್ ಹರಿಯಾಣದ ಶಹಬಾದ್‌ನಲ್ಲಿದ್ದಾರೆ ಎಂಬ ವರದಿಗಳು ಬಂದವು. ಅದಕ್ಕೆ ಪೂರಕವಾಗಿ ಶಹಾಬಾದ್‌ನಲ್ಲಿ ಛತ್ರಿ ಹಿಡಿದು ಓಡಾಡುತ್ತಿದ್ದ ಅಮೃತ್​ಪಾಲ್​ ಸಿಸಿಟಿವಿ ವಿಡಿಯೋ ಬೆಳಕಿಗೆ ಬಂದಿತ್ತು. ವಿಡಿಯೋದಲ್ಲಿ ಅಮೃತಪಾಲ್ ನೀಲಿ ಪ್ಯಾಂಟ್ ಮತ್ತು ಚೆಕ್ಸ್​ ಶರ್ಟ್ ಧರಿಸಿದ್ದನು.

ಅಮೃತಪಾಲ್ ಹರಿಯಾಣದಲ್ಲಿ ಬಲ್ಜಿತ್ ಕೌರ್ ಜೊತೆ ತಂಗಿದ್ದನು ಎಂದು ಪೊಲೀಸರು ತಿಳಿಸಿದ್ದರು. ಸಹಚರ ಬಲ್ಜಿತ್​ ಕೌರ್, ಅಮೃತ್​ಪಾಲ್​ನನ್ನು ತನ್ನ ಮನೆಯಲ್ಲಿ ಮೂರು ದಿನಗಳ ಕಾಲ ಇರಿಸಿಕೊಂಡಿದ್ದನು ಎಂದು ಆರೋಪಗಳೂ ಕೇಳಿ ಬಂದಿದ್ದವು. ಇದಾದ ಬಳಿಕ ಪಲೀಸರು ಬಲ್ಜಿತ್ ಕೌರ್ ಅವರನ್ನು ಕೂಡ ಬಂಧಿಸಿದ್ದಾರೆ.

ಇದನ್ನೂ ಓದಿ: ಅಮೃತ್ ಪಾಲ್ ಸಿಂಗ್ ನೇಪಾಳದಲ್ಲಿ ಅಡಗಿದ್ದಾನೆ: ಭಾರತೀಯ ರಾಯಭಾರ ಕಚೇರಿ ಹೇಳಿಕೆ