ರಾಯ್ಬರೇಲಿ (ಉತ್ತರ ಪ್ರದೇಶ): ಉತ್ತರ ಪ್ರದೇಶದ ರಾಯ್ಬರೇಲಿ ಜಿಲ್ಲೆಯಲ್ಲಿ ಮದ್ಯಪ್ರಿಯ ಮಂಗವೊಂದು ಮದ್ಯ ಮಾರಾಟಗಾರರ ಪಾಲಿಗೆ ಕಂಟಕಪ್ರಾಯವಾಗಿ ಪರಿಣಮಿಸಿದೆ. ಅಲ್ಲದೇ, ಈ ಮದ್ಯ ಪ್ರಿಯ ಕೋತಿ ಬಿಯರ್ ಕುಡಿಯುತ್ತಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಇಲ್ಲಿನ ಲಖನೌ - ಕಾನ್ಪುರ ರಸ್ತೆಯಲ್ಲಿರುವ ನವಾಬ್‌ಗಂಜ್ ಪ್ರದೇಶದಲ್ಲಿ ಕುಡುಕ ಕೋತಿಯ ಉಪಟಳಕ್ಕೆ ಮದ್ಯದ ಅಂಗಡಿ ಮಾಲೀಕರು ಮತ್ತು ಗ್ರಾಹಕರು ಬೇಸತ್ತು ಹೋಗುವಂತೆ ಆಗಿದೆ. ಮದ್ಯದ ಮಾರಾಟ ಮಳಿಗೆಯಲ್ಲಿ ಕೋತಿ ಶಾಶ್ವತ ಗ್ರಾಹಕನೇ ಆಗಿ ಬಿಟ್ಟಿದೆ.
ನಿರಂತರ ಮದ್ಯದ ಚಟ ಹೊಂದಿರುವ ಈ ಕೋತಿ, ಮದ್ಯದಂಗಡಿಗಳಿಗೆ ನುಗ್ಗಿ ಮದ್ಯ ಸೇವಿಸಿ ಬಿಡುತ್ತದೆ. ಈ ಅಂಗಡಿಗಳಲ್ಲಿ ಮದ್ಯ ಖರೀದಿಸುವವರ ಕೈಗೆ ಕೈ ಹಾಕಿ ಹಾಕಿ ಮಂಗವು ಮದ್ಯದ ಬಾಟಲಿಗಳನ್ನು ಕಸಿದುಕೊಳ್ಳುತ್ತದೆ. ಓಡಿಸಲು ಪ್ರಯತ್ನಿಸಿದರೆ ಮನುಷ್ಯರ ಮೇಲೆಯೇ ಈ ಕೋತಿ ದಾಳಿ ಮಾಡುತ್ತದೆ ಎಂದು ಮದ್ಯದ ಅಂಗಡಿ ಮಾಲೀಕರು ಅಲವತ್ತುಕೊಂಡಿದ್ದಾರೆ.
ಈ ಬಗ್ಗೆ ಪ್ರತಿಕ್ರಿಯಿಸಿರುವ ಜಿಲ್ಲಾ ಅಬಕಾರಿ ಅಧಿಕಾರಿ ರಾಜೇಂದ್ರ ಪ್ರತಾಪ್ ಸಿಂಗ್, ಅರಣ್ಯ ಇಲಾಖೆಯ ನೆರವಿನಿಂದ ಈ ಕೋತಿಯನ್ನು ಸೆರೆ ಹಿಡಿಯಲು ಕಾರ್ಯಾಚರಣೆ ನಡೆಸಲಾಗುತ್ತದೆ ಎಂದು ತಿಳಿಸಿದ್ದಾರೆ.
ಇದನ್ನೂ ಓದಿ: ಮಿಂಚಿನ ವೇಗದಲ್ಲಿ ಕಾಡು ಹಂದಿ ಬೇಟೆಯಾಡಿದ ಹುಲಿ: ವಿಡಿಯೋ ವೈರಲ್
