ತಮ್ಮ ಕುಟುಂಬಸ್ಥರು ಕೊರೊನಾಗೆ ಬಲಿಯಾದ ಸಂದರ್ಭದಲ್ಲೂ ಕರ್ತವ್ಯದಲ್ಲಿರುವ ನರ್ಸ್​ಗಳು!

ಗುಜರಾತ್​ನ ವಡೋದರಾ ಜಿಲ್ಲೆಯ ಸರ್​ ಸಯಾಜಿರಾವ್​ ಜನರಲ್ ಆಸ್ಪತ್ರೆ (ಎಸ್​​ಎಸ್​ಜಿ)ಯಲ್ಲಿ ಸೇವೆ ಸಲ್ಲಿಸುತ್ತಿರುವ ಮೂವರು ನರ್ಸ್​ಗಳು ಮಹಾಮಾರಿ ಕೊರೊನಾದಿಂದ ತಮ್ಮವರನ್ನು ಕಳೆದುಕೊಂಡರೂ ಮಾನವ ಸೇವೆಯೇ ದೇವರ ಸೇವೆಯೆಂದು ಕರ್ತವ್ಯಕ್ಕೆ ಹಾಜರಾಗಿದ್ದಾರೆ.

ವಡೋದರಾ (ಗುಜರಾತ್​): ತಮ್ಮವರು ಕೊರೊನಾ ಸೋಂಕಿಗೆ ಬಲಿಯಾದ ನೋವಿನಲ್ಲೂ ನರ್ಸ್​ಗಳು ರೋಗಿಗಳ ಸೇವೆಯೇ ಮುಖ್ಯವೆಂದು ಕರ್ತವ್ಯಕ್ಕೆ ಮರಳಿದ್ದಾರೆ.

ಗುಜರಾತ್​ನ ವಡೋದರಾ ಜಿಲ್ಲೆಯ ಸರ್​ ಸಯಾಜಿರಾವ್​ ಜನರಲ್ ಆಸ್ಪತ್ರೆ (ಎಸ್​​ಎಸ್​ಜಿ)ಯಲ್ಲಿ ಮೂವರು ನರ್ಸ್​ಗಳು ತಮ್ಮ ಪತಿ, ತಂದೆ ಮತ್ತು ತಾಯಿಯ ಮರಣದ ನಂತರ ಅವರ ಅಂತ್ಯಕ್ರಿಯೆಯನ್ನು ಪೂರ್ಣಗೊಳಿಸಿ ತಕ್ಷಣವೇ ಆಸ್ಪತ್ರೆಗೆ ಬಂದು ರೋಗಿಗಳ ಸೇವೆಯಲ್ಲಿ ತೊಡಗಿದ್ದಾರೆ.

ಎಸ್​​ಎಸ್​ಜಿ ಆಸ್ಪತ್ರೆಯಲ್ಲಿ ಶುಶ್ರೂಷಕಿಯಾಗಿ ಸೇವೆ ಸಲ್ಲಿಸುತ್ತಿರುವ ಪಾರುಲ್​ ಬೆನ್​ ಅವರ ಪತಿ ನವೆಂಬರ್ 12ರಂದು ಕೊರೊನಾ ತಗುಲಿ ಮೃತಪಟ್ಟಿದ್ದರು. ಪತಿಯ ಅಂತ್ಯಕ್ರಿಯೆ ನಡೆಸಿ, ಕೊರಗುತ್ತಾ ಮನೆಯಲ್ಲಿ ಕೂರದೇ ಇತ್ತ ತಮ್ಮ ಕೆಲಸದ ಜವಾಬ್ದಾರಿಯನ್ನು ವಹಿಸಿಕೊಂಡಿದ್ದಾರೆ. ಇತರ ರೋಗಿಗಳಿಗೆ ಚಿಕಿತ್ಸೆ ನೀಡುವುದು ನಮ್ಮ ಸಂಬಂಧಿಕರಿಗೆ ಚಿಕಿತ್ಸೆ ನೀಡಿದಂತೆ ತೃಪ್ತಿ ನೀಡಿತು ಎನ್ನುತ್ತಾರೆ ಪಾರುಲ್​.

ಮಗಳ ಕಣ್ಮುಂದೆಯೇ ಜೀವ ಬಿಟ್ಟಿದ್ದ ತಂದೆ:

ಫಾಲ್ಗುಣಿ ಬೆನ್ ಗೋಹಿಲ್ ಎಂಬ ನರ್ಸ್​ ತಂದೆ ಸೋಂಕಿಗೆ ಒಳಗಾಗಿ ಮಗಳು ಕೆಲಸ ಮಾಡುತ್ತಿದ್ದ ಎಸ್​ಎಸ್​​ಜಿ ಆಸ್ಪತ್ರೆಯಲ್ಲೇ ದಾಖಲಾಗಿದ್ದರು. ಮಗಳ ಕಣ್ಮುಂದೆಯೇ ಕೊನೆಯುಸಿರೆಳೆದಿದ್ದರು. ಕೋವಿಡ್ ಮಾರ್ಗಸೂಚಿಗಳಂತೆ ಅಪ್ಪನ ಅಂತಿಮ ವಿಧಿ ವಿಧಾನ ಮುಗಿಸಿದ ಫಾಲ್ಗುಣಿ, ಇತರ ರೋಗಿಗಳ ಸೇವೆ ಮಾಡುತ್ತಾ ತೃಪ್ತಿ ಹೊಂದುವೆ ಎಂದು ತಮ್ಮ ಕೆಲಸದಲ್ಲಿ ತೊಡಗಿಸಿಕೊಂಡಿದ್ದಾರೆ.

ನರ್ಸ್ ಪಾರುಲ್​​ ಬೆನ್ ಪರೇಖ್ ಅವರ ತಾಯಿ ಕೂಡ ಮಹಾಮಾರಿಗೆ ಬಲಿಯಾಗಿದ್ದು, ಕೋವಿಡ್ ವಾರ್ಡ್‌ನಲ್ಲಿ ಮಾನವ ಸೇವೆಯೇ ದೇವರ ಸೇವೆಯೆಂದು ಕರ್ತವ್ಯಕ್ಕೆ ಹಾಜರಾಗಿದ್ದಾರೆ.