ಜಲಗಾಂವ್, ಮಹಾರಾಷ್ಟ್ರ: ಮನೆಗೆಲಸ ಮಾಡುತ್ತಲೇ ತಮಿಳುನಾಡಿನಲ್ಲಿ 50 ಲಕ್ಷ ರೂಪಾಯಿಗಳ ದರೋಡೆ ಮಾಡಿದ ಇಬ್ಬರು ಕಳ್ಳರು ರಾಜಸ್ಥಾನಕ್ಕೆ ಪರಾರಿಯಾಗಲು ಯತ್ನಿಸಿ, ಮಹಾರಾಷ್ಟ್ರದಲ್ಲಿ ಪೊಲೀಸರ ಬಲೆಗೆ ಬಿದ್ದಿರುವ ಘಟನೆ ನಡೆದಿದೆ.
19 ವರ್ಷದ ಮಂಗಲ್ ಅಸುರಾಮ್ ಬಿಷ್ಣೋಯ್ ಬಂಧಿತನಾಗಿದ್ದು, ಆತನ ಜೊತೆಯಲ್ಲಿ ಮತ್ತೋರ್ವ ಬಾಲಾಪರಾಧಿಯೂ ಕೃತ್ಯದಲ್ಲಿ ಭಾಗಿಯಾಗಿದ್ದು, ಆತನನ್ನೂ ವಶಕ್ಕೆ ಪಡೆಯಲಾಗಿದೆ. ಮಂಗಲ್ರಾಮ್ ರಾಜಸ್ಥಾನದ ಬಾರ್ಮರ್ ಜಿಲ್ಲೆಯ ಗುಡ್ಮಲಾನಿ ನಿವಾಸಿಯಾಗಿದ್ದನು ಎಂದು ತಿಳಿದುಬಂದಿದೆ.
ನಡೆದಿದ್ದೇನು..?
ಮಂಗಲ್ ಅಸುರಾಮ್ ತಮಿಳುನಾಡಿನ ಸೇಲಂ ಬಳಿಯಿರುವ ದೇವನ್ಯಾಗಂನಲ್ಲಿರುವ ಮೋಹನ್ಕುಮಾರ್ ಜಗಥತಿ ಎಂಬುವವರ ಮನೆಯಲ್ಲಿ ಕೆಲಸಕ್ಕಿದ್ದು, ಆತ ಇನ್ನೊಬ್ಬನ (ಬಾಲಾಪರಾಧಿ) ಜೊತೆಗೂಡಿ ಮೋಹನ್ ಕುಮಾರ್ ಮನೆಯಲ್ಲಿ 50 ಲಕ್ಷ ರೂಪಾಯಿ ದೋಚಿದ್ದಾನೆ.
ಕಳ್ಳತನ ಮಾಡಿದ ನಂತರ ರಾಜಸ್ಥಾನಕ್ಕೆ ಪರಾರಿಯಾಗಲು ಪ್ರಯತ್ನ ನಡೆಸಿದ್ದಾರೆ. ಈ ವೇಳೆ ಮೋಹನ್ ಕುಮಾರ್ ದರೋಡೆ ಕುರಿತಂತೆ ಸೇಲಂ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಈ ಕುರಿತು ತನಿಖೆ ನಡೆಸಿದ ಪೊಲೀಸರು, ಆರೋಪಿಗಳು ರಾಜಸ್ಥಾನ ಮೂಲದವರಾಗಿದ್ದು, ತಮ್ಮ ಸ್ವಂತ ರಾಜ್ಯಕ್ಕೆ ಪರಾರಿಯಾಗುತ್ತಾರೆ ಎಂದು ಊಹಿಸಿದ್ದಾರೆ.
ಇದನ್ನೂ ಓದಿ: 2011ರಿಂದ ನೀವು ಒಮ್ಮೆಯಾದ್ರೂ ಏರ್ ಇಂಡಿಯಾದಲ್ಲಿ ಓಡಾಡಿದ್ರೆ ಎಚ್ಚೆತ್ತುಕೊಳ್ಳಿ..
ರೈಲಿನಲ್ಲಿ ಸಂಚಾರ ಮಾಡಬಹುದಾದ ಸಾಧ್ಯತೆ ಇರುವುದರಿಂದ ಚೆನ್ನೈ ಮತ್ತು ಅಹಮದಾಬಾದ್ ನಡುವಿನ ನವಜೀವನ್ ಎಕ್ಸ್ಪ್ರೆಸ್ನಲ್ಲಿ ತೆರಳಬಹುದೆಂದು ಅಂದಾಜಿಸಿ ಖಚಿತಪಡಿಸಿಕೊಂಡಿದ್ದಾರೆ. ಇದಾದ ನಂತರ ಸೇಲಂ ಪೊಲೀಸ್ ವರಿಷ್ಠಾಧಿಕಾರಿ ಜಲಗಾಂವ್ ಪೊಲೀಸ್ ವರಿಷ್ಠಾಧಿಕಾರಿಗೆ ಮಾಹಿತಿ ನೀಡಿದ್ದಾರೆ.
ಈ ವೇಳೆ ಕಾರ್ಯೋನ್ಮುಖರಾದ ಜಲಗಾಂವ್ ಪೊಲೀಸರು ನವಜೀವನ್ ಎಕ್ಸ್ಪ್ರೆಸ್ನಲ್ಲಿ ಪರಿಶೀಲನೆ ನಡೆಸಿ, ಇಬ್ಬರನ್ನೂ ವಶಕ್ಕೆ ಪಡೆದಿದ್ದಾರೆ. ಆರೋಪಿಗಳಿಂದ 37 ಲಕ್ಷ ರೂಪಾಯಿಯನ್ನು ಜಪ್ತಿ ಮಾಡಲಾಗಿದ್ದು, ತಮಿಳುನಾಡು ಪೊಲೀಸರಿಗೆ ಆರೋಪಿಗಳನ್ನು ಹಸ್ತಾಂತರಿಸುವ ಕಾರ್ಯ ಪ್ರಗತಿಯಲ್ಲಿದೆ.
