ಕನೌಜ್ (ಉತ್ತರ ಪ್ರದೇಶ): ಬೆಲೆ ಏರಿಕೆ ಬಿಸಿ ಯಾರನ್ನೂ ಬಿಟ್ಟಿಲ್ಲ. 1ನೇ ತರಗತಿಯಲ್ಲಿ ಓದುತ್ತಿರುವ ಬಾಲಕಿಯೊಬ್ಬಳು ಹಣದುಬ್ಬರದಿಂದ ತಾನು ಎದುರಿಸುತ್ತಿರುವ ‘ಕಷ್ಟಗಳ’ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಪತ್ರ ಬರೆದು ಗಮನ ಸೆಳೆದಿದ್ದಾಳೆ. ಆಕೆ ಬರೆದ ಪತ್ರ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಪತ್ರದಲ್ಲೇನಿದೆ?: ಉತ್ತರ ಪ್ರದೇಶದ ಕನೌಜ್ ಜಿಲ್ಲೆಯ ಛಿಬ್ರಮೌ ಪಟ್ಟಣದ ನಿವಾಸಿಯಾದ ಕೃತಿ ದುಬೆ ಪ್ರಧಾನಿಗೆ ಪತ್ರ ಬರೆದಿರುವ ದಿಟ್ಟ ಬಾಲಕಿ. ಹಿಂದಿಯಲ್ಲಿ ಪತ್ರವನ್ನು ಬರೆದಿದ್ದು, 'ನಮಸ್ಕಾರ ಮೋದಿಜಿ, ನೀವು ಅಪಾರ ಬೆಲೆ ಏರಿಕೆಗೆ ಕಾರಣರಾಗಿದ್ದೀರಿ. "ನನ್ನ ಅಭ್ಯಾಸಕ್ಕೆ ಅಗತ್ಯವಿರುವ ಪೆನ್ಸಿಲ್, ರಬ್ಬರ್ ಬೆಲೆ ಸಹ ತುಟ್ಟಿಯಾಗಿದೆ. ನನಗೆ ಇಷ್ಟವಾದ ಮ್ಯಾಗಿಯ ಬೆಲೆಯೂ ದುಬಾರಿಯಾಗಿದೆ.
ತಾಯಿಗೆ ಪೆನ್ಸಿಲ್, ರಬ್ಬರ್ ಕೇಳಿದಲ್ಲಿ ಕೊಡಿಸಲಾಗದ್ದಕ್ಕೆ ನನ್ನ ಮೇಲೆ ರೇಗುತ್ತಾರೆ. ದಬಾಯಿಸುತ್ತಾರೆ. ಕಲಿಕೆಗೆ ಇವೆಲ್ಲಾ ಅಗತ್ಯ. ನಾನೇನು ಮಾಡಲಿ ಎಂದು ಪ್ರಶ್ನಿಸಿದ್ದಾಳೆ'. ಅಲ್ಲದೇ, ನನ್ನ ಸಹಪಾಠಿಗಳು ಪೆನ್ಸಿಲ್ ಕದಿಯುತ್ತಾರೆ ಎಂದು ಬಾಲಕಿ ದೂರಿದ್ದಾಳೆ.
ಆಕೆಯ ತಂದೆ ವಕೀಲರಾಗಿರುವ ವಿಶಾಲ್ ದುಬೆ, ಇದು ನನ್ನ ಮಗಳ 'ಮನ್ ಕಿ ಬಾತ್' ಆಗಿದೆ. ಶಾಲೆಯಲ್ಲಿ ಪೆನ್ಸಿಲ್ ಕಳೆದುಕೊಂಡಾಗ ನನ್ನ ಹೆಂಡತಿ ಅವಳನ್ನು ಗದರಿಸಿದಾಗ ಸಿಟ್ಟಾಗಿ ಈ ರೀತಿ ಪತ್ರ ಬರೆದಿದ್ದಾಳೆ. ಬೆಲೆ ಏರಿಕೆಯಿಂದ ಮಕ್ಕಳೂ ಕೂಡ ಸಂಕಷ್ಟಕ್ಕೆ ಸಿಲುಕುವಂತಾಗಿದೆ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.
ಬಾಲಕಿ ಬರೆದ ಪತ್ರ ಸೋಷಿಯಲ್ ಮೀಡಿಯಾದಲ್ಲಿ ಹರಿದಾಡಿದ್ದು, ಇದು ಅಲ್ಲಿನ ಶಿಕ್ಷಣಾಧಿಕಾರಿಗಳ ಗಮನಕ್ಕೂ ಬಂದಿದೆ. ಮಗುವಿಗೆ ಯಾವುದೇ ರೀತಿಯ ಸಹಾಯ ಮಾಡಲು ನಾವು ಸಿದ್ಧ. ಆಕೆ ಬರೆದ ಪತ್ರ ಸಂಬಂಧಪಟ್ಟವರಿಗೆ ತಲುಪುವಂತೆ ಮಾಡಲಾಗುವುದು ಎಂದು ತಿಳಿಸಿದ್ದಾರೆ.
