ಬೋಲ್ಪುರ(ಪಶ್ಚಿಮ ಬಂಗಾಳ): ಮನುಷ್ಯನ ಹೊಟ್ಟೆಯಲ್ಲಿ ಕರಳು, ಜಠರ ಇರುತ್ತವೆ. ಪ್ಲಾಸ್ಟಿಕ್, ಪೈಪ್ ಇರೋದು ಅಸಾಧ್ಯ. ವಿಚಿತ್ರ ಅಂದರೆ ಪಶ್ಚಿಮಬಂಗಾಳದ ವ್ಯಕ್ತಿಯೊಬ್ಬನ ಹೊಟ್ಟೆಯಲ್ಲಿ 100 ಗ್ರಾಂ ಪ್ಲಾಸ್ಟಿಕ್ ಮತ್ತು 3 ಅಡಿ ಉದ್ದದ ಪೈಪ್ ಅನ್ನು ವೈದ್ಯರು ಯಶಸ್ವಿ ಶಸ್ತ್ರಚಿಕಿತ್ಸೆ ನಡೆಸಿ ಹೊರತೆಗೆದ ಘಟನೆ ನಡೆದಿದೆ.
ಬೋಲ್ಪುರ ಉಪವಿಭಾಗೀಯ ಆಸ್ಪತ್ರೆಯಲ್ಲಿ ಹೊಟ್ಟೆ ನೋವೆಂದು ಚಿಕಿತ್ಸೆಗೆ ದಾಖಲಾದ ವ್ಯಕ್ತಿಯನ್ನು ತಪಾಸಣೆ ಮಾಡಿದಾಗ ಹೊಟ್ಟೆಯಲ್ಲಿ ಏನೋ ತುಂಬಿಕೊಂಡಂತೆ ಕಂಡುಬಂದಿದೆ. ಈ ವೇಳೆ ಶಸ್ತ್ರಚಿಕಿತ್ಸೆ ನಡೆಸಿದ ವೈದ್ಯರೇ ಅಚ್ಚರಿ ಪಡುವಂತೆ 100 ಗ್ರಾಂ ಪ್ಲಾಸ್ಟಿಕ್ ಹೊಟ್ಟೆಯಲ್ಲಿ ಕಂಡು ಬಂದಿದೆ. ಇದಲ್ಲದೇ, ಕಲ್ಮಶಗಳಿಂದ ಕೂಡಿದ 3 ಅಡಿ ಉದ್ದ 3 ಇಂಚು ದಪ್ಪ ಇರುವ ಪೈಪ್ನಂತೆ ಕಂಡು ಬಂದ ವಸ್ತುವನ್ನೂ ಕೂಡ ಹೊಟ್ಟೆಯಿಂದ ತೆಗೆಯಲಾಗಿದೆ.
ವೈದ್ಯಕೀಯ ಪರಿಭಾಷೆಯಲ್ಲಿ ಇದನ್ನು 'ನೆಕ್ರೋಟಿಕ್ ಸಿಗ್ಮೋಯ್ಡ್ ವೋಲ್ವೋಲಾಸ್' ಎಂದು ಕರೆಯುತ್ತಾರೆ. ಹೊಟ್ಟೆಯೊಳಗೆ ಗ್ಯಾಸ್ ಫ್ಲೂಯಿಡ್ನಿಂದ ತುಂಬಿದ 3 ಅಡಿ ಉದ್ದ ಮತ್ತು 6 ಇಂಚು ಅಗಲದ ಪೈಪ್‌ನಂತಿದ್ದ ಕಲ್ಮಶವನ್ನು ತೆಗೆಯಲಾಗಿದೆ ಎಂದು ವೈದ್ಯರು ತಿಳಿಸಿದ್ದಾರೆ.
ಬೋಲ್ಪುರ ಉಪವಿಭಾಗೀಯ ಆಸ್ಪತ್ರೆಯ ವೈದ್ಯ ಚಂದ್ರನಾಥ ಶಸ್ತ್ರಚಿಕಿತ್ಸೆ ನಡೆಸಿದ ಬಳಿಕ ಮಾತನಾಡಿ, ವ್ಯಕ್ತಿಯ ಹೊಟ್ಟೆಗೆ ಇಷ್ಟೊಂದು ಪ್ಲಾಸ್ಟಿಕ್ ಹೋಗಿ ಅದು ಪೈಪ್ ಆಗಿ ತಯಾರಾಗಿದ್ದು, ಹೇಗೆ ಎಂಬುದು ತಿಳಿಯುತ್ತಿಲ್ಲ. ಶಸ್ತ್ರಚಿಕಿತ್ಸೆಯ ನಂತರ ಅವರು ಚೇತರಿಸಿಕೊಳ್ಳುತ್ತಿದ್ದಾರೆ ಎಂದು ತಿಳಿಸಿದ್ದಾರೆ.
ಓದಿ: 17ನೇ ವಯಸ್ಸಿಗೇ ಲೈಂಗಿಕ ಕಿರುಕುಳ ನೀಡಿದ್ದ 'ಅಂಕಲ್': ನಟಿ ಕುಬ್ರಾ ಸೇಠ್ ಬಿಚ್ಚಿಟ್ಟರು ಕಹಿ ಅನುಭವ
